ដោយៈគង់ សូរិយា
ភ្នំពេញៈ អ្នកនៅក្នុងឧស្សាហកម្មយានយន្តបានអះអាងថា ទីផ្សាររថយន្តថ្មីបានកើនឡើងដល់៣០ភាគរយ ក្នុងរយៈពេលប៉ុន្មានឆ្នាំចុងក្រោយនេះ ដោយសារអ្នកប្រើប្រាស់មានការយល់ដឹងជាងមុន និងកត្តាតម្លៃមានភាពប្រហាក់ប្រហែលរថយន្តមួយតឹក និងកត្តាជាច្រើនទៀត។
អគ្គនាយកក្រុមហ៊ុនRMA Cambodia លោក ងន សាំងបានមានប្រសាសន៍ឲ្យដឹងថា ការកើនឡើងចំណែកទីផ្សារថយន្តថ្មី មួយផ្នែកគឺដោយសារតែការបន្ធូបន្ថយអត្រាអាករពិសេស លើមុខទំនិញរថយន្តមួយចំនួនចាប់ពី១០ ទៅ២០ភាគរយកាលពីដើមខែកុម្ភៈ ឆ្នាំ២០២១នេះ។
លោកបានបន្តថា “ការបន្ថយអត្រាអាករពិសេសនេះ បានជួយដល់ទីផ្សាររថយន្តថ្មីនៅកម្ពុជា ពីព្រោះតម្លៃរថយន្តថ្មីបានធ្លាក់ចុះខ្លះ ធ្វើឱ្យតម្លៃប្រហាក់ប្រហែលរថយន្តមួយទឹក”។លោកបន្តថា “ដោយសារតែប្រជាពលរដ្ឋយល់ដឹងច្រើន ពីសារៈប្រយោជន៍នៃរថយន្តថ្មី ដែលស៊ីប្រេងតិច ហើយការថែទាំក៏ចំណាយថវិការតិច ជាងរថយន្តមួយទឹក។
ចំណែករថយន្តមួយទឹក អ្នកទិញពិបាកមើលពីប្រវត្តរថយន្ត មិនដឹងថាតើរថយន្តនោះធ្លាប់បុក ឫប៉ះទង្គិចគ្នាពីមុនមកឫអត់”។
លោក ងន សាំង បានបន្តថា ការលក់ថយន្ត ទាំងរថយន្តមួយទឹក និងរថយន្តថ្មី បានថយចុះអស់ប្រមាណ៣០ភាគរយ ដោយសារតែឥទ្ធិពលនៃជំងឺកូវីដ១៩ ដែលបានប៉ះពាល់ដល់ប្រាក់ចំណូល និងជីវភាពរបស់ប្រជាជនកម្ពុជា។
បើយោងតាមរបាយការណ៍ក្រសួងពាណិជ្ជកម្ម វិបត្តិនៃការឆ្លងរាលដាលជំងឺកូវីដ ១៩ បានធ្វើឱ្យទឹកប្រាក់នៃការនាំចូលរថយន្តពីបរទេសមកកម្ពុជាក្នុងឆ្នាំ ២០២០ ធ្លាក់ចុះជាង៣៦ភាគរយ បើធៀបនឹងឆ្នាំ២០១៩។ កម្ពុជាបានចំណាយប្រាក់១០៩៩លានដុល្លារ ទៅលើការនាំចូលរថយន្ត ពីទីផ្សារអន្តរជាតិក្នុងឆ្នាំ២០២០ ដែលចំនួននេះធ្លាក់ចុះពី១ ៧៣៤លានដុល្លារក្នុងឆ្នាំ ២០១៩។
ការធ្លាក់ចុះនៃចំនួនទឹកប្រាក់នាំចូលរថយន្ត បានធ្វើឱ្យការប្រមូលចំណូលពន្ធគយរបស់កម្ពុជាក្នុងឆ្នាំ២០២០ ធ្លាក់ចុះប្រមាណ៣០,២៦លានដុល្លារ។ នេះបើតាមលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ៕
