ដោយ: គង់ លាងហួរ
អន្តរជាតិ: ផ្នែកអចលនទ្រព្យលំនៅដ្ឋាននៅទីក្រុងវៀងចន្ទន៍ ដែលជារដ្ឋធានីរបស់ប្រទេសឡាវ មានតម្លៃសមរម្យបំផុត គិតត្រឹមដំណាច់ខែមិថុនា ឆ្នាំ២០២៥ បើប្រៀបធៀបនឹងបណ្តាទីក្រុងផ្សេងៗទៀតក្នុងតំបន់អាស៊ាន។
គិតមកទល់បច្ចុប្បន្ន ខុនដូនៅទីក្រុងមួយនេះមានតម្លៃដាក់លក់ជាមធ្យមចន្លោះពី១.៥០០ដុល្លារ ទៅ២.០០០ដុល្លារក្នុងមួយម៉ែត្រការ៉េ។ជាមួយគ្នានោះ ការជួលអាផាតមុិន ដែលមានបន្ទប់គេងទោលនៅកណ្តាលទីក្រុងវៀងចន្ទន៍មានតម្លៃប្រចាំខែចន្លោះ៨៥០ដុល្លារទៅ១.៤០០ដុល្លារក្នុងមួយខែ។
ការជួលអាផាតមុិន ដែលមានបន្ទប់គេងចំនួន៣ មានតម្លៃចាប់ពី៨០០ដុល្លារដល់១.១០០ដុល្លារក្នុងមួយខែសម្រាប់អគារអាផាតមុិនចាស់ៗ ខណៈការជួលយូនីតអគារអាផាតមុិនថ្មីៗ និងបំពាក់ដោយបរិក្ខារទំនើប មានតម្លៃលើសពី១.៥០០ដុល្លារក្នុងមួយខែ។
តម្លៃដីនៅតំបន់ពាណិជ្ជកម្មសំខាន់ៗបានកើនឡើងដល់ទំហំទឹកប្រាក់ចន្លោះពី២.៧០០ដុល្លារទៅ៣.៥០០ដុល្លារក្នុងមួយម៉ែត្រការ៉េ។ប៉ុន្តែ ដីនៅតំបន់លំនៅដ្ឋានមានតម្លៃជាមធ្យមត្រឹមតែ៥០០ដុល្លារទៅ៧០០ដុល្លារក្នុងមួយម៉ែត្រការ៉េ ខណៈដីនៅតំបន់ជាយក្រុងមានតម្លៃចន្លោះពី១៥ដុល្លារទៅ៥០ដុល្លារក្នុងមួយម៉ែត្រការ៉េ។
អត្រាផលចំណេញពីការជួលលំនៅដ្ឋាន (Rental Yield) នៅទីក្រុងវៀងចន្ទន៍នៅតែមានភាពទាក់ទាញសម្រាប់បណ្តាវិនិយោគិន ដោយស្ថិតក្នុងរង្វង់ជាមធ្យមប្រមាណ៨,៤ភាគរយ នៅតំបន់កណ្តាលទីក្រុង៕ប្រភព: Bamboo Routes៕
