ដោយ វុត្ថា
ភ្នំពេញ៖ ក្រសួងប្រៃសណីយ៍និងទូរគមនាគមន៍បានអះអាងថា សេដ្ឋកិច្ចឌីជីថលនៅប្រទេសកម្ពុជា បាននឹងកំពុងលេចរូបរាងជាបណ្តើរៗ ដូចជាការប្រើប្រាស់ការទូទាត់ឌីជីថល ការកើនឡើងនៃសកម្មភាពកំសាន្តតាមអនឡាញ សកម្មភាពពាណិជ្ជកម្មអេឡិកត្រូនិកជាដើម។
ក្នុងពិធីចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការលើវិស័យទូរគមនាគមន៍ បច្ចេកវិទ្យាគមនាគមន៍និងព័ត៌មាន រវាងក្រសួងប្រៃសណីយ៍និងទូរគមនាគមន៍ និងក្រុមហ៊ុនរ៉ូយ៉ាល់គ្រុប កាលពីថ្ងៃទី ៦ ខែឧសភា ឆ្នាំ ២០១៩ ម្សិលមិញនេះ លោក ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានឲ្យដឹងថា រាជរដ្ឋាភិបាលកម្ពុជានីតិកាលទី៦ នៃរដ្ឋសភាបានចាត់ទុកការអភិវឌ្ឍវិស័យប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន ព្រមទាំងការអភិវឌ្ឍបច្ចេកវិទ្យាឌីជីថល ជាវិស័យអាទិភាពមួយយ៉ាងសំខាន់ សម្រាប់ការអភិវឌ្ឍជាតិដូចដែលបានកំណត់នៅក្នុងយុទ្ធសាស្ត្រដំណាក់កាលទី៤។
លោករដ្ឋមន្ត្រីបន្តថា ទោះបីនៅពេលនេះកម្ពុជា ស្ថិតនៅក្នុងដំណាក់កាលកំពុងអភិវឌ្ឍន៍ក៏ដោយ ប្រទេសកម្ពុជា គឺជាប្រទេសមួយដែលមានសក្តានុពលខ្ពស់ក្នុងការក្តាប់យកនូវកាលានុវត្តភាពពីបដិវត្ដន៍ឧស្សាហកម្មជំនាន់ទី៤.០ និងបច្ចេកវិទ្យាឌីជីថល ដោយឈរលើមូលដ្ឋានមួយចំនួនដូចជា៖ ភាពអំណោយផលផ្នែកប្រជាសាស្ត្រ ដោយសារវត្តមាននៃចំនួនយុវជនដ៏ច្រើនមានការអប់រំខ្ពស់ និងងាយទទួលយកនូវបច្ចេកវិទ្យាឌីជីថលយ៉ាងឆាប់រហ័ស, ការកើនឡើងយ៉ាងឆាប់រហ័សនៃការប្រើប្រាស់ទូរសព្ទដៃ និងឧបករណ៍ឆ្លាតវៃ, ការរីកចម្រើនយ៉ាងឆាប់រហ័សនៃបច្ចេកវិទ្យាតាមរយៈនៃការវិនិយោគផ្ទាល់ពីបរទេស, និងឌីជីថលភាវូបនីយកម្មដែលកំពុងជៈឥទ្ធិពលជាវិជ្ជមាន នៅក្នុងគ្រប់វិស័យសំខាន់ៗនៃសេដ្ឋកិច្ចជាតិ។
