ក្រុមហ៊ុនអចលនទ្រព្យយក្ស ERA នឹងដើរតួដូចម្តេចក្នុងវិស័យ អចលទ្រព្យនៅកម្ពុជា

ដោយ ដួង ចន្រ្ទា
ភ្នំពេញ៖ ការមកដល់នៃក្រុមហ៊ុនអចលនទ្រព្យយក្សថ្មីមួយ គឺ ERA ដែលមានមូល ​ដ្ឋាននៅសហរដ្ឋអាមេរិក ដូចក្រុមហ៊ុន Century21 បានធ្វើឲ្យមានសំណួ​រ​ចោទឡើងជាច្រើនថា តើក្រុមហ៊ុនទាំងពីរនឹងប្រកួតប្រជែង ឬធ្វើការជាមួយគ្នាយ៉ាងដូច​ម្តេច?។

ពាក្យ ERA Realty Network (ERA) មានបទពិសោធន៍ជោគជ័យច្រើនឆ្នាំនៅសហរដ្ឋអាមេរិក និងបណ្តាប្រទេស តំបន់អាស៊ីជាច្រើន បានពង្រីកទីផ្សាររបស់ខ្លួនមកដល់ប្រទេសកម្ពុជាក្នុងពេលថ្មីៗនេះ។

យោងទៅតាមសេចក្តីប្រកាសព័ត៌មានរបស់ក្រុមហ៊ុន​​ ERA បានបង្ហា​ញ​ថា ERA Cambodia ត្រូវបានបង្ហាញឡើង នៅក្នុងអំឡុងពេលនៃសន្និសីទពាណិជ្ជកម្មអាស៊ីប៉ាស៊ីហ្វិក ប្រចាំឆ្នាំ ២០១៨ ដែល បានធ្វើនៅប្រទេសសិង្ហបុរី នាពេលថ្មីៗនេះ។ កម្ពុជាគឺជាប្រទេសទី៩ ដែលបានដាក់បញ្ចូលជាមួយ ក្រុមហ៊ុនក្នុងតំបន់អាស៊ីប៉ាស៊ីហ្វិក របស់ ERA ។

ក្រុមហ៊ុន ERA កំពុងប្រតិបត្តិការការងាររ​បស់ខ្លួននៅប្រទេសអាហ្វ្រីក ការាបៀន អឺរ៉ុប មជ្ឈិមបូព៌ា និងអាស៊ីប៉ាស៊ីភិច។ នៅក្នុងតំបន់អាស៊ី ក្រុមហ៊ុន ERA មានវត្តមាននៅក្នុង ប្រទេសសិង្ហបុរី ឥណ្ឌូណេស៊ី ជប៉ុន កូរ៉េ ម៉ាឡេស៊ី តៃវ៉ាន់ ថៃ និងវៀតណាម។ នៅក្នុងតំបន់អាស៊ីទាំងមូល​ក្រុមហ៊ុន ERA មានការិយាល័យចំនួន៦៦១កន្លែង និងមានភ្នាក់ងារអចលនទ្រព្យជិត១៧,៥០០នាក់ ហើយបច្ចុប្ប​ន្នរួមទាំងកម្ពុជាផងដែរ។

ប្រវត្តិERA
ក្រុមហ៊ុនERAបានបង្កើតឡើង នៅសហរដ្ឋអាមេរិកក្នុងទសវត្ស១៩៧០។ ភ្លាមៗបានក្លាយជាក្រុមហ៊ុនដំបូងគេ ដែលបានប្រើប្រាស់ម៉ាស៊ីនទូរសារក្នុងភ្ជាប់ទំនាក់ ទំនងរវាងអ្នកទិញ និងអ្នកលក់ អចលនទ្រព្យនៅទូទាំងសហរដ្ឋអាមេរិក។ ERA ក៏ជាភ្នាក់ងារអចលនទ្រព្យដំបូងបង្អស់ ដែលបានដាក់ អចលនទ្រព្យនៅក្នុងប្រព័ន្ធអនឡាញនៅឆ្នាំ ១៩៩៤ ។