ដោយ: សហសេវិក
អន្តរជាតិ: ទីផ្សារអចលនទ្រព្យនៅប្រទេសវៀតណាមបានឈានចូលដល់ផ្នែកអចលនទ្រព្យប្រណីតកម្រិតកំពូលដោយមានភូមិគ្រឹះធំៗ ត្រូវបានជួលក្នុងតម្លៃ២៥.០០០ដុល្លារអាមេរិកក្នុងមួយយប់។
រមណីយដ្ឋាន Amanoi ក្នុងឈូងសមុទ្រ Vinh Hy ក្នុងខេត្ត Khanh Hoa ភាគកណ្តាលនៃប្រទេសវៀតណាម បានទាក់ទាញចំណាប់អារម្មណ៍យ៉ាងខ្លាំង ខណៈការជួលវីឡាដែលមានបន្ទប់គេង៣ និងមានទំហំ៩២៥ម៉ែត្រការ៉េ មានតម្លៃ១៥.០០០ដុល្លារក្នុងមួយយប់។
ភ្ញៀវត្រូវកក់ការស្នាក់នៅយ៉ាងហោចណាស់៣យប់។ លំនៅឋានឯកជននេះ រួមមានអាងហែលទឹកចំនួនពីរ ស្ប៉ា បន្ទប់ទទួលភ្ញៀវ បន្ទប់បរិភោគអាហារ ឆ្នេរឯកជន និងអ្នកបម្រើចំនួន២នាក់ ដែលមានវត្តមាន២៤ម៉ោង។
-->
ជាមួយគ្នានេះ រមណីយដ្ឋាន Vias Resort Van Phong Peninsula ក្នុងខេត្ត Khanh Hoa បានបើកដំណើរការរមណីយដ្ឋានកោះឯកជនលំដាប់ផ្កាយ៥ ដោយផ្តោតលើការទាក់ទាញក្រុមអ្នកមានទ្រព្យសម្បត្តិស្តុកស្តម្ភ។
ការជួលលំនៅឋាននៅរមណីយដ្ឋានខាងលើមានតម្លៃចាប់ពី១០.០០០ដុល្លារក្នុងមួយយប់ រហូតដល់២៥.០០០ដុល្លារក្នុងមួយយប់។នេះបើយោងតាមការដកស្រង់ចុះផ្សាយដោយកាសែត Vnexpress។
លំហូរភ្ញៀវទេសចរអន្តរជាតិជាកត្តាជំរុញដ៏សំខាន់មួយ។ ក្នុងរយៈពេល១១ខែដំបូងនៃឆ្នាំ២០២៥ ចំនួនភ្ញៀវទេសចរអន្តរជាតិមកកាន់ប្រទេសវៀតណាមបានកើនឡើងដល់កំណត់ត្រា១៩,១៥លាននាក់ ហើយពិធីមង្គលការរបស់មហាសេដ្ឋីជាច្រើនក៏ត្រូវបានធ្វើឡើងនៅតាមរមណីយដ្ឋាននានាក្នុងប្រទេសវៀតណាមផងដែរ៕ប្រភព: Vnexpress៕
