ដោយ: គង់ លាងហួរ
អន្តរជាតិ: យោងតាមការសិក្សាថ្មីចុងក្រោយបង្អស់មួយបានបង្ហាញថា ចំនួនជិត៥០ភាគរយនៃអាផាតមុិនរបស់ជនបរទេសសរុបទាំងអស់ក្នុងរដ្ឋធានីសេអ៊ូលរបស់ប្រទេសកូរ៉េខាងត្បូង ត្រូវបានកាន់កាប់ដោយជនជាតិអាមេរិក។
យោងតាមក្រុមប្រឹក្សាភិបាលអចលនទ្រព្យកូរ៉េ បានឱ្យដឹងថា ជនជាតិអាមេរិកបានកាន់កាប់អាផាតមុិនចំនួន៥.៦៧៨យូនីតនៅក្នុងរដ្ឋធានីសេអ៊ូលកាលពីឆ្នាំមុន។ តួលេខនេះបានគ្របដណ្តប់ចំណែក៤៥ភាគរយនៃចំនួនអាផាតមុិនសរុបប្រមាណ១២.៥១៦យូនីតរបស់ជនបរទេស។
ជនជាតិអាមេរិកភាគច្រើនបានសម្រុកទិញអាផាតមុិននៅតាមសង្កាត់ធំៗ ក្នុងរដ្ឋធានីសេអ៊ូល ដូចជា សង្កាត់ Gangnam-gu សង្កាត់ Seocho-gu និងសង្កាត់ Songpa-gu។នេះបើយោងតាមការដកស្រង់ចុះផ្សាយដោយកាសែត The Korea Herald។
ចំណែក ជនជាតិចិនបានឈរនៅលេខរៀងទី២ ដោយបានកាន់កាន់អាផាតមុិនសរុបចំនួន២.៥៣៦យូនីតនៅរដ្ឋធានីសេអ៊ូល។ ក្នុងនោះ ជនជាតិចិនភាគច្រើនទិញអាផាតមុិននៅតំបន់សហគមន៍ចិនស្ថិតនៅភាគនិរតីនៃរដ្ឋធានីសេអ៊ូល។
ដោយឡែក ជនជាតិកាណាដាបានកាន់កាប់អាផាតមុិនចំនួន១.៨៣១យូនីត ខណៈប្រជាជនមកពីកោះតៃវ៉ាន់បានកាន់កាប់អាផាតមុិនចំនួន៧៩០យូនីត ហើយជនជាតិអូស្ត្រាលីបានកាន់កាប់អាផាតមុិនចំនួន៥០០យូនីតនៅទីក្រុងសេអ៊ូល៕ប្រភព: Vnexpress៕
