ដោយៈ រ៉ាណេត
ភ្នំពេញៈ ក្រុមហ៊ុនអចលនទ្រព្យយូ ធី ជី យូត្រាស់ អ៊ិនវេសម៉ិន (U.T.G UTRUST INVESTMENT Co,.Ltd )ដែលជាក្រុមហ៊ុនអភិវឌ្ឍន៍ លើលគម្រោងដីឡូតិ៍ដ៏ធំ នឹងធ្វើការចែករំលែកក្ដីស្រឡាញ់ ទៅដល់សិស្សានុសិស្សចំនួន៥០០នាក់ តាមរយៈការផ្តល់ជូននូវសម្ភារៈសិក្សា ថវិកា អាហារ និងមធ្យោបាយ សម្រាប់ធ្វើដំណើរទៅសិស្សពូកែមួយចំនួនផងដែរ។
នៅក្នុងឱកាសទិវានៃក្ដីស្រឡាញ់ ថ្ងៃទី១៤ ខែកុម្ភៈ ឆ្នាំ២០២០ ខាងមុខនេះ ក្រុមហ៊ុនអចលនទ្រព្យ យូ ធី ជី យូត្រាស់ អ៊ីនវេសម៉ិន នឹងរៀបចំកម្មវិធីចែករំលែកក្តីស្រឡាញ់ដល់ប្អូនៗ សិស្សានុសិស្សចំនួន៥០០នាក់ ដោយការចែកជូននូវសម្ភារៈសិក្សា រួមមានដូចជា សៀវភៅ ប៊ិច ខ្មៅដៃ បន្ទាត់ កាតាប ព្រមទាំងចែករំលែកនូវថវិការទៅដល់លោកគ្រូ អ្នកគ្រូ នៅសាលាបឋមសិក្សា ស្តុកតោល ស្ថិតនៅភូមិ ស្តុកតោល ឃុំចាន់សែន ស្រុកឧដុង្គ ខេត្តកំពង់ស្ពឺ។
ប្រធានក្រុមប្រឹក្សាភិបាលក្រុមហ៊ុនអចលនទ្រព្យ យូ ធី ជី យូត្រាស់ អ៊ិនវេសម៉ិន (U.T.G UTRUST INVESTMENT Co,.Ltd) លោកម៉ន សុខា បានមានប្រសាសន៍ប្រាប់ថា ការចែករំលែកនូវសម្ភារៈសិក្សា ថវិកា និងចំណីអាហារទៅដល់បណ្តាសិស្សានុសិស្សខាងលើនេះ គឺគ្រាន់តែជាការចូលរួមចំណែកនៅក្នុងការងារសង្គម និងជួយសម្រាលនូវក្ដីលំបាករបស់សិស្សានុសិស្សដែលកំពុងជួបបញ្ហាខ្វះខាត។
ដោយឡែកសម្រាប់ឆ្នាំ២០២០នេះ ឆ្លៀតនៅក្នុងឱកាសទិវានៃក្ដីស្រឡាញ់ ថ្ងៃទី ១៤ ខែកុម្ភៈ ខាងមុខនេះ ក្រុមការងាររបស់ក្រុមហ៊ុន នឹងចុះចែកសម្ភារៈសិក្សា ថវិកា និងចំណីអាហារទៅដល់សិស្សានុសិស្ស ដែលកំពុងសិក្សានៅក្នុងសាលាបឋមសិក្សា ស្តុកតោល ដែលមានទីតាំងដូចបានជម្រាប់ជូនខាងលើនេះ”។ លោកបានបញ្ជាក់ថា “គោលដៅនៃការចែករំលែកទាំងនេះ គឺចង់ឃើញស្នាមញញឹមរបស់កុមារ និងរីករាយជាមួយការសិក្សារបស់ពួកគេ ដែលជាធនធានយ៉ាងសំខាន់សម្រាប់សង្គមជាតិនៅថ្ងៃអនាគត”។
សម្រាប់សម្ភារៈសិក្សា ដែលនឹងត្រូវចែករំលែកនៅថ្ងៃទី១៤ ខែកុម្ភៈ ឆ្នាំ២០២០ខាងមុខនេះ រួមមាន ដូចជា កង់ចំនួន៥គ្រឿង (សម្រាប់លើកទឹកចិត្តដល់សិស្សពូកែ) សៀវភៅចំនួន ២០០០ក្បាល ប៊ិចចំនួន១៥០០ដើម ខ្មៅដៃចំនួន១៥០០ដើម បន្ទាត់ចំនួន១.០០០ដើម កាតាបដាក់សំសម្ភារៈសិក្សាចំនួន ៥០០ថវិកា និងចំណីអាហារមួយចំនួនទៀតផងដែរ៕
