ដោយ ហ្សូលី
បាងកកៈ ទីផ្សារខុនដូក្នុងទីក្រុងបាងកកមានការធ្លាក់ចុះ ដែលឆ្លុះបញ្ចាំងពីទំនុកចិត្តទាប ក្នុងចំណោមអ្នកអភិវឌ្ឍន៍ និងអ្នកទិញនៅក្នុងទីផ្សារខុនដូថៃ ខណៈប្រទេសនេះកំពុងមានការវាយលុកពីវីរុសកូរ៉ូណា។
ក្រុមហ៊ុនអភិវឌ្ឍន៍ជាច្រើន បានកាត់បន្ថយការចាប់ផ្តើមគម្រោងថ្មី និងផ្លាស់ប្តូរការដាក់តម្លៃ ដែលមានតម្លៃក្រោម១០ម៉ឺនបាតក្នុងមួយម៉ែត្រការ៉េ។ នេះជាភស្តុតាងដែលបង្ហាញថា អត្រាទិញមានកម្រិតទាប ទោះបីជាមានការទាក់ទាញអតិថិជនបែបណាក៏ដោយ។
ខុនដូសរុបចំនួន១១.៣៦២យូនីត ត្រូវបានដាក់ឲ្យដំណើរការនៅត្រីមាសចុងក្រោយនៃឆ្នាំ២០១៩ ដែលជាការធ្លាក់ចុះ២០ភាគរយ បើប្រៀបធៀបទៅនឹងត្រីមាសមុន។ ចំនួនសរុបពេញមួយឆ្នាំចំនួន ៤១.៥៦៨ យូនីតបានធ្លាក់ចុះ ៣៧% ពីឆ្នាំ ២០១៨ ។ តម្លៃគម្រោងសរុបមានចំនួន២០០ពាន់លានបាត។
អ្នកអភិវឌ្ឍន៍ និងក្រុមហ៊ុនវិនិយោគមួយចំនួន បានពន្យារពេលការបើកដំណើរការគម្រោង ដោយសារតែភាពជឿជាក់ទាបនៅក្នុងទីផ្សារ និងអត្រាទិញធ្លាក់ចុះ ដោយសារប្រទេសថៃកំពុងប្រឈមនឹងបញ្ហាសុខភាពសកលលោក វីរុសកូរ៉ូណា។
លើសពីនេះ ការចាប់អារម្មណ៍របស់អ្នកទិញជនជាតិចិន បានធ្លាក់ចុះគួរឱ្យកត់ស ម្គាល់ដោយសារតែការធ្លាក់ចុះនៃប្រាក់យន់ ធៀបនឹងប្រាក់បាតរួមទាំងកំណើនសេដ្ឋកិច្ចរបស់ចិនយឺត ព្រោះតែកត្តាជម្ងឺវាយលុក រួមទាំងសង្គ្រាមពាណិជ្ជកម្មជាមួយអាមេរិកផងដែរ។
លក្ខខណ្ឌនៅក្នុងទីផ្សារខុនដូ ទីក្រុងបាងកកនៅឆ្នាំ២០២០ នៅតែមានលក្ខណៈស្រដៀងគ្នាទៅនឹងលក្ខខណ្ឌនៅឆ្នាំ២០១៩ ។ អ្នកអភិវឌ្ឍន៍នឹងឃ្លាំមើលទីផ្សារដោយយកចិត្តទុកដាក់ ហើយនឹងព្យាយាមពន្លឿនការស្ថាបនាគម្រោង ដែលអាចទទួលបានអត្ថប្រយោជន៍ពីវិធានការណ៍របស់រដ្ឋាភិបាល ក្នុងការជំរុញវិស័យអចលនទ្រព្យ។
ទីផ្សារមានការធ្លាក់ចុះជាបណ្តើរៗ ពីកម្រិតមុនប្រហែល១២០,០០០ បាតក្នុងមួយម៉ែត្រការ៉េ ខណៈដែលក្រុមហ៊ុនអភិវឌ្ឍន៍កាន់តែច្រើនវ ផ្តល់ជូននូវតម្លៃទាបជាង ១០០.០០០បាត ក្នុងមួយម៉ែតការ៉េឬ៣លានបាតសរុប ដែលជាតម្លៃដែលទាក់ទាញអតិថិជនថៃភាគច្រើន៕
