ដោយ: គង់ លាងហួរ
អន្តរជាតិ: គម្រោងអគារខ្ពស់កប់ពពក The Torch ដែលមានកំពស់ជាង៣២៥ម៉ែត្រ ស្ថិតនៅលើផ្លូវ 740 Eighth Avenue ក្នុងសង្កាត់ Manhattan នៃទីក្រុងញូវយ៉ករបស់សហរដ្ឋអាមេរិកកំពុងចាប់ផ្តើមដំណើរការសាងសង់ឡើងវិញ ក្រោយពីបានផ្អាកមួយរយៈពេលខ្លី។
អគារនេះត្រូវបានរចនាឡើងដោយក្រុមហ៊ុនស្ថាបត្យកម្ម ODA និងត្រូវបានអភិវឌ្ឍន៍ដោយក្រុមហ៊ុនអចលនទ្រព្យអាមេរិក Extell។ អគារកប់ពពក The Torch នឹងរួមមានសណ្ឋាគារចំនួន៨២៥បន្ទប់ កន្លែងសង្កេតការណ៍សាធារណៈ ហាងលក់រាយ ភោជនីយដ្ឋាន កន្លែងទទួលភ្ញៀវ VIP និងអាងហែលទឹក។
ការងារចាក់គ្រឹះក្រោមដីត្រូវបានបញ្ចប់រួចរាល់ ខណៈដែលពេលនេះការងារសាងសង់ និងការចាក់បេតុងបានបន្តបោះជំហានទៅមុខ។ ជាមួយគ្នានេះ ល្បឿននៃការសាងសង់អគារ The Torch ត្រូវបានគេរំពឹងថា នឹងចាប់ផ្តើមកើនឡើងក្នុងរយៈពេលប៉ុន្មានខែខាងមុខ។
យោងតាមក្រុមហ៊ុនស្ថាបត្យកម្ម ODA បានឱ្យដឹងថា ប៉មកំពស់៥០០ហ្វីត(ប្រមាណ១៥២,៤ម៉ែត្រ) របស់អគារនេះ ត្រូវបានរចនាឡើង ដោយយកលំនាំស្រដៀងទៅនឹង រូបសំណាកសេរីភាពដ៏ល្បីល្បាញក្នុងទីក្រុងញូវយ៉ក។
កន្លែងសង្កេតការណ៍ (Observatory) របស់អគារកប់ពពក The Torch នឹងមានជណ្ដើរថ្មើរជើង និងប្រអប់ជណ្តើរយន្តធ្វើអំពីកញ្ចក់ថ្លា ដែលអាចឱ្យអ្នកទស្សនាមើលចុះក្រោមទៅកាន់តំបន់ Midtown ក្នុងសង្កាត់ Manhattan និងទន្លេ Hudson។
ជាមួយគ្នានេះ ទីតាំងសម្រាប់អង្គុយមើលទេសភាពនឹងត្រូវបានរៀបចំឡើងនៅកន្លែងសង្កេតការណ៍ ដែលផ្តល់លទ្ធភាពឱ្យអ្នកទស្សនាអាចមើលឃើញទិដ្ឋភាពតំបន់ Midtown ពីលើអាកាស និងសួន Central Park ដ៏ធំនៅទីក្រុងញូវយ៉ក៕ប្រភព: New York Yimby៕
