ដោយ: សហសេវិក
អន្តរជាតិ: ប្រធានាធិបតីកូរ៉េខាងត្បូងលោក Lee Jae-myung បានព្រមានថា ពពុះទីផ្សារអចលនទ្រព្យរបស់ប្រទេសនេះកំពុងស្ថិតក្នុងដំណាក់កាលជិតផ្ទុះបែក ខណៈលោកបានគាំទ្រការសម្រេចចិត្តរបស់ធនាគារកណ្តាលកូរ៉េ (BOK) ក្នុងការរក្សាអត្រាការប្រាក់ឱ្យនៅថេរកាលពីសប្តាហ៍មុន។
លោក Lee បានព្រមានថា ប្រសិនបើធនាគារកណ្តាលកូរ៉េកាត់បន្ថយអត្រាការប្រាក់ នោះតម្លៃលំនៅដ្ឋាននឹងហក់ឡើងបន្ថែមទៀត។ លោកបានសង្កត់ធ្ងន់លើភាពចាំបាច់ក្នុងការបញ្ចៀសការជាប់គាំងសេដ្ឋកិច្ចរយៈពេលវែងដូចប្រទេសជប៉ុន បន្ទាប់ពីពពុះទីផ្សារអចលនទ្រព្យជប៉ុនផ្ទុះបែកក្នុងអំឡុងទសវត្សរ៍ឆ្នាំ១៩៩០។
កាលពីថ្ងៃទី២៣ ខែតុលា ធនាគារកណ្តាលកូរ៉េខាងត្បូង (BOK) បានរក្សាទុកអត្រាការប្រាក់របស់ខ្លួនឱ្យនៅថេរត្រឹម២,៥ភាគរយក្នុងកិច្ចប្រជុំចំនួន៣លើកជាប់ៗគ្នា។
-->
ការសម្រេចចិត្តនេះធ្វើឡើងស្របតាមការរំពឹងទុករបស់ទីផ្សារ ដោយថ្លឹងថ្លែងពីការហក់ឡើងយ៉ាងគំហុកនៃតម្លៃអចលនទ្រព្យ ហានិភ័យទីផ្សាររូបិយបណ្ណ និងភាពមិនប្រាកដប្រជាជុំវិញការចរចាពន្ធគយជាមួយសហរដ្ឋអាមេរិក។
លោក Lee បានព្រមានថា ការបញ្ចុះអត្រាការប្រាក់អាចជះផលប៉ះពាល់ដល់សេដ្ឋកិច្ច ដែលក្នងនោះ ទីផ្សារអចលនទ្រព្យជាប្រភពបង្កអស្ថិរភាពជាយូរមកហើយ។
ទីផ្សារអចលនទ្រព្យជាគោលដៅវិនិយោគដ៏ពេញនិយមសម្រាប់បណ្តាអ្នកវិនិយោគ។នៅពេលតម្លៃអចលនទ្រព្យហក់ឡើងខ្ពស់កប់ពពក គ្រួសារជាច្រើនមិនមានលទ្ធភាពគ្រប់គ្រាន់ដើម្បីទិញផ្ទះ និងធ្វើឱ្យពលរដ្ឋជំពាក់បំណុលច្រើន។
តម្លៃអាផាតមុិននៅទីក្រុងសេអ៊ូលបានកើនឡើងរយៈពេល៣៨សប្តាហ៍ជាប់ៗគ្នាគិតត្រឹមថ្ងៃទី២០ ខែតុលា ទោះជារដ្ឋបាលរបស់លោក Lee បានដាក់ចេញវិធានការនានាដើម្បីទប់ស្កាត់យ៉ាងណាក្តី។ វិធានការទាំងនោះ រួមមានដូចជា ការដាក់កាតព្វកិច្ចឱ្យជនបរទេសត្រូវស្នើសុំការអនុម័តពីអាជ្ញាធរមូលដ្ឋាន មុនពេលទិញផ្ទះ និងការកំណត់ទំហំប្រាក់កម្ចីអតិបរមា អាស្រ័យលើតម្លៃផ្ទះ។
អ្នកទិញផ្ទះ ដែលមានតម្លៃចាប់ពី១,៥ពាន់លានវ៉ុនចុះក្រោម មានសិទ្ធិទទួលបានប្រាក់កម្ចីអតិបរមាត្រឹម៦០០លានវ៉ុន ខណៈអ្នកទិញផ្ទះ ដែលមានតម្លៃចាប់ពី១,៥ពាន់លានវ៉ុនទៅ២,៥ពាន់លានវ៉ុន មានសិទ្ធិទទួលបានប្រាក់កម្ចីអតិបរមាត្រឹម៤០០លានវ៉ុន។
ចំណែក អ្នកទិញផ្ទះ ដែលមានតម្លៃលើសពី២,៥ពាន់លានវ៉ុន មានសិទ្ធិទទួលបានប្រាក់កម្ចីអតិបរមាត្រឹម២០០លានវ៉ុន។ វិធានការទាំងនេះមានគោលបំណងទប់ស្កាត់ការទិញផ្ទះក្នុងគោលដៅវិនិយោគ(speculation)។
លោក Lee បានលើកឡើងថា ប្រសិនបើនិន្នាការនេះនៅតែបន្ត ពពុះអចលនទ្រព្យនឹងផ្ទុះបែកជាមិនខាន។នៅពេលរឿងនោះកើតឡើង យើងនឹងប្រឈមមុខនឹងវិបត្តិធ្ងន់ធ្ងរមិនត្រឹមតែផ្នែកសេដ្ឋកិច្ចប៉ុណ្ណោះទេ ប៉ុន្តែនៅគ្រប់វិស័យទាំងអស់។ យើងត្រូវទប់ស្កាត់កុំឱ្យរឿងនោះកើតឡើង៕ប្រភព: Bloomberg៕
 ក្នុងការរក្សាអត្រាការប្រាក់ឱ្យនៅថេរកាលពីសប្តាហ៍មុន។){kind=link}