ដោយៈសុខុម
រ៉ង់ហ្គូនៈ ក្រុមមេដឹកនាំយោធារបស់ប្រទេសមីយ៉ាន់ម៉ា បានអនុម័តការវិនិយោគថ្មីលើគម្រោងនានា ដែលមានទំហំទឹកប្រាក់ជិត២,៨ពាន់លានដុល្លារអាមេរិក រួមទាំងរោងចក្រថាមពលឧស្ម័នធម្មជាតិរាវ (LNG) ដែលមានទំហំ២,៥ពាន់លានដុល្លារអាមេរិក ផងដែរ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី៩ ឧសភា។
យោងតាមសេចក្តីថ្លែងការណ៍មួយ លើគេហទំព័ររបស់អគ្គនាយកដ្ឋានគ្រប់គ្រងការវិនិយោគ និងក្រុមហ៊ុន (Directorate of Investment and Company Administration) បានឱ្យដឹងថា គណៈកម្មការវិនិយោគមីយ៉ាន់ម៉ា បានអនុម័តលើគម្រោងចំនួន១៥កាលពីថ្ងៃទី៩ ឧសភា។
ការប្រកាសនេះ ធ្វើឡើងស្របពេលសេដ្ឋកិច្ចរបស់មីយ៉ាន់ម៉ា ជាប់គាំងមួយចំនួនធំដោយសារបាតុកម្ម និងកូដកម្ម ចាប់តាំងពីកងទ័ពដណ្ដើមអំណាចនៅថ្ងៃទី១ ខែកុម្ភៈ។ ទីភ្នាក់ងារវាយតម្លៃឥណទានអន្តរជាតិ Fitch Solutions បានព្យាករថា សេដ្ឋកិច្ចប្រទេសនេះនឹងធ្លាក់ចុះ២០%នៅឆ្នាំនេះ។
សេចក្តីថ្លែងការណ៍ដដែលបានបញ្ជាក់ថា បន្ថែមពីលើរោងចក្រផលិតថាមពលសម្រាប់បំពេញតម្រូវការក្នុងស្រុក គម្រោងផ្សេងៗទៀត ដែលត្រូវបានអនុម័តរួមមានវិស័យបសុសត្វ ផលិតកម្ម និងសេវាកម្ម។
ទោះជាយ៉ាងណា សេចក្ដីថ្លែងការណ៍នេះ មិនបានផ្តល់ព័ត៌មានលម្អិតអំពីបណ្ដាក្រុមហ៊ុន ដែលនៅពីក្រោយគម្រោងទាំងនោះឬថា តើក្រុមហ៊ុនទាំងនោះមកពីប្រទេសណាខ្លះឡើយ។ វិនិយោគិនធំបំផុតនៅប្រទេសមីយ៉ាន់ម៉ា ក្នុងរយៈពេលប៉ុន្មានឆ្នាំចុងក្រោយនេះគឺមហាយក្សចិន សិង្ហបុរី និងថៃ។
បច្ចុប្បន្ន ថាមពលអគ្គិសនីភាគច្រើនរបស់មីយ៉ាន់ម៉ា ផលិតចេញពីគម្រោងវារីអគ្គិសនី ប៉ុន្តែឧស្ម័នធម្មជាតិរាវ (LNG) ត្រូវគេមើលឃើញថា មានសារៈសំខាន់កាន់តែខ្លាំងឡើង សម្រាប់ប្រទេសនេះ ដែលសេដ្ឋកិច្ចរីកចម្រើនយ៉ាងឆាប់រហ័ស អំឡុងពេលមួយទសវត្សរ៍ នៃការកែទម្រង់ប្រជាធិបតេយ្យ៕
