សណ្ឋាគារ​កម្រិត​ផ្កាយ៥ ចំនួន​បួន​ទៀត​នឹង​បើក​ដំណើរការ​នៅ​ខេត្ត​ព្រះសីហនុ

0

ភ្នំពេញ៖ សណ្ឋាគារធំៗលំដាប់​អន្តរជាតិ​ចំនួន ៤ទៀត នឹង​បើក​ដំណើរការ​នៅ​ខេត្ត​ព្រះសីហនុ​នៅ​ចុង​ឆ្នាំនេះ ឬ​ដើមឆ្នាំ២០១៨ខាងមុខនេះ ស្របពេល​ចំនួន​ភ្ញៀវ​ទេសចរណ៍​ជាតិ និង​អន្តរជាតិ​កើនឡើង​យ៉ាងគំហុក​នៅក្នុង​ខេត្ត​ជាប់មាត់​សមុទ្រ​មួយ​នេះ។

យោងតាម​ការសិក្សា​ស្រាវជ្រាវ​ពី​សំណាក់ CBRE Cambodia ក្នុង​ឆមាស​ដំបូង​ឆ្នាំ ២០១៧នេះ​បាន​បញ្ជាក់ថា សណ្ឋាគារ​ផ្កាយ​ប្រាំ​ជាច្រើន ស្ថិតក្នុង​គម្រោង​សាងសង់ ក្នុងនោះ​មានដូចជា សណ្ឋាគារ​លំដាប់​អន្តរជាតិ Xihu នឹង​បើក​នៅ​ចុងឆ្នាំ ២០១៧ដែលមាន​បន្ទប់​ចំនួន៥០។ បន្ថែម​ពីនេះ​សណ្ឋាគារ​លំដាប់​អន្តរជាតិ​ចំនួន២ទៀត គឺ Intercontinental2 និង Marriott ក៏មាន​គម្រោង​ចូលមក​ទឹកដី​ខេត្ត​នេះ​ផងដែរ។

របាយការណ៍​ដដែល​បាន​ឲ្យ​ដឹងថា មានការ​កើនឡើង​រម​ណី​យ​ដ្ឋា​ន​ខ្នាត​អន្តរជាតិ​ធ្វើការ​លើ​ផ្នែក​បដិសណ្ឋារកិច្ច និង​រមណីយដ្ឋាន​លើ​បណ្ដា​កោះ​មួយចំនួនទៀត ក្នុង​ខេត្ត​ព្រះសីហនុ​នេះ​ផងដែរ។ ក្នុងនោះ​មានដូចជា​ក្រុមហ៊ុន Six Senses ដែល​នឹង​ចាប់ផ្ដើម​រមណីយដ្ឋាន​លើ​កោះក្របី​ត្រឹម​ឆ្នាំ ២០១៨ និង​ក្រុមហ៊ុន Royal Group’s  Royal Sands ដែលមាន​គម្រោង​បើក​រមណីយដ្ឋាន​លើ​កោះរ៉ុង​ក្នុង​ខែតុលា​ឆ្នាំ ២០១៧នេះ។

ការកើនឡើង​នូវ​សណ្ឋាគារ​លំដាប់​ផ្កាយ និង​រមណីយដ្ឋាន​បន្ថែ​ម​នេះ​គឺ​បណ្ដា​មកពី​ហេដ្ឋារចនាសម្ព័ន្ធ​ទៅកាន់​តំបន់ឆ្នេរ​មាន​ភាពប្រសើរ ជាពិសេស​ការកើនឡើង​នូវ​ចំនួន​ភ្ញៀវទេសចរ​អន្តរជាតិ ដោយសារ​សម្រស់​ដ៏​ស្រស់ស្អាត​របស់​ឆ្នេរសមុទ្រ និង​បណ្ដា​កោះ​នានា​នៅ​ខេត្ត​នេះ។

តាម​របាយការណ៍​រប​ស់ CBRE Cambodia បាន​បញ្ជាក់ថា ភ្ញៀវ​បរទេស​ចរ​ដែល​មក​កំសាន្ត​ច្រើនជាងគេ​ជា​ជន​ជាតិចិន វៀតណាម រុស្ស៊ី និង​ពួគលោក​ខាងលិច។  គិត​ត្រឹម​ត្រីមាស​ដំបូង​នៃ​ឆ្នាំ ២០១៧ ព្រលានយន្តហោះ បានទទួល​ភ្ញៀវទេសច​រ​សរុប​ចំនួន៤៧,០០០នាក់ ដែល​វា​ជាការ​កើនឡើង​ស្មើរ​នឹង ១៨២%ប្រៀប​នឹង​ពេលវេលា​ដូចគ្នា​កាលពី​ឆ្នាំមុន។

រដ្ឋមន្ត្រី​ក្រសួងទេសចរណ៍​លោក​ថោង ខុន​បាន​ថ្លែងថា ភ្ញៀវ​ទេសចរណ៍​ជាតិ និង​អន្តរជាតិ​បាន​កើនឡើង​ខ្លាំង​នៅក្នុង​ខេត្ត​ព្រះសីហនុ ពិសេស​ភ្ញៀវ​ទេសចរណ៍​ចិន ដែល​ធ្វើ​ឲ្យ​ចំនួន​បន្ទប់​កំពុង​ប្រឈម​ការខ្វះខាត​ជាប្រចាំ ប៉ុន្តែ​នៅ​ចុងឆ្នាំ​នេះ ឬ​ដើមឆ្នាំ២០១៨ខាងមុខ បន្ទប់​សណ្ឋាគារ​ចំនួន២០០០ ទៅ៣០០០បន្ទប់​ទៀត​នឹង​បំពេញ​កង្វះខាត​បន្ទប់​ភ្ញៀវ​ស្នាក់​នៅក្នុង​ខេត្ត​មួយ​នេះ។

លោក​បន្តថា “ការវិនិយោគ​លើ​វិស័យ​បដិសណ្ឋារកិច្ច​នៅ​ខេត្ត​ព្រះសីហនុ ត្រូវ​ពង្រីក​បន្តទៀត ដើម្បី​បំពេញតម្រូវការ​របស់​ភ្ញៀវ​ទេសចរណ៍ ប៉ុន្តែ​ខ្ញុំ​ក៏មាន​ការព្រួយបារម្ភ​ពី​បញ្ហា​បំពុលបរិស្ថាន​ផងដែរ ដែល​ការងារ​នេះ​ទាមទារ​ឲ្យ​ស្ថាប័ន​ពាក់​ព័​ន្ឋ​ទាំងអស់​រួមគ្នា​ដោះស្រាយ”៕

LEAVE A REPLY

Please enter your comment!
Please enter your name here