ដោយវុត្ថា
ភ្នំពេញៈ អ្នកជំនាញបានបានព្យាករណ៍ថា តម្លៃដីធ្លីនៅតាមបណ្តោយផ្លូវជាតិលេខ ១ នឹងបន្តកើនឡើង ដោយសារតែផ្លូវនេះ មានតម្រូវការខ្ពស់លើវិស័យលំនៅឋាន និងអាគារពាណិជ្ជកម្មជាដើម។
អ្នកជំនាញព្យាករណ៍ថា តម្លៃដីនៅតាមបណ្តោយផ្លូវជាតិលេខ១នឹងបន្តកើនឡើង
លោក ម៉ាន់ ចាន់ឌី អគ្គនាយកក្រុមហ៊ុន Premium Group បានឱ្យដឹងនៅថ្ងៃទី ៦ ខែកុម្ភៈ ឆ្នាំ ២០២០ នេះ ឱ្យដឹងថា តម្លៃដីធ្លីតាមផ្លូវជាតិលេខ១ នេះចាប់ពីតំបន់ច្បារអំពៅ រហូតដល់គៀនស្វាយ គឺមានការកើនឡើងខ្ពស់ ដោយសារមានតម្រូវការខ្លំាង ពោលគឺនឹងកើនឡើងចាប់ពីចន្លោះពី១០ ទៅ១៥ភាគរយប្រចាំឆ្នាំ។
លោកថា “អ្នកខ្លះថាតំបន់នេះ គឺមានភាពស្ងាត់សកម្មភាពវិនិយោគ លើវិស័យដីធ្លី តែខ្ញុំមើលទៅគឺមិនមិនដូច្នោះឡើយ ព្រោះផ្លូវនេះមានសក្តានុពលខ្ពស់ ហើយតម្លៃអចលនទ្រព្យនឹងបន្តកើនឡើងខ្ពស់ដដែល”។
លោក ប៉ូ អ៊ាវគង់ អគ្គនាយកក្រុមហ៊ុន Advance Real Estate បានឱ្យដឹងដឹងដែរថា តំលៃដីនៅតាមបណ្តោយផ្លូវជាតិលេខ១ បន្តកើនឡើងពីមួយឆ្នាំទៅមួយឆ្នាំ ចាប់តាំងពីឆ្នាំ២០០៥ រហូតដល់ឆ្នាំ២០១៩ កន្លងមកនេះ ព្រោះនៅតាមបណ្តោយផ្លូវនេះ មានការកើនឡើងនូវតម្រូវការខ្ពស់លើវិស័យលំនៅឋាន ពាណិជ្ជកម្ម និងសេដ្ឋកិច្ច ។
លោកបន្តថា “តម្លៃលដីធ្លីនៅតាមតំបន់ផ្លូវនេះ គឺមានតម្លៃខុសគ្នាទៅតាមទីកន្លែងនឹងតំបន់ និងតម្រូវការជារួមគឺថា ពីមួយឆ្នាំទៅមួយឆ្នាំកើនឡើង១០ ទៅ១១ ភាគរយ ព្រោះផ្លូវជាតិលេខ១ នេះ គឺមានប្រវែងវែង គិតចាប់ពីភ្នំពេញរហូតល់ក្រុងបាវិត”។
លោកបន្ថែមថា បើតម្លៃដីចាប់ពីច្បារអំពៅ ម្តុំបុរីប៉េហួតទៅដល់គៀនស្វាយ គឺមាន១ពាន់ដុល្លារទៅ២ពាន់ដុល្លារក្នុងម៉ែត្រការ៉េ និងចាប់ពីកៀនស្វាយ មានតម្លៃចាប់ពី៥០០ទៅ ៦០០ ដុល្លារអមេរិកក្នុងមួយម៉ែត្រការ៉េ និងតម្លៃចាប់ពី១០០ ទៅ២០០ដុល្លារឡើងទៅតាមតំបន់ និងទីកន្លែង ព្រមទាំងប្រភេទដីតូចឬធំ។
លោក សន សៀប ដែលជាអ្នកជំនាញផ្នែក អចលនទ្រព្យ និងជាស្ថាបនិកក្រុមហ៊ុន Key Real Estate បានលើកឡើងស្រដៀងគ្នាផងដែរថា នៅតាមបណ្តោយផ្លូវជាតិលេខ ១ ជាមានសក្តានុពលខ្ពស់លើវិស័យអចនទ្រព្យ ដោយមានគម្រោងធំជាច្រើនបាច់ឆ្ពោះទៅកាន់ទីនេះ មានទាំងបុរី លំនៅឋាន និងពាណិជ្ជកម្ម ។
ទោះជាយ៉ាងណាលោកមិនព្យាករណ៍ពីកំនើនតម្លៃដីធ្លីនោះទេ ដោយលោកបានមានប្រសាសន៍ថា តម្លៃដីធ្លីនៅតាមផ្លូវនេះ គឺមានការកើនឡើងពីមួយឆ្នាំទៅមួយឆ្នាំ ដោយសារតែការកើនឡើងនូវតម្រូវការខ្លាំង និងគម្រោងវិយោគ ហើយលោករំពឹងថា នឹងបន្តកើនឡើងថែមទៀត។
អ្នកស្រី តាំង ហួរ នាយិការក្រុមហ៊ុនAmatak property service បានឱ្យដឹងដែរថា តម្លៃដីធ្លីគិតពីចំណុចច្បារអំពៅ ដែលស្ថិតនៅក្នុងខណ្ឌច្បារអំពៅ រហូតក្រុងបាវិត គឺមានសន្ទុះកើនឡើង នូវតម្លៃតាំងពីការបង្កើតតំបន់សេដ្ឋកិច្ចពិសេស និងក្រោយការបង្កើតផែស្ងួតមកម៉្លេះ។ ប៉ុន្តែអ្វីដែលធ្វើឱ្យមានការចាប់អារម្មណ៍ និងកត់សម្គាល់ខ្លាំងបំផុតនាពេលនេះ គឺសកម្មភាពរបស់អ្នកវិនិយោគ ក៏ដូចជាអ្នកអភិវឌ្ឍជាច្រើនកំពុងតែ សម្លឹងមើលតំបន់កៀនស្វាយ ជាពិសេសតំបន់ដែលស្ថិតនៅក្នុងឃុំដីឥដ្ឋតែម្ដង។
អ្នកស្រីបន្តថា “តម្លៃដីធ្លី នៅតាមបណ្តោយផ្លូវជាតិលេខ១ បាននិងកំពុងកើនឡើងគ្រប់តំបន់ និងគ្រប់ទីតាំង គ្រាន់តែថាតំបន់ខ្លះឡើងខ្លាំង ហើយតំបន់ខ្លះឡើងតិចតែប៉ុណ្ណោះ”៕
