ដោយៈ វឌ្ឍនៈ
ភ្នំពេញៈ នៅក្នុងវិបត្តិកូវីដ១៩តាំងពីឆ្នាំ២០២០មក ការវិនិយោគពីប្រទេសទៅលើគម្រោងអភិវឌ្ឍន៍អចលនទ្រព្យបានថមថយបន្តិចម្ដងៗរហូតសឹងតែអត់តែម្ដង តែជំនួសមកវិញដោយគម្រោងវិនិយោគរបស់វិនិយោគិនក្នុងស្រុក ។
ក្នុងនោះគេសង្កេតឃើញថា គម្រោងថ្មីៗជាច្រើនទាំងនៅភ្នំពេញ និងតាមបណ្ដាខេត្តជាគម្រោងរបស់វិនិយោគិនក្នុងស្រុក។ អ្នកជំនាញវិស័យអចលនទ្រព្យជាច្រើនបានលើកឡើងថា ចាប់តាំងពីវិបត្តិនៃជំងឺកូវីដ១៩ វិនិយោគិនបរទេសមិនអាចចេញធ្វើដំណើរឆ្លងប្រទេសបានដូចមុនឡើយ ទើបធ្វើឱ្យគម្រោងវិនិយោគអចលនទ្រព្យនៅក្នុងប្រទេសពីបរទេសបានថមថយតែជំនួសមកវិញនូវវិនិយោគក្នុងស្រុក។
អ្នកនាងគឹម គិនកេសាប្រធានគ្រប់គ្រងជាន់ខ្ពស់ផ្នែកសិក្សាស្រាវជា្រវនៃក្រុមហ៊ុនCBRE Cambodia បានលើកឡើងថ្ងៃទី១១ ខែសីហា ឆ្នាំ២០២១ នេះថា វិបត្តិកូវីដ១៩ បានធ្វើឱ្យគម្រោងវិនិយោគអចលនទ្រព្យពីបរទេសមានការថមថយ តែជំនួសឱ្យវិនិយោគិនក្នុងស្រុក។
អ្នកនាងបានឱ្យដឹងទៀតថា សម្រាប់នៅឆ្នាំ២០២១នេះ ក្នុងស្ថានភាពកូវីដ១៩នៅតែបន្តរាលដាល ការរំពឹងត្រលប់មកវិញនៃវិនិយោគិនបរទេសប្រហែលជានៅឆ្ងាយបន្តទៀត តែបើសិនជាកូវីដ១៩នៅកម្ពុជាបានប្រសើរវិញ វិនិយោគិនបរទេសនឹងអាចចូលមកកម្ពុជាដដើម្បីស្វែងរកការវិនិយោគឡើងវិញ ។
លោកគាម សៀកឡុងស្ថាបនិកនៃក្រុមហ៊ុនអចលនទ្រព្យCentury 21 Dream Property ក៏បានលើកឡើងផងដែរថា វិបត្តិកូវីដ១៩ គ្មានអ្នកណាម្នាក់អាចដឹងថាវានឹងបញ្ចប់នៅពេលណានោះទេ ហើយថ្មីៗនេះសម្ដេចនាយករដ្ឋមន្ត្រីនៃព្រះរាជាណាចក្រកម្ពុជាក៏បានប្រកាសថាត្រូវរៀនរស់ជាមួយកូវីដ១៩ ក្នុងបរិបទនេះ។
លោកបន្តថា ចាប់តាំងពីផ្ទុះជំងឺកូវីដ១៩មក គម្រោងវិនិយោគបរទេសលើវិស័យអចលនទ្រព្យស្ទើរតែអត់មានប៉ុន្តែក៏មានការវិនិយោគពីវិនិយោគិនក្នុងស្រុកជាបន្តបន្ទាប់ ជាពិសេសទៅលើគម្រោងអភិវឌ្ឍន៍លំនៅឋាន ដែលយើងបានឃើញស្រាប់ហើយ គម្រោងវិនិយោគលំនៅឋានបានបន្តអភិវឌ្ឍន៍ដោយមិនមានផ្អាកដំណើរការឬបញ្ឈប់នោះទេ។
ទោះបីជាវិបត្តិកូវីដ១៩នៅតែបន្តអូសបន្លាយក្ដី វិនិយោគិនក្នុងស្រុកជាច្រើននៅតែមានសុទិដ្ឋិនិយមថា វិបត្តិនឹងបញ្ចប់ហើយវិនិយោគិនបរទេសនឹងត្រលប់ចូលមកបណ្ដាក់ទុនវិនិយោគនៅក្នុងប្រទេសកម្ពុជាឡើងវិញដូច្នេះអ្វីដែលវិនិយោគិនត្រូវធ្វើនោះគឺការត្រៀមខ្លួនទទួលស្វាគមន៍វិនិយោគិនបរទេសដែលនឹងត្រលប់មកវិញនៅពេលខាងមុខនេះ៕
