ដោយ: គង់ លាងហួរ
អន្តរជាតិ: នាយករដ្ឋមន្ត្រីរបស់ប្រទេសម៉ាឡេសុីលោក Anwar Ibrahim បានប្រកាសកាលពីពេលថ្មីៗនេះថា លំនៅដ្ឋានដែលមានតម្លៃសមរម្យសរុបចំនួនមួយលានយូនីតនឹងត្រូវបានសាងសង់ឡើងដោយរដ្ឋាភិបាល អាជ្ញាធររដ្ឋ និងអ្នកអភិវឌ្ឍន៍ឯកជននៅចន្លោះឆ្នាំ២០២៦ និងឆ្នាំ២០៣៥។
គម្រោងខាងលើនេះមានគោលបំណងដើម្បីផ្តល់ឱ្យប្រជាជនម៉ាឡេស៊ីកាន់តែច្រើននូវលទ្ធភាពក្នុងការទទួលបានលំនៅដ្ឋានប្រកបដោយសុវត្ថិភាព និងផាសុកភាព។នេះបើយោងតាមការចុះផ្សាយដោយសារព័ត៌មាន Edgeprop Malaysia។
លោក Anwar ដែលកាន់តំណែងជារដ្ឋមន្ត្រីក្រសួងហិរញ្ញវត្ថុផងនោះ បានគូសបញ្ជាក់ថា គំនិតផ្តួចផ្តើមនេះនឹងត្រូវអនុវត្តតាមរយៈកម្មវិធីជាច្រើនរួមមាន កម្មវិធី Residensi MADANI កម្មវិធីជំនួយសាងសង់ផ្ទះថ្មី កម្មវិធីលំនៅដ្ឋានតម្លៃសមរម្យ និងកម្មវិធីផ្សេងទៀត។
លោក Anwar បានមានប្រសាសន៍ឱ្យដឹងថា “រដ្ឋាភិបាលនៅតែប្តេជ្ញាចិត្តក្នុងការធានានូវលទ្ធភាពទទួលបានលំនៅដ្ឋានប្រកបដោយគុណភាព តម្លៃសមរម្យ និងបរិយាបន្ន ដោយបន្ថែមថា គិតត្រឹមឆ្នាំ២០២៥នេះ លំនៅដ្ឋានចំនួន១៨០.០០០យូនីតត្រូវបានសាងសង់បញ្ចប់រួចរាល់ហើយ”។
ជាមួយគ្នានោះ លំនៅដ្ឋានតម្លៃសមរម្យចំនួន២៣៥.០០០យូនីតផ្សេងទៀតកំពុងត្រូវបានសាងសង់ឡើងជាបន្តបន្ទាប់។
ទោះជាយ៉ាងណា លោក Anwar បានទទួលស្គាល់ថា បញ្ហារចនាសម្ព័ន្ធ ដូចជាភាពមិនស៊ីសង្វាក់គ្នារវាងការផ្គត់ផ្គង់ និងតម្រូវការលំនៅដ្ឋាន ក៏ដូចជាការកើនឡើងនៃតម្លៃអចលនទ្រព្យហួសពីលទ្ធភាពរបស់ប្រជាជនម៉ាឡេសុី នៅតែបន្តបង្កជាបញ្ហាប្រឈម៕ប្រភព: The Edgeprop Malaysia៕
