កម្ពុជា-ម៉ាឡេស៊ីប្តេជ្ញាជំរុញទំហំពាណិជ្ជកម្មឱ្យកាន់តែរីកលូតលាស់
ដោយ វុត្ថា
ភ្នំពេញ៖ ប្រទេសកម្ពុជា និងម៉ាឡេស៊ី បានប្តេជ្ញារួមគ្នាក្នុងការលើកកម្ពស់នៃកិច្ចសហប្រតិបត្តិការ វិនិយោគ និងសេដ្ឋកិច្ច នៃប្រទេសទាំងពីរដើម្បីបង្កើនទំហំពាណិជ្ជកម្មឲ្យកាន់តែធំបន្ថែមទៀត។
លោក Eldeen Hasaaini Binh Mohd Hashim (អែលឌីន ហួសៃនី ប៊ីន ម៉ូត ហាស៊ីម) ឯកអគ្គរដ្ឋទូតម៉ាឡេស៊ីថ្មី ប្រចាំនៅកម្ពុជានៅក្នុងជំនួបពិភាក្សាការងារជាមួយសម្តេចតេជោ ហ៊ុន សែននាយករដ្ឋមន្ត្រីនៃកម្ពុជានៅថ្ងៃទី ៤ ខែមិថុនា ឆ្នាំ ២០១៩ នេះថា ក្នុងបេសកកម្មការងាររបស់លោកនៅកម្ពុជានៅពេលនេះ គឺ៖
-->
ទី១) ធ្វើយ៉ាងណា ជំរុញទំនាក់ទំនងកម្ពុជា និងម៉ាឡេស៊ីឲ្យកាន់តែមានការរីកចម្រើនឡើងថែមទៀត
ទី២) ជំរុញរាល់កិច្ចព្រមព្រៀងអនុស្សារណៈទាំងឡាយដែលបានចុះហត្ថលេខាកន្លងមកឲ្យដំណើរការទៅមុខ
ទី៣) ជំរុញពាណិជ្ជកម្មកម្ពុជា និងម៉ាឡេស៊ីអោយមានទំហំកាន់តែធំឡើង ជាពិសេសការនាំអង្ករចេញពីកម្ពុជាទៅម៉ាឡេស៊ី ព្រមទាំងធ្វើយ៉ាងណាជំរុញការវិនិយោគម៉ាឡេស៊ីនៅកម្ពុជាឱ្យក្លាយទៅជាវិនិយោគធំលំដាប់ទី១នៅកម្ពុជា។
សម្ដេចតេជោ ហ៊ុន សែន បានថ្លែងដែរថា ទំនាក់ទំនងរវាងកម្ពុជា និងម៉ាឡេស៊ីបានឈានដល់កម្រិតមួយដែលមិនធ្លាប់មានហើយអ្វីដែលជាគោលបំណង និងសេចក្តីប៉ងប្រាថ្នាគឺធ្វើយ៉ាងណាជំរុញពាណិជ្ជកម្មរវាងប្រទេសទាំងពីរឲ្យកាន់តែធំបន្ថែមទៀត ហើយលើសពីនោះទៀត គឺធ្វើយ៉ាងណាជំរុញលំហូរពាណិជ្ជកម្មរវាងប្រទេសទាំងពីរឲ្យមានលំហូរដោយសេរីស្របតាមយន្តការគោលការណ៍ និងគោលនយោបាយរបស់អាស៊ាន មិនតែប៉ុណ្ណោះត្រូវជំរុញឱ្យមានលំហូរពាណិជ្ជកម្មរវាងប្រទេសអាស៊ាន និងអាស៊ានផងដែរ។
សម្ដេចតេជោនាយករដ្ឋមន្ត្រី ក៏បានធ្វើការណែនាំឲ្យធ្វើយ៉ាងណាជំរុញកិច្ចព្រមព្រៀងពាណិជ្ជកម្មប្រទេសទាំងពីរផង និងជំរុញកិច្ចព្រមព្រៀងមិនយកពន្ធត្រួតគ្នានៃប្រទេសទាំងពីរផង ដើម្បីធ្វើយ៉ាងណាសម្រួលដល់ការវិនិយោគពាណិជ្ជកម្មយើងទាំងពីរ ៕
