ដោយ វុត្ថា
ភ្នំពេញៈ រដ្ឋាភិបាលសហការជាមួយអាជ្ញាធរខេត្តនៅជាប់ព្រំដែន បានចាប់ផ្តើមរៀបចំតំបន់សេដ្ឋកិច្ចពិសេស នៅតាមជាយដែន នៃខេត្តមានសក្តានុពលសេដ្ឋកិច្ច ជាគោលដៅវិនិយោគបរទេស ជាពិសេសក្រុងបាវិត ខេត្តស្វាយរៀង ស្របតាមស្មារតី និងលទ្ធផលនៃវេទិការាជរដ្ឋាភិបាល និងផ្នែកឯកជន ក្រោមអធិបតីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជានាពេលកន្លងទៅ។
លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្រ្តី អគ្គលេខាធិការក្រុមប្រឹក្សាអភិវឌ្ឍន៍កម្ពុជា និងលោកម៉ែន វិបុល អភិបាលខេត្តស្វាយរៀង នៅថ្ងៃទី៥ ខែកញ្ញា ឆ្នាំ ២០១៩ នេះ បានពិភ្សាអំពីស្ថានភាពជាក់ស្តែងនៃសកម្មភាពវិនិយោគ និងពាណិជ្ជកម្មនៅខេត្តស្វាយរៀង សម្រាប់ជាមូលដ្ឋាន ក្នុងការរៀបចំដាក់ចេញនូវយន្តការ ពិសេសសម្រាប់ទាក់ទាញការវិនិយោគឲ្យកាន់តែច្រើន តាមរយៈជាអាទិ៍ ការរៀបចំតំបន់សេដ្ឋកិច្ចពិសេសនៅតាមជាយដែន។
កិច្ចប្រជុំពិភាក្សានេះ បានផ្តោតទៅលើបញ្ហាមួយចំនួន ដូចជា ការរៀបចំឲ្យមានតំបន់សេដ្ឋកិច្ចពិសេសតាមជាយដែនបន្ថែមទៀត។ ការតភ្ជាប់បណ្តាញ និងផ្គត់ផ្គង់អគ្គិសនីនៅក្នុងតំបន់សេដ្ឋកិច្ចពិសេសទាំងនោះ។ ការកំណត់នូវវិស័យឧស្សាហកម្មដែលត្រូវទាក់ទាញ និងការរៀបចំឡើងវិញនូវការលើកទឹកចិត្តដល់ការវិនិយោគ។
ការរៀបចំបង្កើនការសម្រួលពាណិជ្ជកម្ម និងសម្រួលផ្នែកឡូជីស្ទីកនៅតាមជាយដែន ឬតំបន់សេដ្ឋកិច្ចពិសេស ព្រមទាំងបញ្ហាប្រឈមមួយចំនួន ដែលកំពុងកើតមានឡើងពាក់ព័ន្ធនឹងការងារនេះ។ និងការយកចិត្តទុកដាក់ទៅលើបរិស្ថាន ការរៀបចំប្រព័ន្ធលូ អាងចម្រោះទឹកកង្វក់ ការកែច្នៃកាកសំណល់រឹងវាវ ដែលចេញពីរោងចក្រអោយមានស្តង់ដា។
លោកសុខ ចិន្តាសោភា ក៏បានស្នើឲ្យភាគីពាក់ព័ន្ធទាំងអស់ មេត្តាបង្កើនការខិតខំប្រឹងប្រែងបន្ថែមទៀត ដើម្បីសម្រួលប្រតិបត្តិការនៃគម្រោងវិនិយោគបច្ចុប្បន្ន សំដៅទាក់ទាញអ្នកវិនិយោគបរទេសបន្ថែម មកបណ្តាក់ទុននៅតាមតំបន់ជាយដែនរបស់កម្ពុជាក៏ដូចជានៅខេត្តស្វាយរៀង៕
