ដោយស៊ីវ ម៉េង
ភ្នំពេញៈ ជាការពិត ការវិនិយោគលើអចលនទ្រព្យ លើប្រភេទណាក៏ដោយ ក៏មានផលល្អ និងបានផលចំណេញផងដែរ តែគ្រាន់តែផលចំណេញពីការវិនិយោគខ្លះ មានការយឺតយ៉ាវតិច រឺច្រើនតែប៉ុណ្ណោះ។
លោក សំ សុខនឿន ប្រធានសមាគមនអចលនទ្រព្យសកល (GRA) បានចែករំលែកនូវបទពិសោធន៍សមខាន់ៗមួយចំនួនថា ការវិនិយោគនីមួយៗ គឺផ្អែកទៅលើស្ថានភាព និងហិរញ្ញវត្ថុរបស់អ្នកវិនិយោគ។ លោកបានចែករំលែកនូវចំណេះដឹងទាក់ទងនឹងផ្នែកសំខាន់ៗនៃអចលនទ្រព្យដូចជា៖
វិនិយោគដីឡូត៍ៈ
អ្នកវិនិយោគដីឡូត៍ជាទូទៅ គឺជាអ្នកវិនិយោគ ដែលមានស្ថានភាពប្រាក់ចំនូលទាប ឬមិនមានលុយគ្រប់ទាំងមូលក្នុងការទិញនោះទេ អ្នកវិនិយោគលើដីឡូត៍នេះ ជាអ្នកវិនិយោគ ដែលមានចំណូលជាប្រចាំខែហើយ អាចបង់លុយជាប្រចាំខែ សម្រាប់ការទិញដីឡូត៍ ដែលចាត់ទុកជាការសន្សំប្រាក់លើដីឡូត៍ និងសង្ឃឹមថាមានផលចំណេញខ្លះៗនាពេលអនាគត។
ការវិនិយោគលើដីឡូត៍ មិនអាចឲ្យយើងបានផលចំណេញខ្ពស់ ពីការវិនិយោគបានឡើយ ព្រោះគម្រោងដីឡូត៍ជាទូទៅ គឺនៅឆ្ងាយពីក្រុង ហេដ្ឋារចនាសម្ព័ន្ធមិនទាន់បានល្អប្រសើរ និងត្រូវការរង់ចាំរយ:ពេលយូរ ហើយតម្លៃដែលដាក់លក់ពីអ្នកអភិវឌ្ឍមានតម្លៃថ្លៃរួចទៅហើយ បើប្រៀបធៀបនឹងតម្លៃ ដែលអ្នកអភិវឌ្ឍន៍បានទិញ ឬតម្លៃទីផ្សារតំបន់នោះ ប្រសិន បើលោកអ្នកចង់ចំណេញបានឆាប់រហ័ស លោកអ្នកមិនគួរវិនិយោគលើដីឡូត៍ឡើយ។ តែការទិញដីឡូត៍ គឺជាការសន្សំប្រាក់យ៉ាងល្អបំផុត ដែលអ្នកបានផលចំណេញខ្លះៗពេលអនាគត។
វិនិយោគផ្ទះក្នុងបុរីៈ
អ្នកវិនិយោគផ្ទះក្នុងបុរី គឺជាអ្នកវិនិយោគ ដែលបានសាច់ប្រាក់ រឺចំណូលមធ្យមឡើងទៅ ដែលអ្នកវិនិយោគប្រភេទនេះអាចបាន ផលចំណេញពីការវិនិយោគ ផ្ទះក្នុងបុរីចាប់តាំងពីអំឡុងពេលបុកគ្រឹះដំបូង រហូតដល់ផ្ទះសាងសង់រួច។ អ្នកវិនិយោគអាចចំណេញបានរង្វង់៥០% ក្នុងរយៈពេល២ឆ្នាំទៅ៣ឆ្នាំ ។
ប៉ុន្តែសុំបញ្ជាក់ថា អ្នកវិនិយោគប្រភេទអចលនទ្រព្យនេះ គឺជាអ្នកមានចំណូលថេរ និងកម្រិតពីមធ្យមឡើងទៅ។
វិនិយោគខុនដូៈ
ខុនដូគឺជាអគារសហកម្មសិទ្ធ ដែលជាទូទៅស្ថិតនៅក្នុងក្រុងភ្នំពេញ ស្ថិតនៅតំបន់ដែលមានតម្លៃដីថ្លៃ មិនអាចសាងសង់ជាបុរីបាន ហើយជាទូទៅអ្នករស់នៅ គឺជាអ្នកមានជីវភាពធូរធារ និងចង់បានការរស់នៅបែបស៊ីវិល័យ និងទាន់សម័យ។
អ្នកវិនិយោគអចលនទ្រព្យប្រភេទនេះ ជាអ្នកដែលចង់បានប្រាក់ចំណូលប្រចាំខែពីការជួលត្រលប់មកវិញ ដែលជាទូទៅខុនដូពិបាកនឹងលក់បន្ត និងមិនសូវបានផលចំណេញពីការលក់បន្តនោះទេ។ តែតម្លៃជួលរបស់ខុនដូ អាចបានផលចំណេញរហូតដល់១២%ក្នុងមួយឆ្នាំ ដែលជាអាត្រាខ្ពស់បើបៀបធៀបការ ជួលផ្ទះនៅក្នុងបុរី ។
