ដោយ: គង់ លាងហួរ
ភ្នំពេញ: កាសែតបរទេសឯករាជ្យនានាបានចុះផ្សាយនូវការបដិសេធរបស់ភាគីកម្ពុជាចំពោះភាគីថៃ ដែលបានចោទប្រកាន់ថា កម្ពុជាបានរំលោភបទឈប់បាញ់ ដែលត្រូវបានឯកភាពគ្នា ក្រោមការសម្របសម្រួលដោយសហរដ្ឋអាមេរិក ប្រទេសម៉ាឡេសុី និងប្រទេសចិន។
កាសែត Reuters បានរាយការណ៍ថា ខណៈពេលដែលប្រទេសថៃបានចោទប្រកាន់កម្ពុជាពីការរំលោភលើបទឈប់បាញ់ កម្ពុជាបានបដិសេធការចោទប្រកាន់នេះ ដោយអះអាងថា កងទ័ពរបស់ខ្លួនបានគោរពយ៉ាងម៉ឺងម៉ាត់ចំពោះបទឈប់បាញ់។
កាសែត Reuters បានកត់សម្គាល់ថាបទឈប់បាញ់នៅតែត្រូវបានគោរពជាផ្លូវការ បន្ទាប់ពីមានអន្តរាគមន៍ការទូត ដោយកម្ពុជាបានច្រានចោលការចោទប្រកាន់របស់ភាគីថៃអំពីការរំលោភបទឈប់បាញ់ និងបញ្ជាក់ពីការអនុលោមតាមច្បាប់ពេញលេញ។
កាសែត The Guardian ក៏បានបញ្ជាក់ថា កម្ពុជាបានច្រានចោលការចោទប្រកាន់នេះ ដោយកម្ពុជាអះអាងថា ខ្លួនបានគោរពតាមកិច្ចព្រមព្រៀងនេះ។ បទឈប់បាញ់ត្រូវបានគេចាត់ទុកថា មានភាពផុយស្រួយ។ ទោះជាយ៉ាងណា បទឈប់បាញ់នៅតែអាចរក្សាបានជាធរមាន មកទល់ពេលនេះ។
យោងតាមសារព័ត៌មាន AP បានចុះផ្សាយថា ខណៈបទឈប់បាញ់ត្រូវបានសាកល្បង ហើយប្រទេសថៃបានធ្វើការចោទប្រកាន់ ភាគីទាំង២ បានឯកភាពផ្អាកការចល័តទ័ព និងបញ្ចៀសការកើនឡើងកំដៅនៃភាពតានតឹង។
លោក Sean O’Neill បេក្ខភាពឯកអគ្គរដ្ឋទូតអាមេរិកប្រចាំនៅប្រទេសថៃបានអះអាងថា ជម្លោះព្រំដែនរវាងថៃជាមួយកម្ពុជានាពេលថ្មីៗនេះ មិនមានផលប្រយោជន៍សម្រាប់ប្រជាជនថៃ ឬសម្ព័ន្ធភាពរបស់ប្រទេសថៃជាមួយសហរដ្ឋអាមេរិកនោះទេ។
លោក Sean O’Neill បានលើកឡើងបែបនេះក្នុងព្រឹទ្ធសភាអាមេរិក នៅពេលលោកត្រូវបានគេសាកសួរអំពីការប្រយុទ្ធគ្នាអស់រយៈពេល៥ថ្ងៃរវាងប្រទេសថៃ និងកម្ពុជា។
នៅពេលសាកសួរថា តើលោកនឹងធ្វើដូចម្តេចដើម្បីធានាថា បទឈប់បាញ់នឹងក្លាយជាកិច្ចព្រមព្រៀងសន្តិភាពរយៈពេលវែង លោក O’Neill បានអះអាងថា “ខ្ញុំគិតថា រឿងដំបូងដែលខ្ញុំនឹងធ្វើ គឺខ្ញុំចង្អុលប្រាប់ទៅកាន់ថៃ ដែលជាសម្ព័ន្ធមិត្តរបស់យើងនៅតំបន់អាស៊ីថា សង្រ្គាមបែបនេះ ជម្លោះបែបនេះ មិនមានផលប្រយោជន៍សម្រាប់ប្រជាជនថៃនោះទេ”៕ប្រភព: CNA & The Guardian & Reuters & AP៕
