ដោយ ៖ ដែន ចែងចាំង
ភ្នំពេញ ៖ នៅពេលឆាប់ៗខាងមុខនេះ ទីក្រុងសៀមរាបនឹងមានវត្តមានកាស៊ីណូជាលើកដំបូងក្នុងប្រវត្តិសាស្រ្តរបស់ខ្លួន ដែលផ្តល់ឲ្យភ្ញៀវទេសចរនូវកន្លែងកំសាន្តបន្ថែមទៀត ក្រៅពីប្រាសាទអង្គរវត្តដ៏ល្បីល្បាញ។
យោងតាមប្រភពព៌តមានអាចទុកចិត្តបានៗបង្ហើបឲ្យដឹងថា ក្រុមហ៊ុនកាស៊ីណូ Macau Legend Development ដែលចុះបញ្ជីក្នុងផ្សារហ៊ុនហុងកុងនឹងសាងសង់មជ្ឈមណ្ឌលកម្សាន្តដែលរួមមានកាស៊ីណូ និងសេវាមិនមែនល្បែងនៅក្នុងទីក្រុងទេសចរណ៍ប្រវត្តិសាស្ត្រ ដ៏ល្បីល្បាញរបស់កម្ពុជាដោយបញ្ជាក់ថា ក្រុមហ៊ុនកំពុងដំណើរការនីតិវិធីទិញដីសម្រាប់គម្រោងនេះ។
-->
បើតាមគេហទំព័រព័ត៌មានរបស់ GGR Asia ដែលជាគេហទំព័រព័ត៌មានអំពីឧស្សាហកម្មកាស៊ីណូបានរាយការណ៍ថា លោក Chow Kam Fai ប្រធានប្រតិបត្តិក្រុមហ៊ុន Macau Legend Development បានលើកឡើងនៅក្នុងកិច្ចប្រជុំប្រចាំឆ្នាំកាលពីថ្ងៃព្រហស្បតិ៍ថា នៅអំឡុងឆ្នាំនេះថា ក្រុមហ៊ុនរំពឹងថានឹងបញ្ចប់កិច្ចព្រមព្រៀងទិញដីសម្រាប់ទីតាំងកាស៊ីណូ និងសេវាមិនមែនល្បែងនៅសៀមរាប។
លោក Chow Kam Fai បានមានប្រសាសន៍ប្រាប់គេហទំព័រ GGR Asia កាលពីពេលថ្មីៗនេះថា និតិវិធីនៃការទិញដីនេះជិតបញ្ចប់ហើយ។ ទាក់ទងបញ្ហាសំខាន់ៗដូចជាទំហំគម្រោង និងបញ្ហាជាប់ពាក់ព័ន្ធផ្សេងទៀត ខ្ញុំជឿជាក់ថាយើងនឹងអាចបង្ហាញបញ្ហាទាំងនោះក្នុងរយៈពេលពី ២ ទៅ ៣ ខែទៀត»។
គេហទំព័រទេសចរណ៍ដ៏ល្បីល្បាញ TripAdvisor កាលពីសប្តាហ៍មុនបានចាត់ថ្នាក់ប្រាសាទអង្គរវត្តជាសំណង់បេតិកភ័ណ្ឌពិភពលោកដ៏ធំ និងល្បីល្បាញជាងគេនៅលើពិភពលោក ដោយរយៈពេល៥ខែដើមឆ្នាំនេះ ប្រាសាទអង្គរបានទាក់ទាញភ្ញៀវទេសចរចំនួន១,២០៦,១៨៨នាក់ កើនឡើង ១៣,៤២ ភាគរយធៀបរយៈពេលដូចគ្នាកាលពីឆ្នាំមុន និងទទួលបានចំណូលពីការលក់សំបុត្របានចំនួនជិត ៥៥ លាន ដុល្លារអាមេរិក។
ទោះជាយ៉ាងណាមន្រ្តីទទួលបន្ទុកការងារកាស៊ីណូនៅក្រសួងសេដ្ឋកិច្ច និងហិរញ្ញវត្ថុ លោក រស់ ភិរុណ អនុប្រធាននាយកដ្ឋានឧស្សាហកម្មហិរញ្ញវត្ថុបានឲ្យដឹងថា រដ្ឋាភិបាល នឹងមិនអនុញ្ញាតឲ្យមានការវិនិយោគលើកាស៊ីណូ នៅក្នុងខេត្តសៀមរាបនោះទេ៕
