ដោយ: សហសេវិក
អន្តរជាតិ: អគារការិយាល័យចាស់ៗនៅតំបន់ Klang Valley របស់ម៉ាឡេសុីកំពុងប្រឈមមុខនឹងការជួសជុលឡើងវិញ ឬការប្រើប្រាស់ក្នុងគោលបំណងផ្សេង ខណៈស្ថានភាពទីផ្សារការិយាល័យជារួមមិនទាន់មានភាពរឹងមាំនៅឆ្នាំ២០២៦នេះ។
យោងតាមក្រុមហ៊ុនប្រឹក្សាយោបល់អចលនទ្រព្យ CBRE បានអះអាងថា អត្រាគ្របដណ្តប់ការជួលការិយាល័យជាមធ្យមនៅតំបន់ខាងលើស្ថិតក្នុងរង្វង់៧៩,២ភាគរយនៅឆ្នាំ២០២៥ ដែលឆ្លុះបញ្ចាំងពីការថយចុះនៃតម្រូវការ។
តម្រូវការការិយាល័យចាស់ៗនៅតែបន្តធ្លាក់ចុះ ដោយសារអ្នកជួលចូលចិត្តអគារលំដាប់ខ្ពស់ថ្មីទំនើបៗ និងអាចសន្សំសំចៃការប្រើប្រាស់ថាមពល និងស្ថិតនៅក្នុងទីតាំងដែលមានការតភ្ជាប់ហេដ្ឋារចនាសម្ព័ន្ធល្អប្រសើរ។
-->
ទោះបីជាតម្លៃជួលការិយាល័យលំដាប់ខ្ពស់បានកើនឡើងប្រហែល៤ភាគរយយ៉ាងណាក្តី ក៏ប៉ុន្តែអគារចាស់ៗនៅតែបន្តស្ថិតនៅក្រោមសម្ពាធ។
លោកស្រី Mary Kurien នាយិកាផ្នែកស្រាវជ្រាវ និងប្រឹក្សាយោបលនៅក្រុមហ៊ុន CBRE Malaysia បានលើកឡើងថា ជាលទ្ធផល អគារការិយាល័យចាស់ៗអាចនឹងត្រូវបានប្រើប្រាស់ក្នុងគោលបំណងផ្សេង ដូចជាការបំលែងការិយាល័យទៅជាសណ្ឋាគារ។
ខណៈទំហំការិយាល័យថ្មីជាង៥លានហ្វីតការ៉េ រំពឹងថា នឹងបញ្ចប់ការសាងសង់នៅឆ្នាំ២០២៦ ក្រុមហ៊ុន CBRE វាយតម្លៃថា ការប្រកួតប្រជែងនឹងកើនឡើងកាន់តែខ្លាំងឡើង និងធ្វើឱ្យស្តុកការិយាល័យចាស់ៗពិបាកប្រកួតប្រជែង។
ជាក់ស្តែង អគារ Wisma KFC ត្រូវបានបំលែងទៅជាសណ្ឋាគារ Hyatt Centric Kuala Lumpur ខណៈអគារ Wisma Lirava ត្រូវបានបំលែងទៅជាសណ្ឋាគារប៊ូទិក Else Kuala Lumpur៕ប្រភព: Edgeprop៕
