ដោយៈ និស្ស័យ
ភ្នំពេញៈ ស្របពេលប្រទេសថៃបិទច្រកសមុទ្រជាមួយកម្ពុជា អ្នកនាំពាក្យក្រសួងសាធារណការ និងដឹកជញ្ជូន លោក ផន រឹម បានលើកឡើងថា កម្ពុជាមានច្រកដឹកទំនិញសមុទ្រចម្រុះ និងប្រទាក់ក្រឡាដែលមានសក្តានុពល និងធានាបាននូវឯករាជ្យភាព និងម្ចាស់ការលើគ្រប់ទម្រង់ស្របតាមច្បាប់ និងវិធានអន្តរជាតិផងដែរ។
ការឆ្លើយតបរបស់កម្ពុជា បានធ្វើឡើងបន្ទាប់ពីយោធាថៃបានចេញបញ្ជាឱ្យបិទឈូងសមុទ្រថៃ ដោយលើកហេតុផលថា ដើម្បីស្ទាក់ចាប់ប្រេង និងសម្ភារយោធាដែលកំពុងដឹកជញ្ជូន ចូលមកក្នុងប្រទេសកម្ពុជានាពេលនេះ។
អ្នកនាំពាក្យក្រសួងក្រសួងសាធារណការ និងដឹកជញ្ជូន លោក ផន រឹម កាលពីព្រឹកថ្ងៃទី១៥ ខែធ្នូបានសរសេរនៅលើបណ្តាញសង្គមផ្ទាល់ខ្លួនថា ប៉ុន្មានថ្ងៃមកនេះឃើញកាសែតថៃ ដកស្រង់សំដីមន្ត្រីជាន់ខ្ពស់ថៃពាក់ព័ន្ធការព្រមានបិទ រាំងខ្ទប់ដំណើរនាវាចរដឹកទំនិញតាមផ្លូវសមុទ្រឆ្លងកាត់ឈូងសមុទ្រថៃ ចូលមកកាន់ប្រទេសកម្ពុជា ដោយពួកទាំងនោះយកលេសផ្សេងៗ មកមកសំអាងក្នុងគោលដៅចិញ្ចឹមមហិច្ឆតាឈ្លានពាន បង្កសង្គ្រាម និងពង្រីកជម្លោះជាមួយកម្ពុជា។
លោកបានអះអាងថា “កម្ពុជាមិនមែនក្មេងបៀមដៃ។ កម្ពុជាបានគិតគូររឿងនេះ និងបានត្រៀមលក្ខណៈរួចរាល់ ឆ្លើយតបគ្រប់ទម្រង់ចំពោះមហិច្ឆតាបង្កសង្គ្រាមពង្រីកទំនាស់របស់ថៃ”។ លោកបន្ថែមថា “កម្ពុជាមានច្រកដឹកទំនិញសមុទ្រចម្រុះ និងប្រទាក់ក្រឡាដែលមានសក្តានុពល និងធានាបាននូវឯករាជ្យភាព និងម្ចាស់ការលើគ្រប់ទម្រង់ស្របតាមច្បាប់ និងវិធានអន្តរជាតិ”។
ទីបញ្ជាការកងយោធាភូមិន្ទថៃកាលពីពេលថ្មីៗនេះ បានស្នើឱ្យក្រុមប្រឹក្សាសន្តិសុខជាតិ(NSC) ទប់ស្កាត់ការផ្គត់ផ្គង់ប្រេង និងយោធាមកកាន់ប្រទេសកម្ពុជា តាមរយៈឈូងសមុទ្រថៃ ចំពេលមានអារិភាពជាបន្តបន្ទាប់ជាមួយកម្ពុជា។
លិខិតបន្ទាន់មួយពីប្រមុខ កងកម្លាំងប្រដាប់អាវុធថៃដែលចែកចាយកាលពីថ្ងៃអាទិត្យ បានបង្ហាញពីសំណើសុំឱ្យក្រសួងការពារជាតិថៃ ដាក់សំណើជាបន្ទាន់ទៅកាន់ NSC ដើម្បីបិទឈូងសមុទ្រចំពោះការផ្គត់ផ្គង់ប្រេង និងសង្គ្រាមដែលមានគោលដៅមកប្រទេសកម្ពុជា។
យោងតាមសំណើនេះ NSC នឹងបញ្ជាឱ្យមជ្ឈមណ្ឌលបញ្ជាការអនុវត្តច្បាប់សមុទ្រថៃ (Thai-MECC) ស្ទាក់ចាប់ និងទប់ស្កាត់ការផ្គត់ផ្គង់ប្រេង និងទំនិញដែលដឹកជញ្ជូន ដោយនាវាទាំងអស់រួមទាំងនាវាពាណិជ្ជកម្ម និងទូកនេសាទ ដែលចាកចេញពីដែនទឹកថៃមកប្រទេសកម្ពុជា។
លោក Panupan Rakkaew អ្នកសម្របសម្រួលនៅ Thai-MECC បាននិយាយថា មជ្ឈមណ្ឌលនេះ បានរៀបចំបទបញ្ជាពាក់ព័ន្ធរួចហើយដើម្បីអនុវត្តការបិទផ្លូវផ្គត់ផ្គង់។ លោកបន្ថែមថា NSC អាចចេញបទបញ្ជាបែបនេះ ក្រោមច្បាប់ការពារផលប្រយោជន៍ជាតិសមុទ្រ។
អ្នកនាំពាក្យរងនៃកងទ័ពជើងទឹកភូមិន្ទថៃ លោក Nara Khunthom បាននិយាយថា NSC នឹងមានកិច្ចប្រជុំ និងពិភាក្សាបញ្ហានេះនៅក្នុងថ្ងៃចន្ទម្សិលម៉ិញនេះ៕
