ដោយៈ រ៉ាណេត
ភ្នំពេញៈ ជាមួយនឹងភាពពុះកញ្ជ្រោលនៃការអភិវឌ្ឍន៍ ក្នុងវិស័យខុនដូនៅកម្ពុជានាពេលបច្ចុប្បន្ន ជាពិសេសការផ្គត់ផ្គង់ខុនដូកម្រិតសមរម្យ ដែលកំពុងមានភាពមមាញឹក ប្រធានសមាគមអចលនទ្រព្យសកល ហៅកាត់ GRA បានអះអាងថា យ៉ាងយូរមិនលើសពី៥ឆ្នាំទៀតនោះទេ តម្រូវការប្រើប្រាស់លំនៅដ្ឋានសហកម្មសិទ្ធិ ឬខុនដូនេះ នឹងមានការកើនឡើងខ្ពស់ក្រោមហេតុផលសំខាន់ៗចំនួន។
ប្រធានសមាគមអចលនទ្រព្យសកល (GRA) លោក សំ សុខនឿន បានលើកឡើងថា ក្នុងរយៈពេល៥ឆ្នាំខាងមុននេះ ប្រជាជនខ្មែរនឹងមាននិន្នាកាប្រែប្រួលពីការទិញដីឡូតិ៍មកទិញខុនដូច្រើនឡើងៗ ហើយអ្នកអភិវឌ្ឍន៍ដីឡូតិ៍មួយចំនួន ក៏នឹងអាចងាកមកចាប់អារម្មណ៍លើការអភិវឌ្ឍន៍ គម្រោងខុនដូប្រភេទតម្លៃសមរម្យ ក្នុងកម្រិតណាមួយដើម្បីស្របតាមតម្រូវការទីផ្សារជាក់ស្ដែង។
លោកបានអះអាងថា មានកត្តាចំនួន៥ដែលជំរុញឱ្យប្រជាជនខ្មែរ ដែលរស់នៅក្នុងក្រុង និងជាយក្រុងងាកមកទិញខុនដូយ៉ាងប្រាកដ ដែលកត្តាទាំងនោះរួមមាន ទី១. កំណើនប្រជាជនក្នុងក្រុងកាន់តែច្រើនឡើងៗ ដែលបណ្តាលឲ្យចរាចរក្នុងក្រុងកាន់តែមហាញឹក ស្ទះចង្អៀត ពិបាកក្នុងការធ្វើដំណើរពីកន្លែងមួយ ទៅកន្លែងមួយដែលធ្វើឲ្យចំណាយពេលវេលាយូរនៃការធ្វើដំណើរ។
ទី២ ការអភិវឌ្ឍដីឡូតិ៍ និងការអភិវឌ្ឍនបុរីកាន់តែឆ្ងាយទៅៗពីទីក្រុង ដែលមានចំងាយលើសពី ៤០គីឡូម៉ែត្រ ដែលធ្វើឲ្យអ្នកទិញសម្រាប់សាងសង់ផ្ទះស្នាក់មានផលពិបាក ដែលក្រៅពីចំណាយថវិកាសាងសង់លំនៅដ្ឋាន ថែមទាំងត្រូវចំណាយពេលវេលាច្រើន ក្នុងការធ្វើដំណើចេញចូលក្រុងដើម្បីបំពេញការងារ និងប្រកបអាជីវកម្មប្រចាំថ្ងៃ។
ទី៣.គម្រោងអភិវឌ្ឍន៍ដីឡូតិ៍ អាចជួបបញ្ហាលំបាកនាពេលអនាគត ដែលបញ្ហាលំបាកទាំងនោះទាក់ទង នឹងការសាងសង់ហេដ្ឋារចនាសម្ព័ន្ធ ផ្លូវថ្នល់ ប្រព័ន្ធលូ ទឹកភ្លើង -ល-។
ទី៤ ជាមួយគ្នានេះ នៅពេលស្ថេរភាពនយោបាយ កំពុងតែមានលំនឹង សេដ្ឋកិច្ចប្រទេសកម្ពុជា កាន់តែល្អប្រសើរឡើងៗនាពេលអនាគត ចំណូលប្រជាជនខ្មែរកាន់តែកើនឡើង រួមជាមួយចំណេះដឹងនៃការគិតទៅលើផាសុកភាព នៃការរស់នៅកាន់តែខ្ពស់ នឹងធ្វើឲ្យពួកគាត់ចង់រស់នៅខុនដូ ដែលមានបណ្តុំសេវាជាច្រើន ដូចជា កន្លែងហាត់ប្រាណដើម្បីសុខភាព ស្ទីម សូណា មានអាងហែលទឹក ផ្សារទំនើប អាហារដ្ឋាន ដែលបង្កភាពងាយស្រួលក្នុងការរស់នៅ។
ទី៥. ដោយសារអ្នកអភិវឌ្ឍ ក៏ដូចជាក្រុមហ៊ុនភ្នាក់ងារទទួលលក់ ផ្តល់នូវលក្ខខណ្ឌងាយស្រួលក្នុងការទិញ និងមានកិច្ចសហការពីធនាគារ ដែលផ្តល់ជូននៃការបង់ប្រាក់រយៈពេលវែង ឬកម្ចីពីធនាគារដែលមានការប្រាក់ទាប និងអនុគ្រោះដល់អតិថិជនក្នុងការបង់ប្រាក់រំលស់ប្រចាំខែក្នុងកម្រិតទាប និងសមរម្យប្រហាក់ប្រហែលទៅនឹងការបង់រំលោះដីឡូតិ៍ ឬប្រហាក់ប្រហែលទៅនឹងតំលៃជួល ដែលគាត់កំពុងចំណាយសំរាប់ថ្លៃជួលរៀងរាល់ខែដែលត្រូវចំណាយផងដែរ៕
