សណ្ឋាគារ និងមណ្ឌលកម្សាន្តលំដាប់អន្តរជាតិចំនួន២ បានសម្ពោធដាក់ឱ្យដំណើរការនៅក្នុងក្រុងព្រះសីហនុនាដើមសប្តាហ៍នេះ
ដោយ វុត្ថា
ភ្នំពេញ៖ សណ្ឋាគារ និងមណ្ឌលកម្សាន្តលំដាប់អន្តរជាតិចំនួន២ គឺសណ្ឋាគារ និងមណ្ឌលកម្សាន្ត ដាយម៉ិនស៊ី និង សណ្ឋាគារ និងមណ្ឌលកម្សាន្ត ហាវ ជាំង ត្រូវបានសម្ពោធដាក់ឱ្យដំណើរជាផ្លូវការនៅក្នុងក្រុងព្រះសីហនុ ខេត្តព្រះសីហនុនាដើមសប្តាហ៍។
យោងតាមការផ្សព្វផ្សាយរបស់រដ្ឋបាលខេត្តព្រះសីហនុកាលពីល្ងាចថ្ងៃទី ២៦ ខែវិច្ឆិកា ឆ្នាំ ២០១៩ ម្សិលមិញនេះ បានឱ្យដឹងថា សណ្ឋាគារ និងមណ្ឌលកម្សាន្តទាំងពីរនេះ គឺមានទីតាំងផ្សេងៗគ្នា ពោលសណ្ឋាគារ និងមណ្ឌលកម្សាន្ត ដាយម៉ិនស៊ី គឺស្ថិតក្នុងសង្កាត់លេខ៣ ក្រុងព្រះសីហនុ ខេត្តព្រះសីហនុ និសណ្ឋាគារ និងមណ្ឌលកម្សាន្ត ហាវ ជាំង គឺស្ថិតនៅភូមិ២ សង្កាត់លេខ៣ ក្រុងព្រះសីហនុ ខេត្តព្រះសីហនុ។
-->
លោក គួច ចំរើន អភិបាល នៃគណៈអភិបាលខេត្តព្រះសីហនុ ឱ្យដឹងនៅក្នុងពិធីសម្ពោធបើកឱ្យដំណើរការជាផ្លូវការ សណ្ឋាគារ និងមណ្ឌលកម្សាន្ត ថា សណ្ឋាគារ និងមណ្ឌលកម្សាន្ត ទាំង២នេះ ជាសមិទ្ធិផលទេសចរណ៍ សេដ្ឋកិច្ចថ្មីមួយទៀត សម្រាប់ខេត្តព្រះសីហនុ ផ្អែកលើគោលនយោបាយ ផ្លូវមួយ ខ្សែក្រវាត់មួយ របស់លោកប្រធានាធិបតី ស៊ី ជិនពីង។
លោកបន្តថា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះជាណាចក្រកម្ពុជា ធ្វើឱ្យប្រទេសកម្ពុជាមានសុខសន្តិភាព ទាក់ទាញវិនិយោគិនយ៉ាងច្រើនពីបរទេស ពិសេសអ្នកវិនិយោគគិនចិន ពិតជាបានចូលរួមចំណែកអភិវឌ្ឍន៍ខេត្តព្រះសីហនុ ។
លោកបន្តថា ផ្អែកលើសក្តានុពល ពីធម្មជាតិ ខេត្តព្រះសីហនុ មានតំបន់ឆ្នេរ ព្រៃធម្មជាតិស្រស់ត្រកាល ជាការទាក់ទាញភ្ញៀវទេសចរ និងអ្នកវិនិយោគ ការគិតគូរកសាងបំពេញបន្ថែម ដើម្បីបំរើសេចក្តីត្រូវការរបស់យើង ។
លោកអភិបាលខេត្តរូបនេះ បន្ថែមថារាជរដ្ឋាភិបាល និងរដ្ឋបាលខេត្ត បាននិងកំពុងបន្តខិតខំកសាងហេដ្ឋារចនាសម្ព័ន្ធផ្លូវ ថ្នល់ ពិសេសកាលពីថ្ងៃទី១៦ ខែវិច្ឆិកា ឆ្នាំ២០១៩ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញបើកការដ្ឋាន ស្ថាបនាផ្លូវក្នុងក្រុងព្រះសីហនុចំនួន ៣៤ខ្សែ ប្រវែង ៨៤.៥០៥គីឡូម៉ែត្រ ផ្លូវទាំងអស់នេះ កសាងប្រកបដោយគុណភាព និងសោភ័ណភាពបំរើឱ្យវិស័យទេសចរណ៍របស់យើង។
លោកបានបញ្ជាក់ទៀតថា ខេត្តព្រះសីហនុ មានកំពង់ផែអន្តរជាតិទឹកជ្រៅ ត្រូវបានពង្រីកការដឹកជញ្ជូនកាន់តែមានភាពងាយស្រួល អាចឱ្យនាវាធុនធំចេញ ចូល ធ្វើឱ្យតម្លៃដឹកជញ្ជូនកាន់តែថោក ក្នុងការប្រកួតប្រជែង។
ជំរុញការកសាងពង្រីកព្រលានយន្តហោះអន្តរជាតិ សម្រាប់ផ្តល់ភាពងាយស្រួលឱ្យយន្តហោះ ប្រភេទធុនធំ ចុះចតប្រសើរឡើងថែមទៀត ដើម្បីបំរើសេវាតាមផ្លូវអាកាសកាន់តែមានភាពងាយស្រួល ។ រាជរដ្ឋាភិបាល ក៍បានកសាងផ្លូវល្បឿនលឿនតភ្ជាប់ពីរាជធានីភ្នំពេញ មកកាន់ខេត្តព្រះសីហនុ នឹងដាក់ឱ្យដំណើរការ នៅចុងឆ្នាំ២០២២ខាងមុខ៕
អានអត្ថបទ៖ សណ្ឋាគារលំដាប់ផ្កាយប្រាំថ្មីមួយ បើកដំណើរការនៅក្រុងព្រះសីហនុ
