ដោយៈ រ៉ាណេត
ភ្នំពេញៈ សមាគមរោងចក្រកាត់ដេរនៅកម្ពុជា (GMAC) បានអំពាវនាវសុំការយោគយល់ពីអ្នកបញ្ជាទិញ ព្រមទាំងអ្នកពាក់ព័ន្ធផ្សេងទៀត ក្នុងករណីមានការបញ្ជូនផលិតផលកាត់ដេរយឺតយ៉ាវ ដោយគ្មានការពិន័យ ក្នុងអំឡុងពេលកំពុងអនុវត្តវិធានការទប់ស្កាត់ការរីករាលដាលជំងឺកូវីដ១៩ ដោយការបិទរាជធានីភ្នំពេញ ក្រុងតាខ្មៅនៃខេត្តកណ្តាល រួមនឹងក្រុងតាមបណ្តាខេត្តមួយចំនួនទៀត។
យោងតាមសេចក្ដីថ្លែងការរណ៍ របស់សមាគមរោងចក្រកាត់ដេរនៅកម្ពុជា (GMAC) ដែលបានផ្សព្វផ្សាយនៅក្នុងសប្ដាហ៍នេះបានបញ្ជាក់ថា ក្រោមការចូលរួម អនុវត្តន៍ នូវវិធានការទប់ស្កាត់ការរីករាលដាលនៃជំងឺកូវីដ១៩ ដោយការបិទខ្ទប់រាជធានីភ្នំពេញ និងក្រុងតាខ្មៅ បានជះឥទ្ធិពលដល់ផលិតភាព នៃការផលិតសម្រាប់ការបញ្ជាទិញរបស់ទីផ្សារក្រៅស្រុកមួយចំនួន។
GMAC បានលើកឡើងនៅក្នុងសេចក្តីថ្លែងការណ៍នាពេលថ្មីៗនេះថា វិស័យកាត់ដេរសម្លៀកបំពាក់ ស្បែកជើង និងទំនិញធ្វើដំណើរ មិនត្រូវបានគេចាត់ទុកថាជាវិស័យសំខាន់ ដែលចាំបាច់ត្រូវបើកដំណើរការយ៉ាងសកម្ម នៅក្នុងអំឡុងពេលអនុវត្តបិទខ្ទប់រាជធានីភ្នំពេញ ក្រុងតាខ្មៅនៃខេត្តកណ្តាលនោះទេ ដូច្នេះចង្វាក់ផលិតកម្មនៃរោងចក្រមួយចំនួន ត្រូវបានហាមឃាត់សកម្មជាបណ្តោះអាសន្ន ដើម្បីសុវត្ថិភាពកម្មករដែលបម្រើការងារ។
ជាមួយគ្នានេះ ការអនុវត្តវិធានការបិទខ្ទប់នេះ ក៏បង្កការរំខានដល់វិស័យភស្តុភារផងដែរ ដោយមិនអាចដឹកជញ្ជូនវត្ថុធាតុដើម ឬទំនិញពាក់ព័ន្ធបានដោយសេរីនោះឡើយ។ លើសពីនេះទៀត កម្លាំងកម្មករ កម្មការិនីមួយចំនួនដែលស្នាក់នៅ មិនស្ថិតក្នុងទីតាំង តំបន់បិទខ្ទប់ក៏រងផលប៉ះពាល់ដូចគ្នា ដោយពិបាកក្នុងការធ្វើដំណើរឆ្លងកាត់តំបន់ហាមឃាត់មួយចំនួន ដូច្នេះដំណើរនៃចង្វាក់ផលិតកម្មរោងចក្រ អាចបណ្តាលឱ្យមានការពន្យាពេល ក្នុងការផលិត ក៏ដូចជាការខកខានមិនបានបំពេញ តាមកាលកំណត់ដឹកជញ្ជូនដូចដែលបានព្រមព្រៀងកន្លងមក។
សមាគមរោងចក្រកាត់ដេរនៅកម្ពុជា (GMAC) សូមអំពាវនាវឱ្យមានការយោគយល់ពីសំណាក់អ្នកបញ្ជាទិញ និងអ្នកពាក់ព័ន្ធជួយសម្រួល នៅក្នុងស្ថានភាពដ៏លំបាកមួយនេះ៕
