ដោយ: គង់ សូរិយា
ភ្នំពេញ: ជាការកត់សម្គាល់ ចាប់ពីខែមករា ឆ្នាំ២០២១មកតម្លៃលក់រាយប្រេងឥន្ទនៈនៅកម្ពុជា បានកើនតម្លៃបន្តិចម្តងៗជាលំដាប់ ដោយប្រេងសាំងធម្មតាកើនពី ៣,២០០រៀល មកដល់ ៣,៧៥០រៀល ក្នុងមួយលីត្រ។
ជាមួយគ្នានេះ អ្នកជំនាញក្នុងវិស័យសេដ្ឋកិច្ចបានឱ្យដឹងថា ការឡើងថ្លៃនេះបណ្តាលមកពីស្ថានភាពសេដ្ឋកិច្ចនៅសហរដ្ឋអាមេរិក និងដោយសាររដ្ឋាភិបាលថ្មី ចាប់ផ្តើមដំណើរការឡើងវិញ។
លោកបណ្ឌិត គី សេរីវឌ្ឍន៍ អ្នកវិភាគសេដ្ឋកិច្ច កាលពីថ្ងៃទី១៦ ខែមីនា ឆ្នាំ២០២១កន្លងមកថា ការឡើងថ្លៃប្រេង ដោយសារតែអាមេរិក បានវាយលុកចូលទីផ្សារភាគហ៊ុននៃវិស័យប្រេង ទើបធ្វើឱ្យដំណើរការថ្លៃប្រេងល្អប្រសើរឡើងវិញ និងមានវិបត្តិមួយចំនួននៅក្នុងប្រទេសអារ៉ាប់សាអូឌីត។ ដូច្នេះវិបត្តិទាំងអស់នេះហើយ ធ្វើឱ្យថ្លៃប្រេងឡើងថ្លៃ។
លោកបន្តថា “ប្រទេសកម្ពុជាថ្វីត្បិតតែមានដំណក់ប្រេងខ្លួនឯង តែយើងមិនអាចចំរាញ់ប្រេងនេះ ទៅជាប្រេងសាំងប្រើក្នុងស្រុកទេ គឺយើងលក់ប្រេងឆៅ ដូច្នេះហើយប្រេងដែលប្រើបច្ចុប្បន្ននេះជាប្រេងនាំចូល”។ លោកបន្ថែមថា“ទោះជារដ្ឋាភិបាលបានធ្វើឧបត្ថម្ភធនទៅលើថ្លៃប្រេងដោយស្ងៀមស្ងាត់ ទាក់ទងទៅនឹងការបន្ធូរបន្ថយពន្ធនាំចូលថ្លៃប្រេងក៏ដោយ ក៏នៅតែថ្លៃប្រេងនៅតែមានកំណើនខ្ពស់ តាមរយះថ្លៃប្រេងអន្តរជាតិ”។
លោកបណ្ឌិតបានបន្តថា អញ្ចឹងផលប៉ះពាល់របស់វា គឺទៅលើក្រុមដែលរងគ្រោះនេះឯង គឺក្រុមសេវាដឹកជញ្ជូន ទី១ គាត់ឡើងថ្លៃដើមនេះហើយ ទី២កាត់បន្ថយនូវចំនួនអ្នកជិះបន្តទៅទៀត។
លោកបន្តថា “ចំណុចនេះជាចំណុចដែលប៉ះពាល់ ខ្ញុំជឿថាត្រូវតែមានការកែតម្រូវដោយសេដ្ឋកិច្ចខ្លួនឯង តួនាទីរបស់រដ្ឋាភិបាលក្នុងនោះខ្ញុំជឿថា អាចនឹងរដ្ឋាភិបាលដើរតួនាទីរយះពេលខ្លី សម្រាប់ទប់វិបត្តិនឹងបានដើម្បីកុំឱ្យវាឡើងលឿនពេក”។
ប្រជាពលរដ្ឋដែលប្រកបរបររត់ម៉ូតូឌុប និងម៉ូតូកង់បីបានត្អូញត្អែរថា ខណៈដែលជួបបញ្ហាប្រឈមនឹងជំងឺកូវីដ១៩ ជាពិសេសក្រោយព្រឹត្តិការណ៍សហគមន៍ ២០កុម្ភៈ ធ្វើឱ្យប៉ះពាល់យ៉ាងខ្លាំងដល់ប្រាក់ចំណូល ណាមួយថ្លៃចំណាយម្ហូបអាហារប្រចាំថ្ងៃផង និងមួយវិញទៀតបញ្ហាបំណុលដែលធ្វើឱ្យមានការលំបាក។
ថ្លៃលក់រាយប្រេងឥន្ធនៈ ពីថ្ងៃទី១៦ ដល់ថ្ងៃទី៣១ ខែមីនា ដើមឆ្នាំ២០២១ សម្រាប់ប្រេងសាំងធម្មតា ថ្លៃ៣,៧៥០រៀល ក្នុងមួយលីត្រ។ រីឯប្រេងម៉ាស៊ូតថ្លៃ ៣,៣៥០រៀល ក្នុងមួយលីត្រ៕
