តើសេដ្ឋកិច្ចរបស់បណ្តាប្រទេសមហាអំណាចធំៗទាំង៥ របស់ពិភពលោកនឹងសម្រេចបានទំហំទឹកប្រាក់ចំនួនប៉ុន្មាននៅឆ្នាំនេះ?

ដោយ: គង់ លាងហួរ
អន្តរជាតិ: ក្រុមហ៊ុនប្រឹក្សាផ្នែកហិរញ្ញវត្ថុខ្នាតយក្ស Ernst & Young (EY) បានចេញផ្សាយរបាយការណ៍ព្យាករណ៍អំពីទំហំសេដ្ឋកិច្ចរបស់បណ្តាប្រទេសមហាអំណាចលើពិភពលោក ដូចជា សហរដ្ឋអាមេរិក ប្រទេសចិន ឥណ្ឌា អាល្លឺម៉ង់ និងប្រទេសជប៉ុននៅឆ្នាំ២០២៥នេះ រហូតដល់ឆ្នាំ២០៣០ខាងមុខ។

តួយ៉ាង សេដ្ឋកិច្ចរបស់សហរដ្ឋអាមេរិកអាចកើនឡើងដល់ទំហំទឹកប្រាក់ចំនួន៣០,៥ទ្រីលានដុល្លារអាមេរិកនៅឆ្នាំ២០២៥នេះ មុនពេលកើនឡើងដល់ចំនួន៣៧,២ទ្រីលានដុល្លារនៅឆ្នាំ២០៣០ បើគិតតាមអត្រាប្តូរប្រាក់លើទីផ្សារ(Market Exchange Rate)។

នៅឆ្នាំ២០២៥ ផលទុនជាតិសរុប(GDP)របស់ប្រទេសចិនត្រូវបានព្យាករណ៍ថា នឹងហក់ឡើងដល់ទំហំទឹកប្រាក់ចំនួន១៩,២ទ្រីលានដុល្លារ និងបន្តហក់ឡើងដល់ចំនួន២៥,៨ទ្រីលានដុល្លារអាមេរិកក្នុងឆ្នាំ២០៣០ខាងមុខ។

ជាមួយគ្នានេះ សេដ្ឋកិច្ចរបស់ប្រទេសឥណ្ឌាត្រូវបានគេរំពឹងថា នឹងហក់ឡើងដល់ទំហំទឹកប្រាក់ចំនួន៤,១៩ទ្រីលានដុល្លារនៅឆ្នាំ២០២៥ មុនពេលហក់ឡើងដល់ចំនួន៦,៧៧ទ្រីលានដុល្លារនៅឆ្នាំ២០៣០។

ចំណែក សេដ្ឋកិច្ចរបស់ប្រទេសអាល្លឺម៉ង់ ដែលជាប្រទេសមានសេដ្ឋកិច្ចធំជាងគេនៅសហភាពអឺរ៉ុប (EU) ត្រូវបានគេរំពឹងថា នឹងហក់ឡើងដល់ទំហំទឹកប្រាក់ចំនួន៤,៧៤ទ្រីលានដុល្លារនៅឆ្នាំនេះ និងបន្តហក់ឡើងដល់ចំនួន៥,៥៨ទ្រីលានដុល្លារនៅឆ្នាំ២០៣០។

រីឯ សេដ្ឋកិច្ចរបស់ប្រទេសជប៉ុន ដែលជាមហាអំណាចមួយនៅតំបន់អាសុីត្រូវបានគេព្យាករណ៍ថា នឹងហក់ឡើងដល់ទំហំទឹកប្រាក់ចំនួន៤,២ទ្រីលានដុល្លារនៅឆ្នាំ២០២៥ មុនពេលហក់ឡើងដល់ចំនួន៥ទ្រីលានដុល្លារនៅឆ្នាំ២០៣០៕ប្រភព:Ernst & Young៕