ទីផ្សារអចលនទ្រព្យពាណិជ្ជកម្មរបស់ហុងកុងរំពឹងស្ទុះងើបឡើងវិញ ខណៈការវិនិយោគហូរចូលយ៉ាងគំហុក

ដោយ: សហសេវិក
អន្តរជាតិ: យោងតាមក្រុមហ៊ុនប្រឹក្សាអចលនទ្រព្យ Colliers បានឱ្យដឹងថា កំណើននៃការវិនិយោគរបស់បណ្តាអ្នកវិនិយោគចិនដីគោកនឹងជំរុញឱ្យទីផ្សារអចលនទ្រព្យពាណិជ្ជកម្មរបស់ទីក្រុងហុងកុងងើបឡើងវិញនៅក្នុងឆ្នាំ២០២៦។

ក្រុមហ៊ុន Colliers បានបន្តថា លំហូរទុនវិនិយោគពីអ្នកវិនិយោគចិនដីគោកបានកើនឡើងដល់កម្រិតខ្ពស់បំផុតក្នុងរយៈពេល៥ឆ្នាំនៅត្រីមាសទី៤ ឆ្នាំ២០២៥ ហើយទំហំកិច្ចព្រមព្រៀងនៅឆ្នាំ២០២៦ អាចនឹងកើនឡើង១០ភាគរយ។

ដោយឡែក ចំពោះផ្នែកលំនៅឋានប្រណីត លំហូរដើមទុនវិនិយោគពីចិនដីគោកបានគ្របដណ្តប់ចំណែកចំនួនប្រមាណ៨០ភាគរយនៃការទិញផ្ទះ ដែលមានតម្លៃលើសពី១០០លានដុល្លារហុងកុងនៅក្នុងគម្រោង The Peak ។នេះបើយោងតាមភ្នាក់ងារអចលនទ្រព្យ Centaline Property Agency។