ដោយ ៖ ដែន ចែងចាំង
ភ្នំពេញ ៖ ផ្សារទំនើបលំដាប់អន្តរជាតិ The Bridge Commercial បានសម្រេចពន្យាពេលបើកដំណើរការហើយ បន្ទាប់ពីផ្សារទំនើបនេះ បានប្រកាសបើកដំនើរការមុនពិធីបុណ្យចូលឆ្នាំខ្មែរប្រពៃណីជាតិ។
នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៩ មិនានេះថា ការបើកផ្សារទំនើបនេះនឹងពន្យាពេលដល់ត្រីមាសទី៣ ឆ្នាំ២០១៨ នេះ ដោយសារអ្នកអភិវឌ្ឍន៍លោកពន្យាគំរោងនេះ។ ផ្សារទំនើបនេះមានទំហំ ២០,០០០ម៉ែត្រ ការ៉េ កំពស់ ៥ជាន់ និងមានចំណតរថយន្តចំនួន ១៥០០គ្រឿង ។ អ្នកនាងបន្តថា ក្រុមហ៊ុន CBRE Cambodia ដើរតួនាទីជាតំណាងអ្នកអភិវឌ្ឍន៍ ដើម្បីជួលស្តង់ក្នុងផ្សារទំនើបនេះដល់អតិថិជន ហើយរហូតមកទល់ពេលនេះ ផ្សារទំនើបនេះទទួលបានអតិថិជនមកជួលច្រើនរួចហើយ។
-->
អ្នកនាងបន្តថា “យើងជឿជាក់ថាផ្សារនេះនឹងទទួលបានជោគជ័យ ដោយសារផ្សារនេះមានទីតាំងល្អ មានអតិថិជនស្រាប់នៅក្នុងគំរោងនេះ តំបន់នេះមានមនុស្សរស់នៅច្រើន ពិសេសទីតាំងសម្រាប់ភ្ញៀវទេសចរណ៍ផងដែរ”។អ្នកនាងបន្តថា “យើងមិនប្រកួតប្រជែងជាមួយផ្សារទំនើប AEON Mall ដែលនៅជិតគ្នានេះទេ ដោយយើងព្យាយាមបំពេញឲ្យគ្នាទៅវិញទៅមក និងព្យាយាមបែងចែកចំណែកទីផ្សារខុសៗគ្នា និងផ្តល់ផលិតផលថ្មីដែល AEON MAll មិនមាន”។
អ្នកនាង អាន សុធីតា បានបន្តថា រហូតមកទល់ពេលនេះ មានអតិថិជនដែលជាអ្នកវិនិយោគសឹង្ហបុរី និងអ្នកវិនិយោគអន្តរជាតិជាច្រើន បានចូលមកកាន់ទីផ្សារនេះ តាមរយៈការផ្តល់សេវាម្មម្ហូបអាហារ និងភេសជ្ជៈ សេវាកម្មសុខភាព និងសេវាកម្មក្លឹបហាត់ប្រាណ ព្រមទាំងសេវាកម្មពាក់ព័ន្ឋជាច្រើនទៀត។
គម្រោង The Bridge ជាគំរោងអភិវឌ្ឍន៍តាមទស្សនទានអភិវឌ្ឍន៍ថ្មីតំបូងគេនៅកម្ពុជា ដែលវិនិយោគរួមគ្នាដោយក្រុមហ៊ុន World Bridge Land និងក្រុមហ៊ុន Oxley Holding International ដែលមានមូលដ្ឋាននៅប្រទេសសឹង្ហបុរី។ ក្រុមហ៊ុនទាំងពីរបានបោះទុនរួមគ្នា៣០០លានដុល្លារ សាងសង់អាគារពាណិជ្ជកម្មចម្រុះរួមមានផ្សារទំនើប ខុនដូ ការិយាល័យនិងផ្ទះរួម (Soho) កំពស់៤៥ជាន់ស្ថិតក្នុងសង្កាត់ទន្លេបាសាក់ ខ័ណ្ឌចំការមករាជធានីភ្នំពេញ៕
