ដោយៈតារារះ
ភ្នំពេញៈ ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូនលោកស៊ុន ចាន់ថុលបានបង្ហាញរបាយការណ៍បូកសរុប បច្ចុប្បន្នភាពគម្រោងហេដ្ឋារចនាសម្ព័ន្ធធំៗ ១២ គម្រោង នៅកម្ពុជា ដែលបាននិងកំពុងសាងសង់ និងត្រៀមដំណើរការសាងសង់នៅកម្ពុជា។
គំរោងហេដ្ឋារចនាសម្ព័ន្ឋធំៗ ដែលនឹងរួមចំណែកដល់ការអភិវឌ្ឍសេដ្ឋកិច្ចសង្គមកម្ពុជា រួមមាន ទី១) បញ្ចប់ការចរចាជាមួយក្រុមហ៊ុន ម៉ៅការសាងសង់រួចហើយ លើគម្រោងស្ពានក្រចេះ-កំពង់ធំ គ្រោងនឹងបើកការដ្ឋាននៅចុងឆ្នាំនេះ។ ទី២) ចុះកិច្ចសន្យាសាងសង់រួចហើយ លើគម្រោងលើកកម្ពស់ផ្លូវជាតិលេខ៤១ ផ្លូវលេខ៣១ និងផ្លូវជាតិលេខ៣៣ បច្ចុប្បន្នកំពុងរង់ចាំរៀបចំបើកការដ្ឋានសាងសង់ឆាប់ៗ។ ទី៣ ក្រសួងបាន និងកំពុងសិក្សាផ្លូវក្រវ៉ាត់ក្រុងទី៤ ។ ទី៤) ក្រសួង និងឯកជានបានបញ្ចប់ការសិក្សារួចរាល់លើគម្រោងផ្លូវតភ្ជាប់ពីខេត្តកំពង់ឆ្នាំង-ខេត្តកំពង់ធំ។
ទី៥) ក្រុមការងារបានបញ្ចប់ការសិក្សាជាស្ថាពរលើ គម្រោងផ្លូវតភ្ជាប់ពីខេត្តបាត់ដំបងទៅកាន់ខេត្តសៀមរាប ប្រវែង៧២គម ទី៦) គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ សម្រេចបាន៦៥ភាគរយ គ្រោងបញ្ចប់ការសាងសង់ក្នុងខែកញ្ញា ឆ្នាំ២០២២ ទី៧) ក្រសួងកំពុងសិក្សាគម្រោងសាងសង់ ផ្លូវល្បឿនលឿន ភ្នំពេញ-បាវិត-ម៉ុកបៃ ព្រំដែនកម្ពុជា-វៀតណាម ដោយលើគោលការណ៍កសាងប្រតិបត្តិផ្ទេរ(BOT) ទី៨) ក្រុមការងារបានបញ្ចប់ គម្រោងសាងសង់ផ្លូវ៣៤ខ្សែនៅ ក្រុងព្រះសីហនុរួចរាលើ។
ទី៩) គម្រោងផ្លូវ៣៨ខ្សែនៅក្រុងសៀមរាប សម្រេចបានប្រមាណ៧០% គ្រោងបញ្ចប់នៅចុងឆ្នាំនេះ។ ទី១០) ក្រសួងកំពុងរៀបចំបញ្ចប់យុទ្ធសាស្ត្រ អភិវឌ្ឍន៍ផ្លូវដែកនៅកម្ពុជា ហើយគ្រោងដាក់ជូនប្រមុខរាជរដ្ឋាភិបាលឯកភាពឆាប់ៗ។ ទី១១) គម្រោងពង្រីកកំពង់ផែក្រុងព្រះសីហនុ ដើរទៅមុខដោយរលូន ដែលអាចអនុញ្ញាតឱ្យនាវាចំនួន៩៣% នៅ តំបន់អាស៊ីប៉ាស៊ីហ្វិកអាចចូលចតបាន និងទី១២) ក្រសួងគ្រោងពង្រីកសមត្ថភាពកំពង់ផែ មួយចំនួនរួមមា៖ កំពង់ផែខេត្តកំពត កំពង់ផែស្វយ័តក្រុងភ្នំពេញ និងកំពង់ផែទន្លេផ្សេងទៀត ដើម្បីឆ្លើយតបនឹងតម្រូវការកើនឡើង នៃការដឹកជញ្ជូនតាមផ្លូវទឹក៕
