ដោយៈ គង់ សូរិយា
ភ្នំពេញៈ ទំនុកចិត្តវិនិយោគិនបរទេស បានធ្វើឲ្យមុខមាត់រាជធានីភ្នំពេញ បាននិងកំពុងផ្លាស់ប្តូរជាមួយនឹងវត្តមាន អាគារកប់ពពកកំពស់ជិត២៥០ម៉ែត្រ បាននិងកំពុងលេចឡើងបន្ថែមទៀត។
មជ្ឈមណ្ឌលពាណិជ្ជកម្មចម្រុះ រួមមានសណ្ឋាគារថ្នាក់ផ្កាយ ៥ KBX Universal Financial Center កម្ពស់២៤៩,៨០ ស្មើនឹង៥២ជាន់ និងមួយអគារទៀតកម្ពស់៨០,៧០ ស្មើនឹង១៩ជាន់ ជាអគារចំណតយានយន្ត ដែលជាការវិនិយោគរបស់ក្រុមហ៊ុន K.B.X Investment Co.,Ltd។
គំរោងនេះ បានអនុម័តដោយក្រុមប្រឹក្សាអភិវឌ្ឍន៍កម្ពុជា (CDC) កាលពីឆ្នាំ២០២២ វិនិយោគក្នុងទឹកប្រាក់សាងសង់ប្រមាណ១៣០លានដុល្លារ មានបន្ទប់សរុបប្រមាណ៤៤៣បន្ទប់។ ខុនដូ១២០យូនីត និងមាន៤ភូមិគ្រឹះ។
នៅពេលបញ្ចប់ការសាងសង់រួចរាល់ទាំងស្រុង អាចបង្កើតការងារយ៉ាងតិច៧៣០កន្លែងដល់ប្រជាពលរដ្ឋ។
មជ្ឈមណ្ឌលពាណិជ្ជកម្មនេះ មានទីតាំងអភិវឌ្ឍន៍ស្ថិតលើផ្លូវមហាវិថីព្រះមុនីវង្ស សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ។
យោងតាមតួលេខចុងក្រោយរបស់ក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា រាជធានីភ្នំពេញមានអាគារកំពស់ចាប់ពី៥ជាន់ ដល់៦០ជាន់ចំនួនប្រមាណ១៨០០អាគារ៕
