ដោយវុត្ថា
ភ្នំពេញ៖ រដ្ឋបាលខេត្តកោះកុង នឹងចាត់វិធានការតាមផ្លូវច្បាប់ជាធរមាន ចំពោះប្រជាពលរដ្ឋទាំងឡាយណាដែលមិនព្រមបញ្ឈប់ ហើយនៅតែបន្តចូលទៅទន្រ្ទានយកដីរបស់ក្រុមហ៊ុន UNION Development Co.,Ltd ធ្វើជាកម្មសិទ្ធិផ្ទាល់ខ្លួនដោយខុសច្បាប់ ។
យោងតាមសេចក្តីជូនដំណឹងរបស់រដ្ឋបាលខេត្តកោះកុងដែលចុះហត្ថលេខាដោយ លោកស្រី មិថុនា ភូថង អភិបាលខេត្តកោះកុងកាលពីថ្ងៃទី ៧ ខែកុម្ភៈ ឆ្នាំ ២០២០ ម្សិលមិញនេះ ឱ្យដឹងថា រដ្ឋបានខេត្តពិនិត្យឃើញថា មានប្រជាលរដ្ឋមួយចំនួនបានចូលទៅកាប់ទន្ទ្រានយកដីនៅក្នុងទីតាំងដីទំហំ ៩៣០៦ ហិកតា ធ្វើជាកម្មសិទ្ធិលក់ ទិញ និងផ្ទេរសិទ្ធិកាន់កាប់ខុសច្បាប់នៅក្នុងតំបន់វិនិយោគរបស់ក្រុមហ៊ុន UNION Development Co.,Ltd។
បើតាមសេចក្តីជូនដំណឹងដដែលបន្តថា ទីតំាងដីទំហំ ៩៣០៦ ហិកតាដែលបានកាត់ចេញពីឧទ្យានជាតិបទុមសាគរ តាមព្រះរាជក្រឹត្យលេខ នស/០៧១៦ ចុះថ្ងៃទី ២២ ខែកក្កដា ឆ្នាំ ២០១៦ សម្រាប់ផ្តល់ជាគោលនយោបាយបែងចែកជូនដល់ប្រជាពលរដ្ឋដែលត្រូវបានផ្លាស់ប្តូរលំនៅឋានចេញពីទីតាំងគម្រោងអភិវឌ្ឍន៍របស់ក្រុមហ៊ុន UNION Development Group Co.,Ltd តែប៉ុណ្ណោះ។
កន្លងមកសាលាខេត្តកោះកុង បានចេញសេចក្តីជូនដំណឹងលេខ ០៥២ សជណ ចុះថ្ងៃទី ៦ ខែសីហាឆ្នាំ ២០០៧ ស្តីពីការបញ្ឈប់បន្ទាន់នូវការចេញលិខិតផ្ទេរសិទ្ធិ ទិញ លក់ និងបែងចែកដីធ្លីនៅស្រុកគិរីសាគរ និងស្រុកបទុមសាគរ និងសេចក្តីសម្រេចលេខ ១១៥ សសរ ចុះថ្ងៃទី ២៩ ខែមេសា ឆ្នាំ ២០១០ ស្តីពីការទុកជាមោឃភាពនូវរាល់លិខិតផ្ទេរ លក់ ទិញដី នៅឧទ្យានជាតិបុទុមសាគរដែលចុះហត្ថលេខាដោយមេឃុំកោះស្តេច ភ្ញីមាស ព្រែកខ្សាច់ ក្នុងស្រុកគិរីសាគរ និងមេឃុំតានូន មេឃុំថ្មស ក្នុងស្រុកបូទុមសាគរដែលស្ថិនៅលើទីតាំងដីវិនិយោគអភិវឌ្ឍន៍របស់ក្រុមហ៊ុន UNION Development Group Co.,Ltd ។
