ខុនដូមួយនៅកោះពេជ្រ។ រូបថត៖ សហការី
ដោយៈ រ៉ាណេត
ភ្នំពេញៈ អ្នកជំនាញនៅក្នុងវិស័យអចលនទ្រព្យបានលើកឡើងថា ការទិញខុនដូទុកសម្រាប់ជួល គឺមានឱកាសអាចទទួលបានចំណូលច្រើនជាងការទិញផ្ទះល្វែង ឬផ្ទះវីឡាកម្រិតមធ្យមសម្រាប់ជួល ប៉ុន្តែឱកាសនៃការទទួលបានចំណូលនេះ នៅទាបជាងការទិញដីទុកសម្រាប់វិនិយោគបន្ត។
អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី បានមានប្រសាសន៍ប្រាប់កាលពីល្ងាចថ្ងៃទ២០ ខែឧសភា ឆ្នាំ២០១៩ថា បើធ្វើការប្រៀបធៀបទៅលើឱកាស នៃការទទួលបានចំណូលពីការជួលរវាងខុនដូ និងផ្ទះល្វែង ឬផ្ទះវីឡាកម្រិតមធ្យម ភាគរយច្រើនគឺខុនដូមានឱកាសខ្ពស់។ លោកឧកញ៉ាបានបន្តថា ជាការពិត ចំពោះភាគរយដែលទទួលបានចំណូលត្រឡប់មកវិញ តបនឹងការវិនិយោគដោយការជួល (Return of Investment) រវាងផ្ទះល្វែង ឬជាប្រភេទផ្ទះវីឡា គឺមានអត្រាទាបជាងខុនដូ។
-->
ផ្ទះល្វែង ឬផ្ទះវីឡាកម្រិតមធ្យម ដែលជាប្រភេទលំនៅដ្ឋាន ទិញក្នុងតម្លៃជាង២០-៣០ម៉ឺនដុល្លារ អាចដាក់ជួលបានត្រឹមតម្លៃយ៉ាងច្រើន៧០០ទៅ៨០០ដុល្លារ ក្នុងមួយខែតែប៉ុណ្ណោះ ប៉ុន្តែបើចំពោះខុនដូ ដែលទិញត្រឹមប្រមាណជាង១០-១៥ម៉ឺនដុល្លារក្នុងមួយយូនីត អាចជួលបានរហូតដល់១០០០-១៥០០ដុល្លារក្នុងមួយខែ ដូច្នេះការវិនិយោគទៅលើខុនដូនៅតែមានឱកាសខ្ពស់។
លោកឧកញ៉ានួន រិទ្ឋីបានបន្តថា បើទោះជាការជួលខុនដូ តម្រូវចំណាយខ្ពស់ជាងការជួលផ្ទះល្វែង ឬផ្ទះវីឡា ក៏ការជួលខុនដូនៅតែមានប្រជាប្រិយភាព ជាពិសេសពីសំណាក់ជនបរទេស ដោយសារវាមានកក្តាល្អជាច្រើនដូចជា មានប្រព័ន្ធគ្រប់គ្រងសុវត្ថិភាពខ្ពស់ មានការសម្អាតបរិស្ថានជុំវិញបាន១០០ភាគរយ មានកន្លែងហាត់ប្រាណ ក៏ដូចជាការបង្ហាញពីភាពស៊ីវិល័យផងដែរ។ អ្វីដែលជាចំណុចពិសេស ខុនដូភាគច្រើនត្រូវបានសាងសង់ឡើងនៅកណ្តាលក្រុង ដែលជាបណ្តុំមជ្ឈមណ្ឌលពាណិជ្ជ និងជាកន្លែងធ្វើការ ដែលខុសប្លែកពីផ្ទះល្វែង ឬផ្ទះវីឡា ដែលភាគច្រើនត្រូវបានគេអភិវឌ្ឍក្នុងបុរី ដែលស្ថិតនៅតំបន់ឆ្ងាយពីក្រុង ឬតំបន់ជាយក្រុង»។
អគ្គនាយិកាក្រុមហ៊ុន Century 21 Cambodia លោកស្រី Grace Rachny Fong បានមានប្រសាសន៍ប្រាប់តាមទូរស័ព្ទនៅថ្ងៃជាមួយគ្នានេះថា ឱកាសនៃការទទួលបានចំណូលពីការជួល ខុនដូ អាចបានច្រើនជាងផ្ទះល្វែងពិតមែន ប៉ុន្តែមិនមានន័យថា គ្រប់ខុនដូទាំងអស់សុទ្ធតែមានឱកាសល្អដូចគ្នានោះទេ។ លោកស្រីបានបន្តទៀតថា ៖ «ខុនដូដែលអាចជួលបានក្នុងតម្លៃល្អ ភាគច្រើនគឺមានតែនៅម្ដុំបឹងកេងកង១តែប៉ុណ្ណោះ ដែលអាចជួលបានប្រមាណ១៥០០-២០០០ដុល្លារក្នុងមួយខែ ដោយសារតែនៅតំបន់នេះ មានប្រមូលម្ដុំដោយមណ្ឌលពាណិជ្ជកម្មចម្រុះ។
លោកស្រីបន្តថា បើនៅតំបន់ផ្សេង ដូចជា នៅម្តុំបឹងទំពុន ទួលទំពូងជាដើម អាចជួលបានត្រឹម ៥០០-៧០០ ដុល្លារក្នុងមួយខែតែប៉ុណ្ណោះ។ ដោយឡែកចំពោះផ្ទះល្វែងដែលស្ថិតនៅក្នុងតំបន់ទីប្រជុំជន ឬក្បែរសាលារៀន ក៏អាចទទួលបានចំណូលច្រើនគួរសមដែរ ដែលយ៉ាងហោចណាស់ក៏ទទួលបានប្រមាណ១០០០ដុល្លារក្នុងមួយខែដែរ៕
