ដោយ: ម៉ាលីស
ភ្នំពេញៈ រាជធានីភ្នំពេញនឹងត្រូវពង្រីកបន្ថែមទៀត ដោយសារការកើនឡើងកត្តាប្រជាសាស្រ្ត យានយន្ត កំនើនសេដ្ឋកិច្ច ដែលធ្វើឲ្យមានសម្ពាធផ្នែករូបនីយកម្ម។
យោងតាមសៀវភៅ “វិថីអចលនទ្រព្យ” របស់គាម សៀកឡុងបានអោយដឹងថា នៅខែធ្នូឆ្នាំ២០១៥ គណៈរដ្ឋមន្ត្រីបានអនុម័តលើផែនការមេ (ប្លង់គោល) ប្រើប្រាស់ដីរាជធានីភ្នំពេញ ឆ្នាំ២០៣៥នេះ“ភ្នំពេញជារាជធានី ជាបេះដូងរបស់ប្រទេសកម្ពុជាស្ថិតនៅលើចំណុចពិសេស នៃប្រាសាទទន្លេបួនហៅថា “ទន្លេបួនមុខ” អាចជាអត្តសញ្ញាណតែមួយគ្មានពីរ ជាមជ្ឈមណ្ឌលនយោបាយ សេដ្ឋកិច្ច ពាណិជ្ជកម្ម វប្បធម៌ ប្រកបដោយសក្ដានុពល ប្រកួតប្រជែងជាមួយការអភិវឌ្ឍមួយ ប្រកបដោយវឌ្ឍនភាពសមធម៌ និងចីរភាព”។
ជាមួយនឹងការព្យាករណ៍ថា កំណើនប្រជាជនកើនឡើងទ្វេរដងក្នុងឆ្នាំ ២០៣៥ដល់ចំនួនជាង៦លាននាក់ ដោយសារតែការធ្វើចំណាកស្រុកពីជនបទ មកទីក្រុងនិងឆ្ពោះមកកាន់តំបន់រាជធានីភ្នំពេញ ដូចនេះផ្ទៃដីទីក្រុងនឹងត្រូវពង្រីកបន្ថែម។ ផ្ទៃដីរាជធានីភ្នំពេញសរុបបច្ចុប្បន្នមានចំនួន៦៧៨,៤១៦ គីឡូម៉ែត្រការ៉េ ដែលនៅមានលក្ខណៈ តូចចង្អៀតនៅឡើយ បើប្រៀបធៀបទៅនឹងផ្ទៃដីនៃទីក្រុងហាណូយ និងទីក្រុងហូជីមិញ។
ដើម្បីឲ្យមានមាត្រដ្ឋានដែនដីមួយដូចគ្នា និងទំហំនៃក្រុងពីរខាងលើ ព្រំដែនរាជធានីភ្នំពេញ អាចត្រូវពង្រីកក្នុងរង្វង់ទំហំ៣០គីឡូម៉ែត្រជុំវិញ ដោយគិតពីចំណុចកណ្ដាល នៅពេលនោះទីក្រុងភ្នំពេញ នឹងត្រូវគ្របដណ្ដប់លើផ្ទៃដី ខាងជើងស្ទើរតែទាំងអស់ នៃខេត្តកណ្ដាល។
ការបញ្ចូលគ្នារវាងសាលារាជធានីភ្នំពេញ ជាមួយនឹងផ្នែកខាងជើងនៃខេត្តកណ្ដាលនៅជាមួយខេត្តកណ្ដាលទាំងមូល ដើម្បីបង្កើតឲ្យបានរាជធានីភ្នំពេញធំមួយ ជាមួយនឹងលក្ខន្តិកៈ ពិសេសគឺរាជធានីដែលមានស្វយ័តភាព ហិរញ្ញវត្ថុមួយយ៉ាងធំដែលរួមបញ្ចូលទាំងការធ្វើវិនិយោគទុន និងលទ្ធភាពនៃការខ្ចីស្វ័យ័តភាពប្រាក់ផងដែរ នេះបើតាមខ្លឹមសារនៃអនុក្រឹត្យនេះ។ សូមបងប្អូនអានបន្ថែមនូវ ខ្លឹមសារនៃអនុក្រឹតនេះទាំងស្រុង ដែលអាចរកបានតាមប្រព័ន្ធអ៊ីនធឺណិត។
ក្រសួងរៀបចំដែនដី នគរូបនីយកម្មនិងសំណង់កាលពីពេលថ្មីៗនេះ បានពីផែនការមេប្រើប្រាស់ដីធ្លីរហូតដល់ឆ្នាំ២០៣៥ ដែលក្នុងផែនការនេះ រដ្ឋាភិបាលនឹងពង្រីករាជធានីភ្នំពេញបន្ថែមទៀតនាពេលខាងមុខ ដែលបណ្តាស្រុកនានាដែលស្ថិតនៅជាប់រដ្ឋបាលរាជធានីភ្នំពេញ ក្នុងខេត្តកណ្តាលនាពេលបច្ចុប្បន្ននេះ អាចនឹងកាត់ចូលរាជធានីភ្នំពេញនាពេលអនាគត៕
