ដោយៈគង់ សូរិយា
ភ្នំពេញៈ ការចាក់វ៉ាក់សាំងដូសទី៣ឬដូសជំរុញ កំពុងត្រូវបានជំរុញនិងលើកទឹកចិត្តពីរដ្ឋាភិបាល ប៉ុន្តែប្រសិនជាចាក់មុនកាលកំណត់ បន្ទាប់ពីចាក់វ៉ាក់សាំងដូសទី២រួច តើការចាក់វ៉ាក់សាំងដូសទី៣មានប្រសិទ្ឋភាពដែរឬទេ?។
លោកជំទាវឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេសបានឲ្យដឹងកាលពីពេលថ្មីៗនេះថា អ្នកចាក់វ៉ាក់សាំងទើបបាន២ខែ ហើយចង់ចាក់ដូសទី៣ ក៏មិនមានប្រយោជន៍ឬប្រសិទ្ធភាពអ្វីដែរ ហើយណាមួយវាខុសទៅនឹងគោលការណ៍ ដែលបានកំណត់ទៀតផង។
លោកជំទាវបន្ថែមថា “វ៉ាក់សាំងបើចាក់ចូលក្នុងខ្លួនយើងហើយ មិនអាចយកចេញមកវិញបានទេ។ ដូចនេះមុននឹងសម្រេចចិត្តចាក់ ត្រូវគិតគូរឲ្យបានច្បាស់លាស់ ហើយត្រូវមើលលក្ខណៈបច្ចេកទេសឲ្យបានត្រឹមត្រូវ”។
ការបង្ខំ ឬតាមគេអូសទាញនៃពាក្យចចាមអារ៉ាម អាចធ្វើឲ្យយើងពិបាកតែខ្លួនឯងនោះទេ។ ហើយបើចាក់រួចក៏គ្មានប្រយោជន៍ដែរ ព្រោះមិនទាន់គ្រប់ខែត្រូវចាក់ដូសទី៣។ ដូច្នេះទើបក្រសួងសុខាភិបាលលោក បានកំណត់ និងប្រកាសពីពេលវេលាច្បាស់ៗ សម្រាប់ឲ្យបងប្អូនប្រជាជនយើងបានដឹង។ ចៀសវាងភាន់ច្រឡំដោយប្រការណាមួយ នាំឲ្យទៅប្រជ្រៀតគ្នាចាក់វ៉ាក់សាំងជាមួយអ្នកគ្រប់ខែត្រូវចាក់ដែរ។លោកជំទាវបញ្ជាក់។
បើទោះបីជាវ៉ាក់សាំងអាចការពារយើង មិនឲ្យឈឺធ្ងន់បានពិតមែន តែពលរដ្ឋម្នាក់ៗកុំអាងមានអាវក្រោះការពារមិនខ្លបខ្លាចជំងឺ។ ដោយសារវីរុសនាបច្ចុប្បន្ននេះបំប្លែងខ្លួនគ្រប់ប្រភេទ និងល្បីឆ្លងលឿនមិនធម្មតា ហើយគ្រប់គ្នាត្រូវតែប្រកាន់ខ្ជាប់នូវវិធានការ ៣កុំ ៣ការពារ ដើម្បីការពារខ្លួនពីជំងឺកូវីដ ជាពិសេសនោះគឺគ្រួសារនិងសហគមន៍ទាំងមូល។
វ៉ាក់សាំងជាមធ្យោបាយមួយដ៏មានប្រសិទ្ធភាព ក្នុងការកាត់បន្ថយការចម្លងពីធ្ងន់ទៅស្រាល និងកាត់បន្ថយអ្នកជំងឺសម្រាកពេទ្យផងដែរ។ ដូចនេះសូមប្រជាពលរដ្ឋនាំគ្នាទៅចាក់វ៉ាក់សាំងទៅតាមវេនរបស់ខ្លួន ដើម្បីឲ្យមានភាពស៊ាំក្នុងសហគមន៍ ទប់ស្កាត់ការឆ្លងជំងឺកូវីដនិងបំប្លែងខ្លួនគ្រប់ប្រភេទ៕