វិនិយោគទិញដីធ្លីក្នុងក្រុងៈ
បច្ចុប្បន្នតម្លៃដីក្នុងទីក្រុងភ្នំពេញ គឺបន្តកើនឡើងឥតឈប់ឈរ ដែលជាកត្តាជំរុញឲ្យមានអ្នកវិនិយោគពីក្រៅស្រុក ក៏ដូចជា អ្នកវិនិយោគក្នុងស្រុកបន្តការទិញ-លក់ ឥតឈប់ឈរ អ្នកវិនិយោគទៅលើដីក្នុងក្រុង គឺជាអ្នកវិនិយោគដែលមានសាច់ប្រាក់ ក្នុងដៃចំណូលខ្ពស់ និងមានបំណងចង់លក់បន្ត ក្នុងអំឡុងពេលឆាប់ៗ ដើម្បីបានចំណេញ ឬមានបំណងសាងសង់សម្រាប់អគារពាណិជ្ជកម្ម អគារការិយាល័យ ឬលំនៅដ្ឋានសម្រាប់ខ្លួនក្នុងការរស់នៅក្នុងទីក្រុងភ្នំពេញ។
អ្នកវិនិយោគប្រភេទនេះ មិនសូវមានហានិភ័យលើការវិនិយោគ ព្រោះដីធ្លីក្នុងក្រុងមានហេដ្ឋានរចនាសម័្ពន្ធគ្រប់គ្រាន់ មានតម្រូវការគ្រប់ពេល ដែលធ្វើឲ្យគាត់មានការងាយស្រួល ក្នុងការលក់បញ្ចេញយកសាច់ប្រាក់។ បើទោះបីជាស្ថិតនៅក្នុងស្ថានភាពលំបាកយ៉ាងណាក្តី ។
វិនិយោគដីធ្លីជាយក្រុងៈ
បើសិនលោក អ្នកចង់បានផលចំណេញខ្ពស់ ពេលអនាគតពីចន្លោះ៥ ទៅ១០ឆ្នាំការវិនិយោគដីជាយក្រុងភ្នំពេញ ជាជម្រើសល្អបំផុត។ ដែលអ្នកវិនិយោគអាចចំណេញបានរហូតទៅដល់៤០ដងនៃតម្លៃដើម ឬលើសពីនេះទៅទៀត នៅក្នុងរយៈពេលពី ៥ឆ្នាំទៅ១០ឆ្នាំ ដែលអ្នកវិនិយោគបានដឹង ពីផែនការអភិវឌ្ឍច្បាស់លាស់ របស់រាជរដ្ឋាភិបាល និងការអភិវឌ្ឍហេដ្ឋារចនាសម្ព័ន្ធ របស់រាជធានីភ្នំពេញ។
តែអ្នកវិនិយោគប្រភេទនេះត្រូវតែមានលុយដុំ និងកប់ទុកទៅក្នុងការវិនិយោគរយៈពេលវែងរហូតដល់១០ឆ្នាំ ដែលរង់ចាំពេលវេលា នៃការអភិវឌ្ឍបានទៅដល់ជាពិសេសការពង្រីកទីក្រុងភ្នំពេញ។ ទោះជាយ៉ាងនេះក្តី ការវិនិយោគប្រភេទនេះ មានហានិភ័យខ្ពស់ប្រសិនបើ អ្នកវិនិយោគមិនមានលុយ ឬក៏ទុនទុករយៈពេលយូរ ឬមិនដឹងពីពត៌មាននៃការអភិវឌ្ឍច្បាស់លាស់ ឬកត្តាកម្មសិទ្ធស្របច្បាប់ផ្សេងៗ របស់ដីដែលកំពុងវិនិយោគ ដែលការវិនិយោគខ្លះ អាចប៉ះពាល់ទៅលើដីរបស់រដ្ឋ ដីមិនអាចចេញកម្មសិទ្ធប្លង់រឹង ឬដីដែលមានជម្លោះផ្សេងៗ ដែលកើតដោយអ្នកវិនិយោគមិនបានដឹងច្បាស់។
លោក សំ សុខនឿន ប្រធាន សមាគមនអចលនទ្រព្យសកល (GRA) និងជាអគ្គនាយក ក្រុមហ៊ុន SAM SN REALTY CO., LTD បានមានប្រសាសន៍ថា អ្នកវិនិយោគមួយចំនួនកាលពីឆ្នាំ២០១២ លោកទិញដីតម្លៃតែUSD៥ក្នុង១ម៉ែត្រការ៉េ ដែលពេលនោះជាដីជាយក្រុង រហូតក្រោយមកតម្លៃដីនេះ មានតម្លៃពី USD១៥០ ទៅ USD ៣០០ក្នុង១ម៉ែត្រការ៉េ ។
លោកបន្តថា “ការវិនិយោគដីធ្លី លើប្រភេទណាក៏មានការចំណេញដែរ គ្រាន់តែការវិនិយោគនោះ ត្រូវប្រាកដថាការវិនិយោគដីស្របច្បាប់ នោះនឹងបានផលចំណេញ តិច រឺច្រើន តាមស្ថានភាពហិរញ្ញវត្ថុរបស់អ្នកវិនិយោគ”៕
