ដោយៈ គង់ សូរិយា
ភ្នំពេញៈ ក្រុមហ៊ុនអចលនទ្រព្យលំដាប់យក្សរបស់អាមេរិក ដែលមានអាយុកាលជាង១០០ឆ្នាំ COLDWELL BANKER CAMBODIAបានពង្រីកវត្តមានជាថ្មីនៅកម្ពុជា។
អគ្គនាយកក្រុមហ៊ុនCOLDWELL BANKER CAMBODIA លោកKen Lo បានមានប្រសាសន៍ ក្នុងពិធីបើកសម្ភោធសាកល្បងរបស់ក្រុមហ៊ុនខាងលើកាលពីថ្ងៃទី១៨ សីហាកន្លងមកថា ការបន្ឋូរបន្ថយពន្ឋបដិការបស់សហរដ្ឋអាមេរិក មកនៅត្រឹម១៩ភាគរយជាសញ្ញាល្អមួយ ដែលប្រធានាធិបតីលោកដូណាល់ ត្រាំបានផ្តល់ជូនកម្ពុជា គឺជា សញ្ញាល្អមួយសម្រាប់សេដ្ឋកិច្ច និងទាក់ទាញអ្នកវិនិយោគអាមេរិកមកកាន់កម្ពុជាកាន់តែច្រើន។
លោកបន្តថា វត្តមានក្រុមហ៊ុនCOLDWELL BANKER CAMBODIA ជាសញ្ញាល្អសម្រាប់ទីផ្សារនេះ ដោយគិតមកទល់ពេលនេះ ក្រុមហ៊ុននេះបានពង្រីកវត្តមាន រហូតដល់៥០ប្រទេសរួចហើយ មានការិយាល័យជាង៤០០០កន្លែង និងមានភ្នាក់ងារជាង១០ម៉ឺននាក់ នៅទូទាំងពិភពលោក។
លោកKen Loបានបញ្ជាក់ថា “ក្រុមហ៊ុននេះផ្តោតលើទីផ្សារអចលនទ្រព្យបែបប្រណីត និងអចលនទ្រព្យទូទៅ ក្នុងន័យជួយលើកកំពស់ទីផ្សារអចលនទ្រព្យ នៅកម្ពុជាឲ្យកាន់តែរីកចម្រើន និងទាក់ទាញទំនុកចិត្តពីវិនិយោគិនអន្តរជាតិបន្ថែមទៀត”។
លោកបន្តថា ក្រុមហ៊ុនCOLDWELL BANKER CAMBODIAក៏នឹងលក់Franchise សម្រាប់អ្នកចង់ប្រឡូកក្នុងវិស័យនេះ ដោយយើងមានប្រព័ន្ឋការងារ និងការបណ្តុះបណ្តាលស្តង់ដាខ្ពស់ពីអាមេរិក និងភ្ជាប់បណ្តាញទំនាក់ទំនងជាមួយបណ្តាញរបស់ក្រុមហ៊ុននេះ នៅទូទាំងពិភពលោក ដល់អ្នកទិញFranchiseផងដែរ។
ជាមួយគ្នានេះ លោកឧកញ៉ាចេង ខេងអគ្គនាយកក្រុមហ៊ុនCPL ដែលបានចូលរួមជាកិត្តិយស ក្នុងកម្មវិធីនោះផងដែរបានមានប្រសាសន៍ថា វាជាក្រុមហ៊ុនមួយធំ និងមានអាយុកាលជាង១០០ឆ្នាំ ពិតជាក្រុមហ៊ុនល្អមួយ ដែលបានពង្រីកវត្តមាននៅកម្ពុជា។
លោកបញ្ជាក់ថា “យើងអាចធ្វើការរួមគ្នា និងរីកចម្រើនជាមួយគ្នា ព្រោះទម្រាំមកដល់ថ្ងៃនេះ ពួកយើងបានឆ្លងកាត់ឧបសគ្គច្រើនណាស់”។
ប្រធានសមាគមអ្នកវាតម្លៃ និងភ្នាក់ងារអចលនវត្ថុកម្ពុជា លោកឧកញ៉ាសន សៀបបានមានប្រសាសន៍ថា ការបង្ហាញវត្តមាននៅកម្ពុជា របស់ក្រុមហ៊ុននេះ ជាសញ្ញាល្អមួយសម្រាប់ទីផ្សារ ហើយយើងនឹងបន្តរួមគ្នាឆ្ពោះទៅមុខ ដើម្បីលើកកំពស់វិស័យនេះ ឲ្យកាន់តែមានភាពរីកចម្រើន និងទាក់ទាញអ្នកវិនិយោគក្នុងវិស័យនេះឲ្យបានកាន់តែច្រើន។
ក្រុមហ៊ុនCOLDWELL BANKER CAMBODIAមានការិយាល័យនៅជាន់ទី២៥ ក្នុងអាគារប្រណីតMorgan Tower នៃទីក្រុងកោះពេជ្រ រាជធានីភ្នំពេញ៕
