ដោយៈ ម៉ាលីនណា
ភ្នំពេញៈ ប្រសិនជាអ្នកបោះជំហានកាន់តែជិត ដោយភាពស្មឹងស្មាត សម្លឹងទៅមើលផ្ទាំងគំនូរ ដែលបង្ហាញពីទុក្ខសោកនៃសង្រ្គាម ជាមួយឈាម សោកនាដកម្ម ទឹកភ្នែករបស់អ្នកនឹងហូរចេញមកសើមៗក្នុងប្រស្រីភ្នែករបស់អ្នក។
ជាមួយនឹងសោកនាដកម្ម ការប្រមាថ ដែលកើតមាននៅដើមសតវត្សរ៍ទី២១នេះ អ្នកជាតិនិយម នឹងទទួលរងនូវទារុណកម្មផ្លូវចិត្តមួយ ដែលមិនអាចព៌ណនាអស់ត្រឹមសំណេរ មិនអាចព៌ណនាអស់ត្រឹមផ្ទាំងគំនូរ និងមិនអាចពិព៌ណនាអស់ត្រឹមតែទឹកភ្នែក និងការនិយាយ។
ជាមួយនឹងការចំណាយពេលក្រោមពន្លឺថ្ងៃ អស់រយៈពេលយ៉ាងយូរ ទីបំផុតផ្ទាំងគំនូរនេះបានលេចចេញជារូបរាង និងបានសម្ភោធបើកស្វាគមន៍ទស្សនិកជនជាតិ អន្តរជាតិហើយ ដែលពិធីនេះធ្វើឡើង ក្រោមអធិបតីភាព លោកហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា រួមទាំងមានការចូលរួមពីសំណាក់សម្ដេចសង្ឃ ព្រះសង្ឃ មន្រ្តីរាជការ ភ្ញៀវបរទេសជាតិ-អន្តរជាតិ វិចិត្រករ និងសាធារណជនជាច្រើនអង្គនាក់។
សង្ឃឹមការប្រមាថ និងការឈឺចាប់នេះ នឹងស្ថិតនៅក្នុងចិត្តពលរដ្ឋខ្មែរគ្រប់រូប ហើយពង្រឹងការឈឺចាប់នេះ ប្រែក្លាយជាចលនាជាតិនិយមមួយកាន់តែរឹងមាំ ជាមួយឆន្ទៈស្នេហាជាតិ និងស្មារតីដ៏មោះមុត កើតមានក្នុងសន្តានចិត្តពលរដ្ឋខ្មែរគ្រប់រូប ជំនួសឲ្យពាក្យនិយាយថា “ខ្ញុំស្តាយក្រោយ”៕
