គម្រោងអគារមជ្ឈមណ្ឌលពាណិជ្ជកម្មយក្សព្រីនស៍
ដោយ វុត្ថា
ភ្នំពេញ៖ មជ្ឈមណ្ឌលពាណិជ្ជកម្មលំដាប់ពិភពលោករបស់ក្រុមហ៊ុនយក្ស ព្រីនស៍ រៀល អ៊ីស្ទេត គ្រុប ជាគម្រោងមួយនឹងផ្លាស់ប្ដូរមុខមាត់ខេត្តព្រះសីហនុ នឹងបញ្ចប់ការសាងសង់នៅឆ្នាំ ២០២៣ ខាងមុខ ។
យោងតាមការចុះផ្សាយរបស់គេហទំព័រហ្វេសប៊ុកផ្លូវការបស់ក្រុមហ៊ុនព្រីនស៍ អ៊ីស្ទេតគ្រុប បានឲ្យដឹងនៅថ្ងៃទី ៧ ខែមិថុនា ឆ្នាំ ២០១៩ នេះថា គម្រោងនេះជាគម្រោងសណ្ឋាគារលំដាប់ផ្កាយប្រាំចំនួនមួយ និងខុនដូបែបសណ្ឋាគារផ្កាយប្រាំចំនួនពីរ អាផាតម៉ិន ផ្សារទំនើប និងកាស៊ីណូត្រូវបានសាងសង់រណ្តៅគ្រឹះរួចរាល់នឹងឈានចូលដល់ដំណាក់កាលសាងសង់នៃគម្រោងពហុមុខងាររបស់ខ្លួន។
-->
គម្រោងនេះត្រូវបានរំពឹងថានឹងសាងសង់រួចរាល់នៅខែមីនា ឆ្នាំ ២០២៣។គេហទំព័រដដែលបន្តថា ពិធីបើកការដ្ឋានសាងសង់ជាផ្លូវការនៃគម្រោងពហុមុខងារព្រីនស៍ ធាន ស៊ី វ៉ាន កាលពីថ្ងៃទី ៦ ខែ ខែមិថុនា ឆ្នាំ ២០១៩ ម្សិលមិញនេះ មិនត្រឹមតែបង្ហាញពីភាពចម្រុងចម្រើននាពេលអនាគតប៉ុណ្ណោះទេ ប៉ុន្តែក៏ជានិម្មិតសញ្ញានៃការពង្រីកយុទ្ធសាស្រ្ដរបស់ក្រុមហ៊ុន ព្រីនស៍ រៀល អ៊ីស្ទេត គ្រុប នៅក្នុងខេត្តព្រះសីហនុ ក៏ដូចជាការបោះជំហ៊ានកាន់តែជិតក្នុងការរស់នៅតាមឆ្នេរសមុទ្រសម័យថ្មី។
បន្ទាប់ពីបានធ្វើការសិក្សា និងដាក់ចេញនូវផែនការយ៉ាងល្អិតល្អន់កាលពីឆ្នាំ២០១៨កន្លងមកនេះ ក្រុមហ៊ុនព្រីនស៍ រៀល អ៊ីស្ទេត (ខេមបូឌា) គ្រុប បានជ្រើសរើសយកតំបន់ឆ្នេរសមុទ្រ ដែលមានទីតាំងស្ថិតនៅភូមិ៣ សង្កាត់លេខ ៣ ក្រុងព្រះសីហនុ ដែលជាទីក្រុងកំពងផែសមុទ្រធំជាងគេ របស់ប្រទេសកម្ពុជា ដែលធ្លាប់ជារមណីយដ្ឋានឯកជន សម្រាប់រាជវង្សានុវង្ស យកមកអភិវឌ្ឍន៍គម្រោងរបស់ខ្លួនឲ្យក្លាយជាតំបន់វិស្សមកាលឆ្នេរសមុទ្រលំដាប់ពិភពលោក។
ជាមួយនឹងការកសាង «ខ្សែក្រវាត់ ផ្លូវមួយ» និងការបណ្តាក់ទុនអន្តរជាតិជាច្រើន ទីក្រុងព្រះសីហនុ បានផ្លាស់ប្តូរមុខមាត់ថ្មីតាមរយៈការអភិវឌ្ឍ ទៅជាទីក្រុងអន្ដរជាតិ ដែលមានឆ្នេរខ្សាច់ដ៏ស្រស់ស្អាត។ សណ្ឋាគារលំដាប់ ផ្កាយ មជ្ឈមណ្ឌលទិញទំនិញ តំបន់កម្សាន្តលំដាប់កំពូល ភោជនីយដ្ឋានអាហារល្បីៗ-ល- បានប្រមូលផ្តុំនៅទីក្រុងមួយនេះ ដែលធ្វើឲ្យទីក្រុងនេះ ក្លាយជាគោលដៅទេសចរណ៍ ដ៏ពេញនិយមនៅតំបន់អាស៊ីអាគ្នេយ៍។
ក្រុមហ៊ុនព្រីនស៍ រៀល អ៊ីស្ទេត គ្រុប បច្ចុប្បន្នមានដីបម្រុងជាង៨០០ហិកតានៅកម្ពុជា ស្មើនឹងគម្រោងអភិវឌ្ឍន៍សរុបជាង១០លានម៉ែត្រការ៉េ។ ក្រៅពីទីក្រុងភ្នំពេញ ក្រុមហ៊ុនព្រីនស៍ រៀល អ៊ីស្ទេត គ្រុប កំពុងពង្រីកគម្រោងអភិវឌ្ឍន៍របស់ខ្លួន ទៅកាន់ខេត្តក្រុងសំខាន់ៗ ដូចជាខេត្តព្រះសីហនុ និងខេត្តសៀមរាប៕
