ដោយៈវឌ្ឍនៈ
ភ្នំពេញៈ លោកសៀវ សុផល ត្រូវបានគេស្គាល់ថាជា គ្រូបង្រៀនវគ្គជោគជ័យ និងជាវាគ្មិនក្នុងកម្មវិធីជាច្រើន ពាក់ព័ន្ធជាមួយនឹងការបង្កើតអាជីវកម្ម ពាក់ព័ន្ធនឹងហិរញ្ញវត្ថុជាដើម។
នៅក្នុងកិច្ចសម្ភាសន៍មួយជាមួយគេហទំព័រ Property Areaកាលពីពេលថ្មីៗនេះ លោកសៀវ សុផលបាននិយាយថា “ការទទួលចំណេះដឹងខុស គឺគក្រោះថ្នាក់ជាងនៅល្ងង់ទៅទៀត”។
តើការទទួលបានចំណេះដឹងខុនស គ្រោះថ្នាក់នៃការទទួលចំណេះដឹងនោះយ៉ាងម៉េចទៅវិញ? លោកសុផលបានពន្យល់ថា នៅពេលដែលយើងចង់ជោគជ័យ យើងត្រូវស្វែងយល់ថាអ្វីទៅជាជោគជ័យ។ ជោគជ័យគឺជាគោលដៅ និងមានគោលបំណងជាក់លាក់មួយ ហើយបើចង់ជោគជ័យយើងត្រូវស្ដាប់អ្នកណា ដែលនិយាយពីគោលការណ៍ជោគជ័យ ពីព្រោះបច្ចុប្បន្ននេះ មានរឿងដ្រាម៉ាជាច្រើន ដែលយើងចូលទៅស្ដាប់ចូលទៅអានដោយមិនដឹងខ្លួន។
លោកបន្តថា “នៅពេលដែលរឿងដ្រាម៉ានោះ ចូលក្នុងខ្លួនយើង វានឹងចាប់ផ្ដើមងាកចេញ ពីគោលដៅគោលបំណងរបស់យើង”។ លោកបន្ថែមថា “បច្ចុប្បន្នយើងសង្កេតឃើញថា មានគ្រូជាច្រើនអះអាងចេះច្រើនជំនាញ មានទាំងជំនាញអនឡាញ ជំនាញសុភមង្គល ជំនាញទីផ្សារ រហូតដល់ជំនាញធ្វើឱ្យប្តីស្រលាញ់ ឬប្រពន្ធស្រលាញ់។ ដូច្នេះនៅពេលដែលយើងមិនមានគោលការណ៍ ឬយើងទទួលចំណេះទាំងនោះ យើងនឹងខុសគោលដៅនូវអ្វីដែលយើងចង់បាន”។
លោកសៀវ សុផលបានបន្តទៀតថា មនុស្សមួយចំនួនចង់ចេញរកស៊ី តែដើម្បីបទពិសោធន៍ ដូច្នេះបើចង់រកស៊ីត្រឹមយកបទពិសោធន៍ មិនចាំបាច់រកគ្រូឬរៀននោះទេ បើ សិនជាចង់រកស៊ី ដើម្បីរកលុយចាំយើងរកគ្រូបង្រៀន ហើយត្រូវកំណត់គោលដៅថាយើងនឹងយកលុយប៉ុន្មានក្នុងរយៈពេលប៉ុន្មានឆ្នាំ។
លោកបន្ថែមថា “យើងត្រូវស្ដាប់គ្រូដែលប្រាប់យើងឱ្យលុយ គ្រូដែលឱ្យយើងអនុវត្ត ហើយកុំស្ដាប់អ្នកដែលចាំថា ធ្វើបែបនេះមិនត្រូវទេ ធ្វើបែបនោះមិនត្រូវទេ កុំធ្វើបែបនេះនាំបរាជ័យ កុំរៀននាំតែគេបោក”។ លោកបន្តថា “អនាគតយើងមិនកំណត់ដោយអ្នកថានោះទេ អនាគតយើងមិនមែនកំណត់ដោយអតីតកាលរបស់យើងទេ យើងត្រូវកំណត់អនាគតយើងដោយខ្លួនឯងធ្វើអ្វីដែលខ្លួនចង់ធ្វើ និងមានគោលដៅច្បាស់លាស់”។
លោកសៀវ សុផលបញ្ជាក់ថា បើយើងមានក្ដីសុបិន្តមួយ ហើយយើងពុះពារធ្វើទៅតាមដំណាក់កាល និងតាមអ្វីដែលយើងចង់ធ្វើនោះ យើងនឹងអាចសម្រេចវានៅថ្ងៃណាមួយ តែបើសិនជាយើងនៅតែអង្គុយស្ដាប់គេអត់ធ្វើអ្វីសោះ នោះយើងក៏មិនអាចសម្រេចនូវក្ដីសុបិន្តនោះដែរ៕
់
