ដោយៈម៉ាណេត
ភ្នំពេញៈ ក្រុមហ៊ុន Thaicom ដែលបានចុះបញ្ជីនៅក្នុងផ្សារហ៊ុនថៃ បានឱ្យដឹងថា ខ្លួនបានបណ្តាក់ទុនរួមគ្នា មួយក្រុមហ៊ុន CAT Telecom កាលពីពេលថ្មីៗនេះ នឹងបង្កើតមជ្ឈមណ្ឌលសេវាកម្មផ្កាយរណប លើគន្លងទាបពីផែនដី ដើម្បីបម្រើវិស័យបច្ចេកវិទ្យា 5G ដល់ទីផ្សារកម្ពុជា ឡាវ មីយ៉ាន់ម៉ា និងវៀតណាម (CLMV)។
ការបង្កើតក្រុមហ៊ុនបណ្តាក់ទុនរួមគ្នានេះ មានឈ្មោះថា Nation Space and Technology Co ខណៈក្រុមហ៊ុន Thaicom បានរាយការណ៍ទៅកាន់ផ្សារភាគហ៊ុនថៃកាលពីពេលថ្មីៗនេះ។ នេះបើយោងតាមការចុះផ្សាយ របស់កាសែតបាងកកប៉ុស្តិ៍កាលចុងសប្តាហ៍កន្លងមកនេះ។
លោក Anant Kaewruamvongs នាយកប្រតិបត្តិ Thaicom បានថ្លែងថា ផ្កាយរណប LEO មានចម្ងាយពី៥០០ ទៅ ២០០០គីឡូម៉ែត្រពីលើផ្ទៃដី បើប្រៀបធៀបទៅនឹងផ្កាយរណបភូមិសាស្ត្រ មានចម្ងាយ៣៦,០០០គីឡូម៉ែត្រ ដែលជាប្រភេទផ្កាយរណបទំនាក់ទំនងបែបបុរាណ។
លោកបន្តថា “គុណប្រយោជន៍នៃផ្កាយរណប LEO មានសេវាខ្លាំង ដែលអាចផ្តល់ផលប្រយោជន៍ដល់ប្រជាជន ដែលមានលទ្ធភាពទទួលបាន សេវាអ៊ីនធឺណេតល្បឿនលឿន តាមរយៈបច្ចេកវិទ្យា 5G ក៏ដូចជាការប្រើប្រាស់អ៊ីនធឺណេត នៃឧបករណ៍បច្ចេកវិទ្យាម៉ាស៊ីនពីមួយទៅមួយម៉ាស៊ីនដ្រូន និងកម្មវិធីដែល តម្រូវឱ្យមានភាពត្រឹមត្រូវខ្ពស់” ។
នៅក្នុងបណ្តាក់ទុនរួមគ្នានេះ ដែលមានដើមទុនចុះបញ្ជី១០លានបាត ក្រុមហ៊ុន Thaicom កាន់កាប់ភាគហ៊ុន៧៥% ចំណែកក្រុមហ៊ុន CAT កាន់កាប់២៥% ។ បណ្តាក់ទុនរួមគ្នានេះ មានគោលបំណងផ្តល់សេវាកម្ម និងដំណោះស្រាយបច្ចេកវិទ្យា។
គម្រោងផ្កាយរណប LEO ត្រូវបានដំណើរការដោយក្រុមហ៊ុនធំៗ ចំនួនពីរគឺក្រុមហ៊ុន Space Exploration Technologies Corp (SpaceX) និងក្រុមហ៊ុនផ្តល់សេវាកម្មអ៊ីនធឺណេត OneWeb ដែលមូលដ្ឋាននៅប្រទេសអង់គ្លេស ។
ផ្កាយរណប LEO ត្រូវបានដាក់ឱ្យដំណើរការ ហើយសេវាកម្មពាណិជ្ជកម្មត្រូវបានរំពឹងថានឹងចាប់ផ្តើមនៅឆ្នាំក្រោយ៕
