ដោយៈ គង់ សូរិយា
ភ្នំពេញៈ គម្រោងសាងសង់ព្រែកជីកហ្វូណនតេជោ ដែលមានតម្លៃវិនិយោគ១,៧ ពាន់លានដុល្លារ គ្រោងនឹងចាប់ផ្តើមជាផ្លូវការនៅចុងឆ្នាំនេះ បន្ទាប់ពីបញ្ចប់ការបោះបង្គោលនិយាមការ។
លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) អមដំណើរដោយលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងមន្ត្រីពាក់ព័ន្ធមួយចំនួនទៀត បានចុះពិនិត្យការដ្ឋាន និងវាស់វែងព្រំដីនិងផ្ទៀងផ្ទាត់នៅឃុំអង្គកុល ស្រុកដំណាក់ចង្អើរ ខេត្តកែប បន្ទាប់ពីបានចុះពិនិត្យដូចគ្នានៅខេត្តកណ្តាល តាកែវ និងកំពត។
យោងតាមគណៈប្រតិភូបានឱ្យដឹងថា មានបង្គោលសរុបចំនួន ១,៩២០ ហើយការសាងសង់ត្រូវបានគេរំពឹងថា នឹងប្រើពេលប្រហែល៤ឆ្នាំ។
គម្រោងព្រែកជីកហ្វូណនតេជោ មានប្រវែង១៨០គីឡូម៉ែត្រ ទទឹងផ្នែកខាងលើប្រវែង១០០ម៉ែត្រ និងផ្នែកខាងក្រោមទទឹង៨០ម៉ែត្រ ដោយមានគន្លងផ្លូវនាវាចរចំនួនពីរខ្សែ។
ព្រែកជីកនេះនឹងតភ្ជាប់ព្រែកតាកែវ នៃទន្លេមេគង្គទៅកាន់សមុទ្រក្នុងខេត្តកែប ដោយឆ្លងកាត់ខេត្តចំនួនបួនដូចជា ខេត្តកណ្តាល តាកែវ កំពត និងកែប ដែលមានប្រជាជនសរុបចំនួន១,៦ លាននាក់រស់នៅតាមដងផ្លូវទឹក៕
