ដោយវុត្ថា
តូរ៉ង់តូៈ ក្រុមហ៊ុន Pinnacle International បានប្រកាសសាងសង់អគារខុនដូខ្ពស់បំផុតនៅក្នុងទីក្រុងតូរ៉ង់តូ ប្រទេសកាណាដា ក្នុងគម្រោងជំហានទី ២ (គម្រោងអភិវឌ្ឍន៍ Pinnacle One Yonge) ដែលនឹងក្លាយជាអគារខុនដូ លំនៅដ្ឋានខ្ពស់បំផុតមិនធ្លាប់មានពីមុនមក។
គម្រោងអគារនេះ នឹងត្រូវសាងសង់នៅក្នុងកម្រិតកំពស់៩៥ជាន់ ស្មើនឹង ៣១៣.៤ ម៉ែត្រ ដែលនឹងក្លាយជាអគារខ្ពស់ជាងគេទី២ នៅក្នុងទីក្រុងតូរ៉ង់តូ បន្ទាប់ពីអគារCN Tower ។ អគារខុនដូនេះ ត្រូវបានរចនាឱ្យមានបន្ទប់៨០០ បន្ទប់ដែលមានប្លង់ផ្សេងៗគ្នាចាប់ពី៥២០ ដល់ ២,៣០០ ហ្វីតការ៉េដោយមានតម្លៃចាប់ពីជាង ៨០០.០០០ ដុល្លារ។
លោក Anson Kwok អនុប្រធានផ្នែកលក់ និងទីផ្សាររបស់ក្រុមហ៊ុន Pinnacle International បានថ្លែងថា គម្រោងថ្មីរបស់យើងនេះ ត្រូវបានសាងសង់នៅទីតាំងដែលមានសក្តានុពល រួមជាមួយនឹងស្ថាបកម្មនៃសំណង់ល្អបំផុត។
លោកថ្លែងថា “វិធីសាស្ត្ររបស់យើងក្នុងដំណាក់កាល នៃការអភិវឌ្ឍន៍តាមផែនការមេនេះ ត្រូវបានផ្តោតលើការប្តេជ្ញាចិត្ត មិនត្រឹមតែគ្រាន់តែអភិវឌ្ឍន៍អគារខុនដូ នៅក្នុងទីប្រជុំជនប៉ុណ្ណោះទេ។ ផ្ទុយទៅវិញយើងបានទទួលស្គាល់ឯកសិទ្ធិពិសេស ដើម្បីធ្វើការផ្លាស់ប្តូរទីក្រុងតូរ៉ង់តូ តាមរយៈការអភិវឌ្ឍនអគារខ្ពស់ៗ (Toronto Skyline)” ។
អគារនេះ មិនត្រឹមផ្តល់ទេសភាពជុំវិញបឹង Lake Ontario អគារខុនដូនេះ ត្រូវបានរចនាប្លង់ជាមួយនឹងការស្រូបខ្យល់ អាកាសដ៏បរិសុទ្ធពីភ្នំ Tanner Hill ដែលនឹងធ្វើឱ្យជីវិតរស់នៅកាន់តែមានផាសុកភាព និងរវើក។ ក្រៅពីនេះគំរោងនេះ ក៏មានអាងហែលទឹកដ៏ធំ បន្ទប់ហាត់យោគៈ កន្លែងរៀបចំកម្មវិធីជប់លៀង និងកន្លែងសំរាកលំហែផងដែរ៕