ដោយវុត្ថា
ភ្នំពេញ៖ រដ្ឋបាលរាជធានីភ្នំពេញ បានដាក់អោយប្រើប្រាស់ផ្លូវថ្មី ១ខ្សែ តភ្ជាប់ពីផ្លូវលេខ ២៨៣ ក្នុងភូមិសាស្ត្រខណ្ឌទួលគោក មកភ្ជាប់ផ្លូវក្នុងតំបន់គម្រោងបឹងកក់ ក្នុងភូមិសាស្ត្រខណ្ឌដូនពេញ។
រដ្ឋបាលរាជធានីភ្នំពេញ ដាក់អោយប្រើប្រាស់ផ្លូវថ្មី ១ខ្សែភ្ជាប់ពីខណ្ឌទួលគោកទៅខណ្ឌដូនពេញ
មន្ទីរសាធារណការ និងដឹកជញ្ជូនរាជធានីភ្នំពេញ នៅល្ងាចថ្ងៃទី១៣ខែកញ្ញាឆ្នាំ២០២០ ឱ្យដឹងថា ផ្លូវថ្មីនេះ ជាផ្លូវអ៊ុតកៅស៊ូ AC ទទឹង ២០ម៉ែត្រ ដែលនឹងជួយកាត់បន្ថយការកកស្ទះចរាចរនៅដងផ្លូវលេខ៧០ ផ្លូវលេខ ២៧៣ និងមហាវិថី សហព័ន្ឋរុស្ស៊ី។
មន្ទីរសាធារណការ បន្តថា “សូមបងប្អូនអញ្ជើញធ្វើដំណើរតាមផ្លូវថ្មី ភ្ជាប់ចរាចរពីខណ្ឌទួលគោកទៅខណ្ឌដូនពេញ ចាប់ពីពេលនេះតទៅ !” ។
រដ្ឋបាលរាជធានីភ្នំពេញបាននឹងកំពុងពង្រីក និង សាងសង់ផ្លូវថ្មីជាច្រើនខ្សែ នៅក្នុងមូលដ្ឋានរាជធានីភ្នំពេញ ដើម្បីសម្រួលដល់ចរាចរណ៍ និងធ្វើដំណើររបស់ប្រជាពលរដ្ឋឱ្យមានភាពងាយស្រួល ខណៈបច្ចុប្បន្ននេះ នៅតាមបណ្តាមហាវិថី និងផ្លូវមួយចំនួនក្នុងទីក្រុងភ្នំពេញបាននឹងកំពុងមមាញឹក និងកកស្ទះចរាចរណ៍។
លោក ឃួង ស្រេង អភិបាលរាជធានីភ្នំពេញកាលពីពេលថ្មីៗនេះ បានបើកការដ្ឋានស្ថាបនាមហាវិថីថ្មីមួយខ្សែដែលមានទទឹង៣០ម៉ែត្រ និងបណ្តោយផ្លូវជាង៥គីឡូម៉ែត្រ ដោយចាប់ពីផ្លូវលេខ១០០៣ ផ្លូវបត់ចូលផ្សារទំនើបអេអនម៉លសែនសុខ ស្របប្រឡាយមេខាងជើងរាជធានីភ្នំពេញ រហូតដល់មហាវិថីឈ្នះឈ្នះ ក្នុងខណ្ឌឫស្សីកែវ ។
លោកថ្លែងថា ក្រោមការដឹកនាំរបស់សម្តេចតេជោ ហ៊ុន សែនបានធ្វើអោយប្រទេសជាតិ មានសន្តិភាពពេញលេញ មានឱកាសក្នុងការអភិវឌ្ឍប្រទេសជាតិអោយរីកចំរើនយ៉ាងឆាប់រហ័ស។ ជាក់ស្តែងយើងបានស្ថាបនាឡើងជាផ្លូវថ្មីៗ ជាច្រើនខ្សែដែលអាចជួយកាត់បន្ថយការកកស្ទះចរាចរនៅក្នុងរាជធានីភ្នំពេញបានយ៉ាងច្រើងផងដែរ៕
