ដោយៈវឌ្ឈនៈ
ភ្នំពេញៈ នៅលើដងផ្លូវចរាចរណ៍ងវិញ ប្រជាពលរដ្ឋហាក់សប្បាយរីករាយ ជាមួយនឹងស្នាមញញឹម បន្ទាប់ពីពួកគេអាចចេញបំពេញការងារ ប្រកបមុខរបរ និងស្តារអាជីវកម្មឡើងវិញបណ្តើរ។
ក្នុងរយៈពេល៣សប្ដាហ៍កន្លងទៅផុតទៅ ដែលជាពេលវេលាបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្ដាល ទីបំផុតរដ្ឋាភិបាល ក៏បានសម្រេចបញ្ចប់ការបិទខ្ទប់និងអនុញ្ញាតឱ្យពលរដ្ឋនៅតំបន់លឿង ចេញប្រកបការងារនិងធ្វើការឡើងវិញ ដែលធ្វើឱ្យចរាចរណ៍នៅថ្ងៃដំបូងនៃការបើកទីក្រុងឡើងវិញ ចាប់ផ្ដើមមមាញឹកខ្លះៗដោយតំបន់។
កញ្ញាឡុង រចនា បុគ្គលិកធ្វើការក្រុមហ៊ុនឯកជនមួយនៅរាជធានីភ្នំពេញ បាននិយាយថា បន្ទាប់ពីរដ្ឋាភិបាលបានសម្រេចបិទខ្ទប់រាជធានីភ្នំពេញ រយៈពេល៣សប្ដាហ៍តាំងពីចូលឆ្នាំខ្មែរមក កញ្ញា និងសមាជិកគ្រួសារ ក្នុងផ្ទះមិនបានចេញទៅណានោះទេ ក្រៅតែពីចេញទៅចាក់វ៉ាក់សាំង និងទិញស្បៀងនៅជិតៗផ្ទះ។
កញ្ញាបន្តថា “វាពិតជាគួរឱ្យធុញខ្លាំងណាស់ ដែលត្រូវសំងំនៅក្នុងផ្ទះមួយថ្ងៃៗដោយមិនបានធ្វើអ្វី ប៉ុន្តែពេលនេះអារ្មណ៍ហាក់ធូរស្រាលបន្តិច។ កញ្ញាបន្តថា “ក្រោយពេលរដ្ឋាភិបាលប្រកាសបើកឡើងវិញនៅថ្ងៃនេះ កញ្ញាក៏បានចាកចេញពីផ្ទះនិងបានចាប់ផ្ដើមបំពេញការងារឡើងវិញ បន្ទាប់ពីខកខានជិតមួយខែកន្លងមក” ។
នៅថ្ងៃដំបូងនៃការបើកក្រុងនេះ កញ្ញាបានសង្កេតឃើញ តំបន់មួយចំនួននៅបិទដដែល ហើយទីតាំងដែលត្រូវធ្វើដំណើរឆ្លងកាត់ ដើម្បីទៅកាន់ធ្វើការក៏មិនអនុញ្ញាតឱ្យឆ្លងកាត់ដូច្នេះកញ្ញាត្រូវជិះទៅរកផ្លូវវាង ដើម្បីបានទៅការិយាល័យធ្វើការ ។
ដោយឡែកម្ចាស់ភោជនីយដ្ឋានមួយកន្លែង នៅជិតផ្សារកំបូលក្នុងខណ្ឌកំបូលក៏បានឱ្យដឹងថា ចាប់តាំងពីបិទខ្ទប់ភ្នំពេញមក អាជ្ញាធរក៏បានចុះបិទផ្លូវច្រកចេញចូលតូចធំនៅក្នុងតំបន់ ធ្វើឱ្យការលក់ដូរមិនដាច់ឡើយ ក៏ត្រូវបង្ខំចិត្តបិទទ្វារមួយរយៈ។ ក្រោយពេលដែលរដ្ឋាភិបាល ប្រកាសបើកផ្លូវនិងបញ្ចប់ការបិទខ្ទប់នោះ លោកក៏បានចាប់បើកដំណើរការឡើងវិញ ជាមួយការកុម្ម៉ង់ខ្ចប់តែប៉ុណ្ណោះ ហើយក៏មានភ្ញៀវមកទិញខ្ចប់ជាហូរហែរ គ្រាន់បានចំណូលខ្លះសម្រាប់បើកជូនបុគ្គលិករបស់ខ្លួន។
ទោះជាយ៉ាងណាអាជ្ញាធរ នៅតែជំរុញឲ្យប្រជាពលដ្ឋបង្ការហានិភ័យ នៃការឆ្លងរីករាលដាលជំងឺកូវីដ១៩ ហើយជំរុញឲ្យប្រជាពលរដ្ឋនៅផ្ទះ បើមិនចាំបាច់ និងអនុវត្តន៍តាមវិធានណែនាំរបស់ក្រសួងសុខាភិបាល ដោយអនុវត្តន៍នួវគោលការណ៍៣កុំ និង៣ការពារ៕
