ដោយៈ ម៉ាណេត
ភ្នំពេញៈ ក្រុមហ៊ុនប្រេងឥន្ធនៈ និងអាជីវកម្មលក់រាយខ្នាតយក្សរបស់ថៃPTT Oil and Retail Business (PTTOR) ដែលត្រូវបានស្គាល់ថាPTT គ្រោងបង្កើនការវិនិយោគលើការបង្កើតសាខាស្ថានីយ៍ជាច្រើនបន្ថែមនៅកម្ពុជា និងបណ្តាប្រទេសជាច្រើននៅក្នុងតំបន់ឆ្នាំ២០២២។ នេះបើយោងតាមការចេញផ្សាយកាសែតបាងកកប៉ុស្តិ៍ នៅថ្ងៃទី៥ ខែកក្កដា ឆ្នាំ២០២១។
លោកស្រី Jiraphon Kawswat ប្រធាននិងនាយកប្រតិបត្តិនៃក្រុមហ៊ុន PTTOR បានថ្លែងដូច្នេះថា “ការងារបន្ទាប់នៅឆ្នាំនេះ គឺពង្រីកសាខាស្ថានីយ៍ប្រេងTPP ចំនួន១៩២សាខាប្រទេសថៃ មីយ៉ាន់ម៉ា ឡាវ កម្ពុជា និងហ្វីលីពីន”។ ទោះបីយ៉ាងណាក៏ដោយ លោកស្រីមិនបានបញ្ជាក់ថា តើក្រុមហ៊ុននឹងបង្កើតសាខាស្ថានីយ៍ចំនួនប៉ុន្មាន នៅកម្ពុជានោះទេ។
-->
កាលពីថ្មីៗនេះ ក្រុមហ៊ុនប្រកាសថា គ្រោងចំណាយដើមទុនរហូតដល់ទៅ៧៤,៦ពាន់លានបាត (ប្រមាណ២,៥ពាន់លានដុល្លារអាមេរិក) សម្រាប់ផែនការពង្រីកអាជីវកម្មស្នូលទាំង៣ របស់ខ្លួនពីឆ្នាំ២០២១ ដល់ឆ្នាំ២០២៥។
ក្នុងចំណោមដើមទុនសរុបយ៉ាងច្រើន សន្ធឹកសន្ធាប់នេះចំនួន៣៤,៦% នឹងត្រូវយកទៅវិនិយោគ លើអាជីវកម្មប្រេងឥន្ធនៈ២៨,៦% វិនិយោគលើអាជីវកម្មមិនមែនប្រេង និង២១,៨% វិនិយោគលើអាជីវកម្មអន្តរជាតិរបស់ខ្លួន។ ហើយសល់១៥% ទៀតនឹងត្រូវវិនិយោគលើអាជីវកម្មផ្សេងៗទៀត និងលើការស្វែងរកឱកាសអាជីវកម្មថ្មីៗ។
លោកស្រី Jiraphon Kawswat បានគូសបញ្ជាក់ថា សម្រាប់អាជីវកម្មប្រេងឥន្ធនៈរបស់ខ្លួន ក្រុមហ៊ុនមានគម្រោងបង្កើនស្ថានីយប្រេងPTT នៅក្នុងប្រទេសថៃពីចំនួន១.៩៨៦ស្ថានីយ ដល់៣.១០០ស្ថានីយត្រឹមឆ្នាំ២០២៥។
សម្រាប់អាជីវកម្មមិនមែនប្រេងឥន្ធនៈរបស់ខ្លួន ក្រុមហ៊ុនមានគម្រោងពង្រីកហាងកាហ្វេ Cafe Amazon ក្នុងប្រទេសថៃ ពីចំនួន៣.១៨៦សាខា ដល់៥.៨០០សាខា។ សម្រាប់អាជីវកម្មអន្តរជាតិរបស់ខ្លួន ក្រុមហ៊ុននឹងផ្ដោតលើការពង្រីក ស្ថានីយប្រេងឥន្ធនៈ និងសាខាហាងកាហ្វេ Cafe Amazon ក្នុងប្រទេសកម្ពុជា ឡាវ មីយ៉ាន់ម៉ា វៀតណាម និងហ្វីលីពីន៕
