តើតម្លៃហាងឆេងមាសប្រែប្រួលដូចម្តេចនៅថ្ងៃចន្ទនេះ ខណៈកិច្ចប្រជុំរបស់ធនាគារកណ្តាលអាមេរិកខិតជិតមកដល់?

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃចន្ទដើមសប្តាហ៍នេះ ខណៈការធ្លាក់ចុះនៃទីផ្សារការងារនៅសហរដ្ឋអាមេរិកនឹងជំរុញឱ្យធនាគារកណ្តាលអាមេរិកទាញទម្លាក់អត្រាការប្រាក់ក្នុងកិច្ចប្រជុំគោលនយោបាយរបស់ខ្លួននៅក្នុងសប្តាហ៍នេះ។

តួយ៉ាង តម្លៃមាស Spot Gold បានងើបឡើង០,០៥ភាគរយមកនៅត្រឹម៣៦៤៤,៥៧ដុល្លារក្នុងមួយអោន បន្ទាប់ពីបានបិទការជួញដូរត្រឹមទំហំទឹកប្រាក់ប្រមាណ៣៦៤២,៦៣ដុល្លារក្នុងមួយអោនកាលពីថ្ងៃសុក្រសប្តាហ៍មុន។

ទោះជាយ៉ាងណា តម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,១៥ភាគរយមកនៅត្រឹម៣៦៨០,៧០ដុល្លារក្នុងមួយអោនគិតត្រឹមម៉ោង៩:៣៦នាទីព្រឹកដូចគ្នា។

យោងតាមគេហទំព័រ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៦,៤ភាគរយ ដែលធនាគារកណ្តាលអាមេរិក (Fed) នឹងកាត់បន្ថយអត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៧ ខែកញ្ញា។

ចំណែក សន្ទស្សន៍ប្រាក់ដុល្លារ ដែលវាស់វែងប្រាក់ដុល្លារអាមេរិកធៀបនឹងរូបិយបណ្ណសំខាន់ៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់៩៧,៦៣ពិន្ទុនៅព្រឹកថ្ងៃចន្ទនេះ ក្រោយពេលបានបិទការជួញដូរត្រឹម៩៧,៥៥ពិន្ទុកាលពីថ្ងៃសុក្រសប្តាហ៍មុន៕