ដោយវុត្ថា
ភ្នំពេញៈ ការបង្រួមក្បាលដី សំដៅដល់ការបញ្ជូលក្បាលដីច្រើន ដែលជាប់គ្នាឱ្យក្លាយដីតែមួយ ដោយដីទាំងនោះមានម្ចាស់កម្មសិទ្ធិតែមួយ ជាប្រភេទដីតែមួយនិងស្ថិតក្នុងភូមិសាស្ត្ររដ្ឋបាលតែមួយ។
ម្យ៉ាងទៀត សំដៅដល់ការបញ្ចូលក្បាលដីច្រើន ដែលជាប់គ្នាឱ្យទៅជាក្បាលដីតែមួយ ដើម្បីធ្វើផែនការអភិវឌ្ឍ សម្រាប់ធ្វើសមាហរណកម្ម និងធ្វើឱ្យប្រសើរឡើងនូវហេដ្ឋារចនាសម្ព័ន្ធសាធារណៈ សេវាសាធារណៈ និងភាពងាយស្រួលនៃទីក្រុង។ ការបង្រួមក្បាលដីប្រភេទនេះអាចហៅថា ការធ្វើសមាហរណកម្មក្បាលដី។
ការបំបែកក្បាលដីសំដៅដល់ការបំបែកក្បាលដីមួយ ឱ្យទៅជាក្បាលដីច្រើនសំរាប់ ការសាងសង់លំនៅដ្ឋាន អគារពាណិជ្ជកម្ម ឧស្សាហកម្ម។ល។ ដោយធានាបាននូវការរៀបចំហេដ្ឋារចនាសម្ព័ន្ធសាធារណៈ លំហសាធារណៈ ផ្ទៃបៃតង និងសេវាសាធារណៈ សមស្របតាមបញ្ញត្តិនៃការប្រើប្រាស់ដី។
១) តើក្នុងករណីដែលមានក្បាលដីមួយចំនួន ជាប់បន្ទុកនៅធនាគារ តើការបង្រួមក្បាលដី និងបំបែកក្បាលដី អាចធ្វើបានដែរឬទេ?
ចម្លើយ៖ ការចុះបញ្ជីបង្រួមឬបំបែកក្បាលដី ដែលកំពុងជាប់បន្ទុកអាចធ្វើបានលុះត្រាតែបំពេញនូវលក្ខខ័ណ្ឌមួយចំនួនដូចជា
១) បំពេញបាននូវលក្ខខណ្ឌជាក្បាលដីតែមួយ ដូចមានចែងក្នុងមាត្រា២២៧ នៃច្បាប់ភូមិបាល២០០១ (ករណីបង្រួមក្បាលដី)។
២) មាន ការយល់ព្រមពីម្ចាស់សិទ្ធិប្រាតិភោគ (ធនាគារម្ចាស់បំណុល) ឱ្យបង្រួមឬបំបែកក្បាលដី កំពុងជាប់បន្ទុកនោះ។
៣) ភាគីទាំងអស់ដែលមានផលប្រយោជន៍ពាក់ព័ន្ធ ត្រូវព្រមព្រៀងគ្នាអំពីលំដាប់នៃការចុះបញ្ជី ជាអាទិ៍ នៅពេលផ្ទេរការចុះបញ្ជីសិទ្ធិប្រាតិភោគ (ផ្ទេរបន្ទុក) ពីក្បាលដីចាស់ផ្សេងៗគ្នា ទៅប្រមូលផ្តុំនៅលើក្បាលដីថ្មីតែមួយ (ករណី បង្រួមក្បាលដី) ឬពីក្បាលដីចាស់តែមួយ ទៅពង្រាយលើក្បាលដីថ្មីជាច្រើន(ករណីបំបែកក្បាលដី)៕