ដោយៈសុខុម
ភ្នំពេញ: ភោជនីយដ្ឋានឌីមសាំហុងកុង Tim Ho Wan ដ៏ល្បីល្បាញ ដែលមានវត្តមាននៅប្រទេសកម្ពុជា ត្រូវបានប៊្រែនភោជនីយដ្ឋានអន្តរជាតិមួយទិញ យកទាំងស្រុងហើយ។
យោងតាមកាសែត Bangkok Post ចុះផ្សាយកាលពីថ្ងៃទី៦ កញ្ញា ឱ្យដឹងថា ប៊្រែនភោជនីយដ្ឋានអន្តរជាតិ របស់ហ្វីលីពីន Jollibee Foods Corporation (JFC) ដែលល្បីខាងមាន់បំពង បានទិញយកភោជនីយដ្ឋានឌីមសាំ Tim Ho Wan ទាំងស្រុងហើយជាមួយនឹងគោលបំណង ពង្រីកទីផ្សារទៅកាន់ប្រទេសចិន ព្រមទាំងបម្រើមុខម្ហូបចិន នៅទូទាំងពិភពលោករួមទាំងផងដែរ ដើម្បីបង្កើនប្រាក់ចំណូល។
ប៊្រែនភោជនីយដ្ឋាន Jollibee Worldwide ដែលជាបុត្រសម្ព័ន្ធរបស់ JFC បានទិញយកភាគហ៊ុន ដែលនៅសេសសល់១៥ភាគរយ របស់ភោជនីយដ្ឋានឌីមសាំ Tim Ho Wan កាលពីខែមុនក្នុងតម្លៃ៥៣.២៥លានដុល្លារអាមេរិក ដើម្បីកាន់កាប់ភាគហ៊ុន១០០ភាគរយ។
ប្រទេសចិន គឺជាទីផ្សារធំបំផុតទី២ របស់ JFC បន្ទាប់ពីប្រទេសហ្វីលីពីន។ ដោយទីផ្សារហ្វីលីពីន ត្រូវបានបិទខ្ទប់នៅឡើយ ដើម្បីទប់ស្កាត់ការរីករាលដាលវីរុសកូវីដ-១៩ ប្រទេសចិន កំពុងដើរតួនាទីយ៉ាងសំខាន់ នៅក្នុងការបង្កើនប្រាក់ចំណូលសម្រាប់ក្រុមហ៊ុន។
គិតត្រឹមឆមាសទី១ ឆ្នាំ២០២១ ភោជនីយដ្ឋាន JFC មានបណ្តាញប៊្រែនចំនួន១៧នៅក្នុងប្រទេសចំនួន៣៣ ជាមួយនឹងហាងចំនួន៥.៨១៦កន្លែង។ ក្នុងចំណោមនោះ ហាងចំនួន៣.១៩២ ស្ថិតនៅក្នុងប្រទេសហ្វីលីពីន ខណៈហាងចំនួន៤០៧កន្លែងរបស់ ប៊្រែនជាច្រើន រួមមាន ទាំងប៊្រែន Yonghe King ប៊្រែន Hong Zhuang Yuan និងប៊្រែន Dunkin’ Donuts សុទ្ធតែនៅក្នុងប្រទេសចិន។
JFC បានបើកដំណើរការភោជនីយដ្ឋាន Tim Ho Wan ដំបូងរបស់ខ្លួននៅក្រុងសៀងហៃ កាលពីខែកញ្ញាឆ្នាំមុន និងបានបើក២កន្លែងបន្ថែមទៀត ចាប់តាំងពីពេលនោះមក។
អ្នកនាំពាក្យរបស់ JFC និយាយថា JFC មានគម្រោងបើកហាងចំនួន១០០កន្លែងនៅទូទាំងប្រទេសចិន ក្នុងរយៈពេល៤ឆ្នាំខាងមុខនេះ។
ភោជនីយដ្ឋានឌីមសាំ Tim Ho Wan មាន៦សាខានៅទីក្រុងហុងកុង និង៤៧សាខានៅតំបន់អាស៊ី ដោយក្នុងនោះមាន១២សាខានៅប្រទេសសិង្ហបុរី។ ១២សាខានៅកោះតៃវ៉ាន់ និង៧សាខានៅហ្វីលីពីន។ ភោជនីយដ្ឋាននេះ ក៏មានវត្តមាននៅកូរ៉េខាងត្បូង ជប៉ុន ក្រុងម៉ាកាវ វៀតណាម ថៃ និងកម្ពុជា ផងដែរ៕
