ដោយៈជេស៊ីកា
កំពង់ធំៈ លោកងួន រតនៈអភិបាលខេត្តកំពង់ធំ បានស្នើឲ្យមន្រ្តីជំនាញពន្ឋដារ សហការជាមួយអាជ្ញាធរដែនដី ដើម្បីធ្វើការផ្សព្វផ្សាយឲ្យបានទូលំទូលាយ ជូនប្រជាពលរដ្ឋអំពីតម្លៃអចលនទ្រព្យ គិតពន្ធប្រថាប់ត្រាចៀសវាងមានការយល់ច្រលំ។
លោកងួន រនតៈ បានថ្លែងយ៉ាងដូច្នេះនៅក្នុងកិច្ចប្រជុំពិភាក្សា លើការប្រមូលពន្ធប្រថាប់ត្រា នៅក្នុងភូមិសាស្ត្រខេត្តកំពង់ធំ នាព្រឹកថ្ងៃទី២២ ខែវិច្ឆិកា ឆ្នាំ២០២១ ដោយមានការចូលរួមពីមន្ត្រីជំនាញសាខាពន្ធដាខេត្ត និងអភិបាលក្រុងស្រុក ។
លោកបន្ថែមទៀតថា វិស័យការងារពន្ធដារ និងគយ ពិតជាវិស័យដែលមានសារៈសំខាន់ណាស់ ក្នុងការជួយប្រមូលពន្ធលើអចលនទ្រព្យ ដែលអាចជួយបង្កើនប្រាក់ចំណូលថវិកាជាតិ ក្នុងការអភិវឌ្ឍន៍ប្រទេសជាតិ ឲ្យមានការរីកចម្រើនទៅមុនបន្តទៀត ។
លោកបន្តថា ចំពោះការធ្វើបច្ចុប្បន្នភាពនៃតម្លៃអចលនទ្រព្យ សម្រាប់មូលដ្ឋានគិតពន្ធប្រថាប់ត្រានេះសូមមន្ត្រីជំនាញពន្ធដារ ត្រូវសហការជាមួយអាជ្ញាធរមូលដ្ឋាន ធ្វើការកំណត់តម្លៃ និងកំណត់តំបន់ឲ្យសមស្រប ទៅនឹងភូមិសាស្ត្រទាំងតំបន់ទីប្រជុំជន ជាពិសេសតម្លៃសេដ្ឋកិច្ចដីធ្លីមានលក្ខណៈខុសគ្នា ដើម្បីចៀសវាងនៅពេលចុះអនុវត្តន៍ មានការតវ៉ាពីអ្នកទទួលសេវា ហើយអាជ្ញាធរដែនដីនិងមន្ត្រីជំនាញ សហការគ្នាធ្វើកិច្ចការងារនេះប្រកបដោយស្មារតីទទួលខុសត្រូវខ្ពស់។
លោកងួន រតនៈបានបន្តថា ចំពោះការងារសេសសល់ត្រូវរៀបចំពន្លឿនការដោះស្រាយ ពាក់ព័ន្ធពន្ធដារនិងសូរិយោដី ជូនអ្នកទទួលសេវា និងជំរះចេញពីឲ្យអស់ចំពោះដីដែលបានធ្វើការវិនិយោគ។
កិច្ចប្រជុំនេះដែរ មានគោលបំណងពិនិត្យឡើងវិញ នូវឧបសម្ព័ន្ធស្តីពីការបែងចែកភូមិសាស្ត្រនិងតម្លៃអចលនទ្រព្យ សម្រាប់មូលដ្ឋានគិតពន្ធប្រថាប់ត្រា ដើម្បីធ្វើការកែសម្រួលនូវភាពខ្វះចន្លោះជាលក្ខណៈបច្ចេកទេស និងតម្លៃឲ្យស្របតាមស្ថានភាពជាក់ស្តែង នៃវិស័យអចនលសទ្រព្យជាពិសេសតម្លៃដីធ្លី មានលក្ខណៈខុសគ្នាទាំងភូមិសាស្រ្តនិងជីវភាពរស់នៅប្រជាពលរដ្ឋ៕
