ដោយៈគង់ សូរិយា
ភ្នំពេញៈ សមាគមអចលនទ្រព្យសកល (GRA) បានសម្រេចតែងតាំងលោកឡោ វិចិត្រ ជាប្រធានសាខាសមាគមនេះ ប្រចាំរាជធានីភ្នំពេញ ដើម្បីពង្រីកសក្តានុពលរបស់សមាគមនេះ ក្នុងការលើកស្ទួយវិស័យអចលនទ្រព្យនៅកម្ពុជា។
លោកឧកញ៉ាសំ សុខនឿប្រធានសមាគមអចលនទ្រព្យសកល បានមានប្រសាសន៍ឲ្យដឹងកាលពីចុងសប្តាហ៍មុនថា ការសម្រេចចិត្តតែងតាំងលោកឡោ វិចិត្រជាប្រធានសាខាសមាគមប្រចាំរាជធានីភ្នំពេញ ដោយសារលោកមើលឃើញថា គាត់ជាមនុស្សមានសមត្ថភាពជាច្រើន ពិសេសលើវិស័យសំណង់ និងអចលនទ្រព្យនៅកម្ពុជា ដោយលោកបានសិក្សាពីនិន្នាការទីផ្សារក្នុងស្រុក និងនិន្នាការរបស់អ្នកវិនិយោគអន្តរជាតិ។
លោកឧកញ៉ាបានបន្តថា “លោកវិចិត្រ ជាមនុស្សមានសមត្ថភាព និងមានទំនាក់ទំនងល្អក្នុងសង្គមការងារ ក៏ដូចជាចូលរួមលើកស្ទួយអ្នកជំនួញជាស្រ្តី ដើម្បីទទួលបានផលប្រយោជន៍ និងទាញយកផលប្រយោជន៍បានកាន់តែច្រើន ពីការរីកចម្រើនសេដ្ឋកិច្ចជាតិ”។
លោកបន្តថា ការតែងតាំងសមាសភាពថ្នាក់ដឹកនាំ សមាគមជាបន្តបន្ទាប់ គឺជាការពង្រឹងរចនាសម្ព័ន្ឋដឹកនាំរបស់សមាគម ដើម្បីអាចចូលរួមអភិវឌ្ឍន៍ប្រទេសជាតិ ជាមួយរាជរដ្ឋាភិបាលបានកាន់តែច្រើននាពេលអនាគត។
លោកឧកញ៉ាបានបន្តថា ដោយមានបេសកកម្ម និងចក្ចុវិស័យច្បាស់លាស់ សមាគមនឹងពង្រីកការិយាល័យ នៅក្រៅប្រទេសបន្ថែមទៀតនាពេលអនាគត ដើម្បីទាក់ទាញវិនិយោគិនអន្តរជាតិ មកវិនិយោគនៅកម្ពុជាកាន់តែច្រើន។
លោកឡោ វិចិត្រប្រធានសាខាសមាគមអចលនទ្រព្យសកលប្រចាំរាជធានីភ្នំពេញបានមានប្រសាសន៍ ដោយបានសម្តែងក្តីរីករាយ និងបានចាត់ទុកជាកិត្តិយសដ៏ឧត្តុងឧ ត្តមមួយ ដែលប្រធាន GRA តែងតាំងជាប្រធានសាខារបស់សមាគមនេះ។
លោកបន្តថា រាជធានីភ្នំពេញ ជាបេះដូងនៃព្រះរាជាណាចក្រកម្ពុជា ដែលជាមជ្ឈមណ្ឌលសេដ្ឋកិច្ច វប្បធ៌ម នយោបាយ ហេតុនេះការរីកចម្រើនវិស័យអចលនទ្រព្យនៅរាជធានៅភ្នំពេញ ពិតជាសំខាន់ណាស់ ព្រោះរាជធានីនេះ ប្រៀបដូចជាក្បាលរថភ្លើងមួយ ក្នុងការធ្វើឲ្យវិស័យនេះកាន់តែមានកំនើនខ្លាំង ដោយសារតែអ្នកវិនិយោគភាគច្រើនបានធ្វើការវិនិយោគនៅរាជធានីនេះ។
លោកបន្តថា “ក្នុងតួនាទីជាប្រធានសាខាសមាគមប្រចាំរាជធានីភ្នំពេញ ខ្ញុំគិតថា វាជាតួនាទីសំខាន់ ដែលខ្ញុំអាចចូលរួមចែករំលែកចំណេះដឹង ការផ្សព្វផ្សាយ ក៏ដូចចូលរួម លើកកំពស់វិស័យនេះ ឲ្យកាន់តែរីកចម្រើនជាងមុន ស្របតាមយុទ្ឋសាស្រ្តចតុកោណរបស់រាជរដ្ឋាភិបាលកម្ពុជា”៕
